Siqaret çəkmə, film çək!

“Addım” Yaradıcı Gənclər Assosiasiyasının təşkilatçılığı ilə Bakıda ilk dəfə 31 May – Beynəlxalq Tütün Əleyhinə Müdafiə Günü ilə əlaqədar “No Smoking” Film Festivalına start verilir. Festivalın bu yaxınlarda geniş kütləyə təqdim olunacaq videoçarxında siqaretdən istifadə etməyən məşhurlar – Flora Kərimova, Murad Dadaşov, Brilliant Dadaşova, Həmidə Ömərova, Eldar Qasımov, Sabina Babayeva, Elnarə Xəlilova, Firdovsi Atakişiyev, Azəri qızı Günel, Elnur Məmmədov, Hüsniyyə Məhərrəmova, Aytən Səfərova, Səxavət Nur, Felix Vişnevetski, Elza Seyidcahan və başqaları çəkilib.

“Addım” Yaradıcı Gənclər Təşkilatının təsisçisi, “No Smoking” Film Festivalının direktoru, fəlsəfə elmləri doktoru Hüseyn Cavadzadə “New Baku Post”a müsahibəsində bildirib ki, siqaret əleyhinə çəkiləcək filmlərin müsabiqəsi çərçivəsində silsilə sosial aksiyaların gerçəkləşdirilməsi də düşünülüb. Qeyd edək ki, təşkilatçılardan biri də daim siqaret əleyhinə mübarizə aparan Xalq artisti Brilliant Dadaşovadır. “Addım” Yaradıcı Gənclər Assosiasiyası və “No Smoking” Film Festivalı haqqında H.Cavadzadə suallarımızı cavablandırıb.

– “Addım” Yaradıcı Gənclər Assosiasiyası hansı zərurətdən yarandı?

– Bu gün Azərbaycanda istedadlı gənclər çoxdur və bəzən onlar öz potensiallarını reallaşdırmaqda çətinlik çəkir. “Addım”ın təsisçilərindən biri də “Eurovision-2011” Mahnı Müsabiqəsinin qalibi Eldar Qasımovdur. Biz hər dəfə görüşəndə o, bu barədə söhbət edirdi. Bu barədə ona internetlə çoxlu sayda gənc müraciət edib. Eləcə də mən və KİV-in istedadlı nümayəndələrindən biri olan Ülkər Qasımova artıq neçə illərdir ki, bu sahə ilə məşğuluq. “Addım”ı yaratmaqla gənclərimiz üçün daha çox iş görə biləcəyimizi düşündük.

– Assosiasiyanın ilk işi niyə məhz siqaret əleyhinə film festivalı oldu?

– Hazırda siqaret dünyanın ən böyük problemlərindən biridir. Şəxsən mən siqaret çəkilən məkanlardan uzaq olmağa çalışıram. Siqaretin insan sağlamlığına və cibinə ziyanı var. Festivalla gənclərin diqqətini bu mövzuya yönəltmək və onları bu zərərli vərdişdən daşındırmaq istəyirik. Artıq 5 ildir Azərbaycan Dövlət Mədəniyyət və İncəsənət Universitetində müəllim kimi çalışıram, gənclərin bu mövzuya marağı çox böyükdür, həm də bütün dünyada tütün əleyhinə mübarizə aparılır. Biz də “Addım” Yaradıcı Gənclər Assosiasiyası olaraq belə qərara aldıq ki, bu mövzunu gənc kinematoqrafçılar arasında aktuallaşdıraq. Layihə çərçivəsində keçiriləcək aksiyalarda nümayiş olunacaq filmlərlə düşünürəm ki, qarşıya qoyduğumuz missiyanın öhdəsindən gələcəyik. Şüarımız da buna əsaslanır: “Siqaret çəkmə, film çək!”

– Deyirsiniz ki, siqaret əleyhinə çəkiləcək filmlərin müsabiqəsi çərçivəsində silsilə sosial aksiyaların gerçəkləşdirilməsi də düşünülüb. Hansı tədbirlər və aksiyalar olacaq?

– May ayında baş tutacaq tədbirlərimizdə həkimlər də iştirak edəcək, mütəxəssislər siqaretin ziyanı haqqında geniş məlumat verəcək.

– Festival üçün çəkilən videoçarxda yer alan məşhurları necə seçdiniz?

– Bu məşhurların heç biri siqaret çəkmir. Əslində onları tapmaq çətin oldu. Amma hər biri böyük məmnuniyyətlə layihədə iştirak etdi. Baxmayaraq ki, format bizim şou-biznes üçün bir qədər fərqli idi. Videoçarxda 18 məşhur sima yer alıb. Məncə, bu heç də az göstərici deyil. Yeri gəlmişkən, videonu bizim universitetin kinorejissorluq kursunun tələbələri İsmayıl Zeynalov, Gülsüm Ağayeva və Leyla Qəmbərli ərsəyə gətirib.

– “No Smoking” Film Festivalında iştirak etmək istəyənlər üçün şərtlər hansılardır?

– Əsas şərt budur ki, çarx siqaret əleyhinə olsun. Filmlərin qəbuluna artıq başlanılıb və may ayının 20-dək davam edəcək. Filmlər bədii, sənədli və animasiya janrında ola bilər. Xronometraj 1-20 dəqiqədən çox olmamalıdır. Festival iştirakçıları üçün yaş, təhsil və başqa məhdudiyyətlər qoyulmayıb. Sadəcə, Azərbaycan vətəndaşlığının olması kifayətdir. Çünki bu il müsabiqə ölkədaxili formatda keçirilir. Əgər uğurlu alınsa, gələn il beynəlxalq səviyyəyə çıxmaq fikrimiz var.

– Münsiflər heyətinə kimlər daxildir?

– Münsiflər heyəti bütün seçimləri edəcək. Münsiflər heyəti videoçarxda yer alan iki məşhur sima və peşəkar kino xadimlərindən ibarət olacaq. Onların kimliyi isə 31 mayda Park Cinemada gerçəkləşəcək festivalın Gala gecəsinədək gizli saxlanılacaq. Çünki biz tam şəffaf bir müsabiqə keçirməyi düşünürük. Festivalda Qran-Pri mükafatçısını ikinəfərlik səyahət paketi gözləyir. Digər üç yer və tamaşaçı rəğbətinə görə seçilən bir yerin sahiblərinə “Sony Xperia” androidləri, eləcə də diplomlar təqdim ediləcək.

– “New Baku Post” qəzeti də siqaret əleyhinə kampaniya keçirir. Sizin buna münasibətiniz?

– “Addım” təşkilatının təsisçisi kimi məmnuniyyətlə layihənizə qoşuluram. Bununla yanaşı, istənilən layihədə sizinlə əməkdaşlıq etməyə hazıram. Gəlin, əl-ələ verib cəmiyyətimizi bu zərərli vərdişlərdən çəkindirək!

– “Addım”ın bundan sonrakı layihəsi nə olacaq?

– Növbəti layihəmiz may ayında təqdim olunacaq. Bu haqda hələlik açıqlama vermək istəmirəm. Sadəcə onu deyə bilərəm ki, yay aylarında yaradıcı gənclərlə böyük işlər görəcəyik.

Ümidə Həsənli

Baku Post.-2013.-24 aprel.-S.10.