Əsl nəticə

Mədəniyyət və Turizm Nazirliyi və Azərbaycan Mədəniyyət Fondunun təşkilatçılığı ilə oktyabrın 16-dan 25-dək Bakıda ənənəvi Beynəlxalq Caz Festivalı keçirilir. 10 gün ərzində Heydər Əliyev Sarayında, Azərbaycan Dövlət Filarmoniyasında, Bakı Caz Mərkəzində, Beynəlxalq Muğam Mərkəzində dünyanın tanınmış caz ustaları və qrupları, Azərbaycan musiqiçiləri çıxış edəcəklər.

Onların arasında Əməkdar Artist İsfar Sarabski də var. Pianoçunun çıxışı oktyabrın 23-də Azərbaycan Dövlət Filarmoniyasında olacaq. İ.Sarabski səhnəni nağara ifaçısı, Əməkdar Artist Natiq Şirinovla bölüşəcək. İsfar Sarabski görkəmli ictimai xadim, məşhur opera ifaçısı, xanəndə və aktyor Hüseynqulu Sarabskinin nəticəsidir. Əməkdar Artist Prezident təqaüdçüsü və “Zirvə” dövlət mükafatı laureatıdır. Pianoçunun adı Gənc İstedadların Qızıl Kitabına daxil edilib.2009-cu ildə İ.Sarabski “Montreux Jazz Festival” Beynəlxalq musiqi festivalının qalibi olub. Keçən il isə dünyanın ən nüfuzlu musiqi universitetlərindən biri sayılan Berkli Musiqi Kollecinə (Berklee College of Music) daxil olub.“New Baku Post”un suallarını cavablandıram 22 yaşlı musiqiçi yaradıcılığı və caz musiqisi haqqında fikirlərini bölüşüb.

– Avqust ayında Heydər Əliyev Fondu tərəfindən təşkil edilən IV Beynəlxalq Qəbələ Musiqi Festivalında çıxışınızdan hansı təəssüratlar qalıb?

– Bu festival Azərbaycanın musiqi həyatında çox böyük hadisədir, əsl musiqi bayramıdır. Qəbələni Azərbaycanın ikinci musiqi mədəniyyəti paytaxtı adlandırmaq olar. Ölkəmizə gələn dünyanın məşhur musiqiçiləri konsertlər verir, yüksək peşəkar səviyyə nümayiş etdirirlər. Festivalda bizim musiqiçilər də uğurla iştirak edirdi. Heydər Əliyev Fondu mənim kimi bir sıra istedadlı gənclərə dəstək verir. Fondun mədəniyyət sahəsində layihələri bütün yaradıcı insanlara çox kömək edir.

– Festival zamanı siz fortepiano istehsal edən “Beltmann” şirkətinin nümayəndəsi kimi təqdim edildiniz. Sizin əməkdaşlığınız necə başladı?

– “Beltmann” fortepianolarının ticarət markasının əsası 1901-ci ildə hollandiyalı Yohan Beltmann tərəfindən qoyulub. 1983-cü ildə bu şirkətin istehsal qurğuları Almaniyaya keçirilib. 2008-ci ildə şirkətin sahibi Hans Lefernik (Yohan Beltmannın nəticəsi) yeni fabrik yaratmaq fikrinə düşüb və 2009-cu ildə o, seçimini Azərbaycanın Qəbələ şəhəri üzərində saxlayıb. Bu qədər təfsilata varmağım bu şirkəti təmsil edən şəxs olduğum üçündür. Çox şadam ki, tarixdə ilk dəfə Azərbaycan fortepianosunu təmsil etmək imkanı mənə verilib.

– Qəbələdən sonra İsveçrəyə yollandınız. Həmin beynəlxalq layihədə çıxış yadınızda necə qalıb?

– İsveçrədə dünyaşöhrətli musiqiçi Şlomo Mints tərəfindən təsis edilən festivala qatıldım. Şlomo Mints, Dmitri Yablonski, Boris Berezovski, Nikolay Luqanski kimi məşhur ifaçıların çıxış etdiyi bu festivalda mən, Aleksandr Marşin, Makar Novikovun daxil olduğu triomla iştirak etdim.

– İnsanlara yüksək səviyyəli musiqi zövqü yaşadan İsfar Sarabski üçün musiqi zövqdür, yoxsa sənət nümunəsi?

– Həyatımı musiqisiz təsəvvür edə bilmərəm. Musiqi ilə məşğul olduğuma görə özümü xoşbəxt sayıram. Yalnız musiqi vasitəsilə hisslərimi, emosiyalarımı və ovqatımı ifadə edə bilirəm.

– Məşhur opera müğənnisi Hüseynqulu Sarabskinin nəticəsi olmanız musiqiçi kimi formalaşmağınızda nə dərəcədə rol oynayıb?

– Əlbəttə, musiqiçi kimi formalaşmağımda bu faktın böyük rolu var. Hüseynqulu Sarabski Azərbaycan opera sənətinin əsasını qoyanlardan biri, böyük Üzeyir Hacıbəylinin yaratdığı opera və operettaların demək olar ki, hamısında əsas partiyaların ilk ifaçısı olub. Hüseynqulu Sarabski kimi tarixi şəxsiyyətin nəticəsi olmağımla fəxr edirəm.

– Özünüzə məxsus kompazisiyalarınız var. Sizin üçün cazın etnik, yoxsa müasir elementləri daha üstündür?

– Mən özümü hər hansı çərçivələrlə məhdudlaşdırmıram. Cazdan da, klassik musiqidən də, Azərbaycan xalq musiqisindən də istifadə edirəm. Muğam elementlərindən də bəhrələnirəm.

– İndiyədək unutmadığınız çıxışınız hansı olub?

– Bu il iyul ayında Montreo festivalında iştirak etdim. 2009-cu ildə həmin festivalda pianoçuların müsabiqəsində qalib gəlmişdim. Builki konsertdə əvvəlcə məşhur ifaçılar Çikoreya və Makferin çıxış etdilər. Belə ulduzlardan sonra səhnəyə çıxmaq asan məsələ deyildi. Konsertdən sonra məni təbrik edənlər arasında əfsanəvi Maykl Ceksonun prodüseri Kvinsi Cons, Lüksemburq şahzadəsi Robert, Klod Nobs kimi məşhur adamlar vardı.

Apreldə isə UNESCO-nun mənzil-qərargahında Caz Günü keçirildi. Dünyanın hər yerindən caz ulduzları dəvət edildiyi bu forumun təşkilatçıları baş direktor İrina Bokova, UNESCO-nun xoşməramlı səfir, məşhur cazmen Herbi Henkok idi. Foruma dəvət edilənlər arasında mən də vardım. “Henkokun dostları” adlı konsertdə saksofonçu İqor Butman, zərb alətlərində Terri Layn Karinqton və kontrabas ifaçısı Ben Vilyamsla birlikdə çıxış etdim.

Konsertdə Corc Benson, Markus Miller, Herbi Henkok kimi dünya şöhrətli caz ulduzları iştirak edirdi. Konsertdən sonra təbriklər alırsan, jurnalistlərə müsahibə verirsən, tamaşaçılar avtoqraf alır, şəkil çəkdirirlər. Əlbəttə, bunlar çox xoşdur. Hər bir konsertlərdən sonra mehmanxana və ya evə qayıdanda bəzən uzun müddət gözümə yuxu getmir. Konsertin hər anını, alqışları xatırlayıram. Musiqiçi üçün bu, onun yaradıcılığında xoşbəxt anlardan biridir.

– Dinlədiyiniz və bəhrələndiyiniz caz ifaçıları varmı?

– Bred Meldou, Herbi Henkok, Danilo Peres və Oskar Pitersonun yaradıcılığının vurğunuyam. Berkli Universitetinə daxil olandan sonra prorektor mənə deyəndə ki, müəllimim Danilo Peresa olacaqdır, bu xəbər sözün yaxşı mənasında məni heyrətləndirdi.

Bakupost. – 2012. -20 oktyabr. – S. 17.