ASAIF-çilər yeni hədəflərə doğru

Səmimi atmosfer, pafosdan uzaq çıxışlar, 90%-i gənclərdən, özü də xaricdə təhsil alanlardan ibarət auditoriya... ASAIF-in bu ilki Yay Forumu məmurların maraqlı açıqlamaları, gənclərin iddialı sorğuları, 700-dən çox iştirakçının fəallığı, gənclərin vətənpərvərliklə bağlı mesajları və digər məqamlarına görə seçilirdi.

ASAIF-in komandası Bakıdakı “Fairmont Hotel”də keçirilən XI Yay Forumuna fərqlilik qatmağa çalışmışdı. Məsələn, ilk dəfə idi ki, belə iri tədbirdə gənclər Azərbaycan dövlət himnini musiqi müşayiəti olmadan canlı oxudular.

Forumun açılışında həm moderator, həm də məmurlar özləri ilə bağlı maraqlı faktlar açıqladı. ASAIF sədri Ramin Həkimov özünün təqdimatında çəkinmədən son günlər barəsində sosial şəbəkələrdə gedən roliklərə işarə etdi. Təhsil naziri Mikayıl Cabbarov isə vaxtilə “tanışlıqla” qiymət yazmaqdan imtina etdiyinə görə universitetdə müəllim işləyə bilmədiyindən danışdı.

Güc birlikdədir!

ASAIF-in sədri R.Həkimov forumun 750-dən çox iştirakçısını salamlayaraq rəhbərlik etdiyi bu qurumun onun üçün nə anlama gəldiyini açıqladı: “ASAIF böyük bir dəyər, böyük bir birlikdir. Bu, milli-mənəvi dəyərlərə sadiqlik, Azərbaycanın təmsilçiliyidir”. O, etiraf etdi ki, bəzən ASAIF ailəsi üzvləri arasında küskünlük də yaşanır. Amma sədr hər kəsi bütün umu-küsüləri unudub təşkilatın tarixində yeni bir mərhələnin başlanğıcına ayaq basmağa çağırdı.

Forumun fəxri qonaqlarından olan təhsil naziri Mikayıl Cabbarov xaricdə təhsil üzrə dövlət proqramının uğurlarından söz açdı: “Əgər bu gün bizim tələbələr dünya üzrə nüfuzlu ali məktəblərdə rəqabətə davamlı təhsil alırsa, Azərbaycan həqiqətlərinin bütün dünyaya çatdırılması üçün vacib işlər görürlərsə, deməli, gələcəyə düzgün sərmayə qoyuruq. Hazırda əsas prioritet məsələ bu gənclərin imkanlarından mümkün qədər faydalanmaq, potensiallarından istifadə olunmasına çalışmaqdır”. Nazir qeyd etdi ki, müxtəlif ölkələrdə dövlət proqramı üzrə yox, öz hesabına təhsil alan azərbaycanlı tələbələrin sayı çoxdur və onların da potensialından istifadə olunmalıdır.

Dövlət proqramına tələb

Nazir xaricdə təhsil üzrə dövlət proqramına müraciətlərin araşdırılması zamanı bəzi maraqlı məqamların da üzə çıxdığını bildirdi. Məsələn, hansısa gənc İspaniyada təhsil seçimini Barselonanın futbol komandasına olan sevgisi ilə izhar edir. Bəzisi isə seçiminin valideynləri tərəfindən qəbul olduğunu deyir: “Barselonanı mən də bəyənirəm. Amma müsahibə zamanı bu, seçim üçün əsas göstərilə bilməz. Gənclər bilməlidir ki, seçimi valideynlərinin etdiyini demək, onlar üçün artıq mənfi xüsusiyyət kimi qiymətləndirilir. Bu proqrama pulsuz nahar kimi yanaşmasınlar. Bu, əsl bilik, vətəndaşlıq yarışmasıdır və yerləri ən layiqlilər qazanmalıdır”.

Müstəqillik banisini unutmayaq

Ağsaqqallar Şurasının sədri, millət vəkili Fəttah Heydərov öz çıxışında müstəqillik tarixi haqqında gənclərə məlumat verdi. Azərbaycanın indiki uğurlarına görə Ulu öndər Heydər Əliyevə borclu olduğunu xatırladan millət vəkili hər kəsin öz tarixinə hörmətlə yanaşmasını tövsiyə etdi. F.Heydərov forum iştirakçılarına uğurlar, gələcəkdə daha böyük nailiyyətlər arzuladı.

Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov gənclərə “daha güclü Azərbaycanın qurucuları” qismində xitab etdi. Onun sözlərinə görə, bugünkü Azərbaycan gəncliyi, o cümlədən ASAIF üzvləri XXI əsrdə Azərbaycanın yeni üfüqlərə, yeni gələcəyə, yeni nailiyyətlərə aparacaq böyük bir ordusudur: “Prezident İlham Əliyev “qara qızılın insan kapitalına çevrilməsi”nə, xüsusilə yüksək elmi biliklərə malik yeni kreativ nəsil gənclərin formalaşmasına xüsusi önəm verir. Çoxlarınızın təhsil aldığınız bu proqram uğurla davam etdirilir və təhsil almağa göndərilən tələbələrin sayı ildən-ilə artır”.

Gələcəyin lobbi nümayəndələri

E.Aslanov bildirdi ki, əgər xaricdə təhsil alan tələbələr elə həmin ölkədə qalıb işləmək istəsələr belə, bu, Azərbaycana fayda gətirəcək: “Biz yenə də yatırılan investisiyanı itirmirik, əksinə onların simasında Azərbaycanın gələcək lobbi nümayəndələrini qazanmış oluruq. Bu isə Azərbaycana yeni təbliğat imkanları verir, onun “mülayim güc” (soft-power) imkanlarını genişləndirir. Onlar Azərbaycan haqqında məlumatların yayılması işinə töhfə verə bilər. Bunun üçün elmi tədbirlərdə fəal iştirak etmək, Azərbaycanla bağlı müxtəlif mövzularda çıxış etmək, elmi məqalələr və əsərlər yazmaq lazımdır”.

E.Aslanov çıxışı zamanı onu da vurğuladı ki, demokratiya insanların şüurlarında, fikirlərində formalaşmalıdır.

Vətəndaş olmaq borcu

Dövlət Neft Fondunun icraçı direktoru Şahmar Mövsümov da çıxışında zarafatdan yan keçmədi. Hər kəsə onun sözlərini diqqətlə dinləməyi tövsiyə etdi, əks təqdirdə gənclərin xaricdə təhsil üçün maliyyə vəsaitindən məhrum olacaqlarını bildirdi. Ş.Mövsümov xaricdə təhsil üzrə dövlət proqramının önəmindən, seçilən tələbələrin uğurundan danışdı: “Yaxşı insan, layiqli tələbə olmaq azdır, həm də yaxşı vətəndaş olmağa, Azərbaycan naminə gücümüzü birləşdirməyə çalışmalıyıq”.

Rəsmi açılış başa çatdıqdan sonra forum iştirakçıları öz suallarını birbaşa məmurlara ünvanladı.Forum iştirakçıları həmçinin Təhsil Nazirliyinin keçirdiyi sorğuya da qatıldı. Onlar “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” barədə öz təklif və arzularını bildirdilər. Anonim sorğu nəticəsində nazirliyin ünvanında təkliflər paketi hazırlanacaq.

ASAIF-in XI Yay Forumu bu gün və sabah işini davam etdirəcək. Tədbirin ikinci günündə “Azərbaycanın tolerantlıq mərkəzi kimi dünyada təbliği”, həmçinin “Azərbaycanda gənclər üçün yeni imkanlar” mövzusunda müzakirələr təşkil olunacaq. Bu panel sessiyalarda millət vəkili Ceyhun Osmanlı, Prezident yanında Gənclər Fondunun icraçı direktoru Fərhad Hacıyev, İqtisadi İnkişaf Nazirliyinin Sahibkarlığa Yardım Milli Fondunun icraçı direktoru Şirzad Abdullayev, Dini Qurumlarla İş üzrə Dövlət Komitəsinin sədri Elşad İskəndərov və digərləri iştirak edəcək.

Fərəh Sabirqızı

BakuPost.-2013.-31avqust. - S.11.