8 Noyabr Zəfərinin açarı - "Nəyi nə zaman etməyi gərək bacarasan"...

Artıq üç ildir xalqımız tarixi Zəfərimizin sevincini yaşayır. 44 gündə 30 ilin işğalına son qoymaq gücün, qüdrətin, möhkəm təmələ əsaslanan siyasətin nəticəsidir. Zəfər tarixini yazan Azərbaycan hərb tarixinə yenilik kimi daxil olan strategiya tətbiq edərək, ən müasir silahlardan istifadə etməklə, habelə az itki verərək qısa müddətdə düşmənin bütün hərbi texnikasını məhv etdi, canlı qüvvəsinə ciddi zərbə vurdu.

Azərbaycan Ordusunun yüksək peşəkarlıqla apardığı işğaldan azadetmə əməliyyatı dünya üzrə müharibələrin aparılması doktrinasında ciddi dəyişikliklərə səbəb olacaq. Bu müharibə göstərdi ki, dövlətimizin başçısı İlham Əliyevin həyata keçirdiyi güclü dövlət, güclü ordu strategiyası torpaqlarımızın işğaldan azad olunmasının ən başlıca səbəbidir. Dövlətimizin başçısının müsahibələrində də qeyd etdiyi kimi, ordumuz faktiki olaraq yenidən quruldu. Bu gün ordumuzun potensialı bütün dünyanın gözü önündədir. İnkişaf etmiş bəzi ölkələrin hərbi mütəxəssisləri də artıq bizim təcrübəmizi öyrənirlər.

Nəyi, nə zaman və necə etməyin ən yaxşı nümunələrini göstərən dövlət başçısı…

Fəaliyyəti boyunca “nəyi, nə zaman və necə etməyin” ən yaxşı nümunələrini göstərən Prezident İlham Əliyev bu tarixi missiyanı öz məntiqi sonluğuna çatdırdı.

2020-ci il 8 noyabrda üçtərəfli bəyanatdan sonra bəzilərində belə təsəvvür yaranmışdı ki, qələbəmiz tam deyil. ABŞ, Avropa İttifaqı, Fransa və s. 30 illik işğal dövründə olduğu kimi, bu mərhələdə də vəziyyətin qeyri-müəyyən qalmasında maraqlı idi, bu məqsədlə ATƏT-in Minsk qrupunun reanimasiyasına cəhdlər göstərildi, yenidən uzun-uzadı danışıqlar prosesinə başlamağa cəhd edildi.

Bütün bunlar Azərbaycan Prezidentinin polad iradəsinə və qətiyyətinə təsir edə bilmədi. Nəyi, nə zaman və necə etməyin ən yaxşı nümunələrini göstərən dövlət başçısı suverenlik və ərazi bütövlüyümüzün tam bərpası üçün zəruri addımları atdı. Vətən müharibəsindən sonrakı 3 il ərzində baş verən proseslər də bunu təsdiqləyir. Bütün təzyiqlərə və hədələrə baxmayaraq, Prezident İlham Əliyev uzaqgörənlik, prinsipiallıq və qəti iradə nümayiş etdirərək Xankəndidə Azərbaycanın Dövlət Bayrağının qaldırılacağı günü yaxınlaşdırırdı. Beləliklə, 3 il ərzində həyata keçirilən siyasət bu il sentyabrın 20-də öz məntiqi sonluğu ilə yekunlaşdı.

Tam suverenlik Prezidentin qətiyyətli siyasəti sayəsində 2023-dən başladı

Müstəqillikdən sonra ilk dəfədir biz bütöv, vahid Azərbaycanda yaşayırıq. Bu, Azərbaycanın çoxəsrlik dövlətçilik tarixinin ən şərəfli səhifələrindən biridir.

Bizim müstəqillik tariximiz 1991-dən başlasa da, tam suverenlik Prezidentin qətiyyətli siyasəti sayəsində 2023-dən başladı. Çünki heç vaxt başladığı işləri yarımçıq qoymayan və bütün fəaliyyəti boyunca “nəyi, nə zaman və necə” etməyin ən yaxşı nümunələrini göstərən Azərbaycan Prezidenti İlham Əliyevin suverenlik və ərazi bütövlüyü anlayışı heç bir zaman müharibənin nəticələri ilə məhdudlaşmamışdır. Prezident İlham Əliyev uzaqgörənliklə, praqmatik şəkildə, barışmaz prinsipiallıq və qəti iradə nümayiş etdirərək Xankəndində Azərbaycanın dövlət bayrağının asılacağı günü yaxınlaşdırdı. Bütün bunlar isə bir daha təsdiq etdi ki, Prezident İlham Əliyev həmişə gələcəyə baxan, onilliklər sonranı düşünən və bütün planlarını strateji məqsədlərə uyğun quran liderdir. Bir sözlə, milli lider xüsusiyyətlərinin və keyfiyyətinin daşıyıcısı olan İlham Əliyev müharibədən sonrakı 3 il ərzində tarixi əhəmiyyət kəsb edən bir proses reallaşdırdı və üzərinə götürdüyü tarixi missiyanı uğurla başa çatdırdı.

Prezident bir daha sübut etdi ki, o verdiyi bütün vədləri yerinə yetirməyi bacaran Müzəffər sərkərdədir!

Zəfərdən sonra Azərbaycan Respublikasının Konstitusiya quruluşunun bərpa edilməsi məqsədilə Azərbaycan 19 sentyabr 2023-cü ildə lokal xarakterli antiterror tədbirlərinə başladı. Bu da Azərbaycanın növbəti qələbəsi ilə nəticələndi. Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq 2023-cü il sentyabrın 20-də saat 13:00-da müvafiq şərtlər altında lokal xarakterli antiterror tədbirlərinin dayandırılması barədə razılıq əldə olundu. Azərbaycanın Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələrinin silahı yerə qoyması, döyüş mövqelərindən və hərbi postlardan çıxması və tam şəkildə tərksilah olunması, Ermənistan silahlı qüvvələrinin birləşmələri Azərbaycan ərazilərini tərk etməsi, qeyri-qanuni erməni silahlı dəstələrinin buraxılması, eyni zamanda, paralel şəkildə bütün silah-sursat və ağır texnikanın təhvil verilməsi Azərbaycanın növbəti böyük qələbəsidir.

Antiterror tədbirlərinin nəticəsində Azərbaycan öz suverenliyini bərpa etdi. 15 oktyabr tarixində Xankəndi şəhərinin mərkəzi meydanında Azərbaycan Bayrağı qaldırıldı. 20 il bundan əvvəl Prezident seçilmiş İlham Əliyev doğma xalqına müraciət edərək söz vermişdi ki, Azərbaycan xalqının və Azərbaycan dövlətinin milli maraqlarını müdafiə edəcək və Azərbaycanın ərazi bütövlüyünü qoruyacaq. Ərazi bütövlüyümüzü təmin etməklə, Prezident bir daha sübut etdi ki, o verdiyi bütün vədləri yerinə yetirməyi bacaran Müzəffər sərkərdədir!

Məhəmmədəli QƏRİBLİ

Bakı Xəbər .- 2023.- 8 noyabr, № 204.- S.8.