Azərbaycançılıq təbliğatı təkcə dövlətin işi deyil...

Azərbaycançılıq xalqımızın milli ideologiyasıdır və bu məfhum cəmiyyətin həmrəyliyinə, xalqın vahid bir ideya ətrafında mənəvi birliyinə nail olunmasına səbəb olub.

Məlumdur ki, Azərbaycançılığın tarixi yeni deyil, bu ideya hələ XX əsrin əvvəllərində yaranıb, amma onun vahid dövlətçilik ideologiyası kimi təsdiq olunması və xalqımızı birləşdirən vahid bir ideologiyaya çevrilməsi ümummilli lider Heydər Əliyevin adı ilə bağlıdır.

Azərbaycançılığın geniş intişar tapmasında və dövlətçilik siyasətində özünə xüsusi yer tutmasında Prezident İlham Əliyevin xidmətləri də böyükdür. Məhz İlham Əliyev sayəsində milli-mənəvi və bəşəri dəyərlər artıq azərbaycançılıq ideologiyasının özəyini, onun əsas təməl prinsiplərini təşkil etməkdədir. Azərbaycançılıq ümumbəşəri dəyərlərdən yetərincə bəhrələnməklə bərabər, öz milli mentallığını qoruyub saxlamaqdadır. Bu ideya həm Azərbaycanın sərhədləri daxilində, həm də ölkəmizin hüdudlarından kənarda yaşayan hər bir azərbaycanlı üçün əsas baza mənbəyidir.

Azərbaycanın və azərbaycançılığın daha da möhkəmlənməsi, daha geniş şəkildə təbliğ edilməsi işində dövlət qurumları saysız işlər görüb, tədbirlər keçirib, kitablar, jurnallar çap ediblər, xarici ölkələrdə işlər həyata keçiriblər.

Azərbaycançılığın təbliğatı təkcə dövlətin işi deyil, bu həm də ictimaiyyətin, ictimai təşkilatların, yaradıcılıq qurumlarının, sənət adamlarının, qeyri-hökumət təşkilatlarının işidir.

Azərbaycançılıqla bağlı təbliğat prosesində ölkəmizdəki qeyri-dövlət qurumları, məsələn, QHT-lər, vətəndaşlar, media, diaspor necə iştirak edir? Onların fəaliyyəti məqbul sayıla bilərmi? Hansı öz üzərinə düşən vəzifələri layiqincə yerinə yetirə bilir, yaxud bilmir? Nə etmək lazımdır?

“Hər birimizin əsas vəzifəsi azərbaycançılıq ideologiyasına xidmət etməkdən ibarət olmalıdır...”

Azərbaycan Aşıqlar Birliyinin sədri, professor Məhərrəm Qasımlı bildirdi ki, Azərbaycançılığın təbliğində sənət adamlarının, el sənətkarlarının, aşıqların da üzərinə vəzifələr düşür və onlar bunu layiqincə həyata keçirirlər.

M.Qasımlı qeyd etdi ki, Aşıq sənəti xalqımızın ənənəvi musiqisi olmaqla yanaşı, həm də bəşəri mahiyyət daşıyır. “Hər birimizin əsas vəzifəsi, azərbaycançılıq ideologiyasına xidmət etməkdən ibarət olmalıdır. Keçdiyimiz yol, əldə etdiyimiz uğurlar, Vətən müharibəsində qazandığımız şanlı qələbə onu deməyə əsas verir ki, azərbaycançılıq ideologiyası öz müsbət nəticələrini verməkdədir. Ümumiyyətlə, harada yaşamasından asılı olmayaraq, hər bir azərbaycanlı Azərbaycan sevgisi ilə yaşamalı, dövlətin mənafelərini qorumalı, azərbaycançılıq ideologiyasının prinsiplərini hər zaman üstün tutmalıdır”.

Məhərrəm Qasımlının sözlərinə görə, ozan-aşıq sənəti yarandığı gündən etibarən milli dövlətçilik ənənəsini əsas istiqamət olaraq götürüb. “Ümumiyyətlə, aşıqlıq sənəti bədii varlığımızda milli ruhu - azərbaycançılığı yaşadan sağlam köklərdən sayılır. Vurğulandığı kimi, azərbaycançılıq ruhunun aşılanmasında mühüm rol oynayan el sənətkarlarının, o cümlədən aşıqların son illər ərsəyə gətirdiyi əsərlərin leytmotivini azərbaycançılıq, dövlətçilik, Azərbaycanın müstəqilliyinin tərənnümü, Qarabağ ağrısı, milli faciələrimizlə bağlı mövzular təşkil edir. Bir sözlə, azərbaycançılıq məfkurəsinə bağlı olan sənətkarlar böyük əsərlər yaradır və bu əsərlərdə xalqın vətənpərvərliyi, taleyi, düşüncəsi, əqidə və inamı əks etdirilir. Azərbaycançılıq ruhunun aşılanmasında mühüm rol oynayan aşıqlıq sənətinə Azərbaycanda dövlət səviyyəsində qayğı göstərilir. Ulu Öndər Heydər Əliyev aşıqlıq sənətinə yüksək qiymət verdiyi kimi, onun layiqli siyasi varisi ölkə Prezidenti İlham Əliyev də bu sənəti yüksək dəyərləndirir...”

“QHT-lər, ictimai birliklər, fondlar və qürbətdə fəaliyyət göstərən diaspor təşkilatları xeyli işlər görüblər”

Müstəqil ekspert Rauf Zeyni “Bakı-Xəbər”ə bildirdi ki, Azərbaycançılıq məfkurəsinin, Azərbaycan həqiqətlərinin dünya ictimaiyyətinə çatdırılması, yayılması, xüsusilə dünya azərbaycanlıları arasında təbliğ olunması ölkəmizin prioritet istiqamətlərdən biridir: “Çünki iqtisadi qüdrətin və hərbi gücün artırılması ilə yanaşı ideoloji iş də görülməlidir. Milli birliyə gedən yolda milli birliyin gücləndirilməsi istiqamətində Azərbaycançılıq məfkurəsinin daha geniş yayılması çox vacib məsələdir. Ona görə də bu istiqamətdə dövlət qurumları üzərlərinə düşən vəzifələrini yerinə yetirirlər. Təbii ki, bunu daha yüksək səviyyədə yerinə yetirməlidirlər. Onlarla paralel həm də QHT-lər, ictimai birliklər, fondlar və qürbətdə fəaliyyət göstərən diaspor təşkilatları xeyli işlər görüblər. Burda bizim görmədiyimiz fəaliyyətlər də var, yazılan və yazılmayan qanunlar, qaydalar çərçivəsində xeyli işlər görülüb. Ədalət naminə deyək ki, bu görülən işlərin hamısını yüksək qiymətləndiririk. Amma sual oluna bilər ki, görülən işlər kifayət edirmi?Xeyr, kifayət etmir. Biz daha çox işlər görməliyik. QHT-lər, vətəndaş cəmiyyəti olaraq Azərbaycançılıq məfkurəsinin təbliğində fəaliyyətimizi daha da genişləndirməliyik. Eləcə də digər təşkilatlar burda daha güclü işləməlidirlər. Söhbət elmi təşkilatlardan, ali məktəblərdən, yaradıcılıq qurumlarından, sahibkarlıq fəaliyyəti ilə məşğul olanlardan və sairdən gedir. Sahibkarlar iqtisadiyyata töhfə verməklə yanaşı, az da olsa ideoloji işlə məşğul olmalıdır. Hansısa bir ölkədə iqtisadiyyatımızın təbliği, orda səfirliklə, diasporla birgə tədbir keçirilirsə bu zaman Azərbaycan məfkurəsi haqda iki cümlə deməyin özü də bir təbliğatdır. Bu baxımdan hesab edirəm ki, kompleks tədbirlərin həyata keçirilməsi və əlbəttə ki, bütün qurumlarla koordinasiyalı fəaliyyətin gerçəkləşdirilməsi çox vacibdir. Bunu xüsusi qeyd edirəm ki, kompleks və koordinasiyalı fəaliyyətin həyata keçirilməsi yaxın gələcəkdə böyük effekt verə bilər”.

İradə SARIYEVA

Bakı Xəbər 2025.- 22-23 iyun (№106).- S.8.