Dövlət qulluqçuları seçilir

Dövlət qulluğuna qəbulla bağlı növbəti müsabiqənin ilk mərhələsi keçirilir. Namizədlərin əksəriyyəti yenə gənclərdir. Tətbiq olunan yeniliyə görə, imtahanda iştirak edən namizədlər hansı suala düz, yaxud səhv cavab verdiyini dərhal öyrənə bilir. Bundan başqa, vətəndaşlara komissiyanın saytında test imtahanlarını “online” şəkildə izləmək imkanı yaradılıb. Prezident yanında Dövlət Qulluğu Məsələləri üzrə Komissiyanın sədri Bəhram Xəlilovun “New Baku Post”a müsahibəsi də imtahan qayğılarına həsr olunub.

– Bu müsabiqəyə nə qədər vakant vəzifə çıxarılıb?

– Dövlət Qulluğu Məsələləri üzrə Komissiya oktyabr və noyabr aylarında 4 elan verib. Həmin elanlarda 99 dövlət orqanı üzrə 1046 vakansiya müsabiqəyə çıxarılıb. Artıq müsabiqənin 1-ci mərhələsi başlanılıb. Bu, test imtahanlarıdır. Bu günə kimi 7 dövlət orqanı üzrə test imtahanlarını başa çatdırmışıq. Artıq həmin dövlət orqanları üçün 2-ci mərhələyə, yəni müsahibələrin keçirilməsinə başlayacağıq. Elan etdiyimiz müsabiqələrdə iştirak edən dövlət orqanlarının və vakant vəzifələrin sayı artır. Eyni zamanda müsabiqələrdə iştirak edən gənclərin də sayında artım var. Bu bir daha təsdiqləyir ki, dövlət qulluğuna müsabiqə prosesi şəffaf və obyektiv keçirilir.

Bu müsabiqədən başlayaraq vətəndaşlar test imtahanlarını “online” izləyə bilər. Yeniliklərimiz də var. Namizədlər artıq test imtahanı verən kimi dərhal arayış alır və həmin arayışla kompüterin monitorunda cavablarını yoxlaya bilir. Bunu ona görə tətbiq edirik ki, test mərhələsi nəticələrinin tam obyektivliyinə əminlik yaransın. Çünki namizədlərin biliklərini komissiya obyektiv qiymətləndirir.

– Müraciətlər baxımından, üstünlük yenə gənclərdədir?

– Gənclərin dövlət qulluğuna cəlb edilməsi cənab Prezidentin həyata keçirdiyi siyasətin bir istiqamətidir. Bu proses uğurlu gedir. Komissiya vasitəsilə dövlət qulluğuna qəbul olan şəxslərin 80%-i gənclərdir. Əsasən də ali məktəbləri son 1-2 ildə bitirənlərin müraciəti daha çoxdur. Amma burada da müəyyən problemlər var. Bəzi ali təhsil müəssisələri məzunlarına diplomların verilməsi gecikdirilir. Hətta bir neçə ali təhsil müəssisələri var ki, bu il məzun olanlara hələ diplom verməyib. Düzdür, biz onlar üçün şərait yaradırıq. Onlar “online” şəkildə qeydiyyatdan keçəndə hansı ali təhsil müəssisəsini bitirdiklərini göstərir. Biz bu məlumatı yoxlayırıq və diplomlarını təqdim etmədən namizədləri həm birinci, həm də ikinci mərhələyə buraxırıq. Əlbəttə, bu, formal xarakter daşıyır. Çünki dövlət qulluğunda inzibati vəzifəni tutmağa iddiası olan şəxsin ali təhsili olmalıdır. Bu təhsili isə yalnız diplom təsdiq edə bilər.

– Daha çox hansı sahələrə maraq var?

– Əmlak Məsələləri üzrə Dövlət Komitəsi müsabiqəyə 143 yer çıxarıb. Əmək və Əhalinin Sosial Müdafiəsi Nazirliyi 77, Statistika Komitəsi 73, Gənclər və İdman Nazirliyi 70 vakant yer təqdim edib. Elə dövlət orqanları da var ki, bir-iki vakant vəzifə çıxarır. Komissiya fəaliyyətə başlayandan gəncləri ən çox İqtisadi İnkişaf Nazirliyinə qəbul eləmişik. Onlar bizimlə səmərəli əməkdaşlıq edir. Ümumiyyətlə, seçim əməkdaşlıq, qarşılıqlı maraq əsasında həyata keçirilir. Dövlət orqanlarının bilikli, ixtisaslı, şəxsi keyfiyyətləri yüksək olan kadrlara ehtiyac var. Komissiyanın da əsas işi odur ki, dövlət qulluğuna layiqlilər seçilsin.

– İlin yekununu necə dəyərləndirə bilərsiniz?

– Bu il ərzində 2 müsabiqə elan olunub. Birinci müsabiqədə 101 dövlət orqanı üzrə1227, 2-ci müsabiqədə isə 94 dövlət orqanı üzrə 1005 vakant vəzifə çıxarıb. Ümumilikdə, 2013-cü il üzrə 957 namizəd uğur qazanıb. Komissiyanın fəaliyyətində əsas məqsəd vətəndaşlarda dövlət qulluğuna, dövlət orqanlarına etimadın yaradılmasıdır. Əvvəllər işə necə qəbul olunurdular? Fərqli meyarlarla. Kimsə tanışlıqla, kimsə başqa yollarla. Artıq hamı bilir ki, ən layiqli dövlət qulluqçusu müsabiqə yolu ilə seçiləcək. Hər şey namizədin özündən asılıdır. İmtahanı da özü verir, müsahibədən də şəxsi keyfiyyətlərinə və biliklərinə görə keçə bilər. Müsahibələrdə də proqramdan kənar sual verilmir. Bu da obyektivliyin təmin olunması üçündür. Bəzən elə suallar verirdilər ki, onun nə həmin dövlət orqanına, nə də həmin vakant vəzifəyə aidiyyatı olmurdu. Biz bunları məhdudlaşdırmışıq. İxtisas üzrə müsahibə proqramları var. O proqramlar da internet səhifəmizdə açıqdır. Namizədlər fərdi qaydada hazırlaşa bilər. İxtisas üzrə namizədə bundan kənar heç bir sual verilməyəcək.

– Müsahibə mərhələsinin testlə olması fikirləri səsləndirilir. Belə bir təcrübə varmı?

– Bu fikirləri səsləndirənlərin ümumiyyətlə Dövlət qulluğuna seçimin necə aparılması haqqında təsəvvürü yoxdur. Namizədlər yalnız biliklərə deyil, şəxsi keyfiyyətlərə də sahib olmalıdır. Onlar sabah vəzifədə çalışanda xalqın qulluğunda durmalıdır. Burda təbii ki, həm şəxsi keyfiyyətlər, həm kollektivdə çalışmaq qabiliyyəti, liderlik, komanda qurmaq keyfiyyətləri, bir çox amillər nəzərə alınmalıdır. Bunları yalnız müsahibədə müəyyən etmək olar. Bəzən namizəd testdən çox yüksək bal toplayır, amma müsahibədən kəsilir. Çünki, onun həyata yanaşması, vəzifə tutmaq istəyinin pərdəarxası məqamları müsahibədə üzə çıxır. Xarici ölkələrin analoji qurumlarında da belədir. Onlar namizədi nəinki 2 mərhələdə, hətta 4-5 mərhələdə, psixoloqların iştirakı ilə tanımağa çalışır. Şəxsi keyfiyyətlərində çatışmazlıq olan adamlar dahi belə olsa, dövlət orqanlarına qəbul edilmir.

Komissiyanın burda şəxsi marağı yoxdur. Burda dövlət marağı var. Dövlət marağı da tələb edir ki, dövlət qulluğuna saf, sağlam, bilikli, yüksək şəxsi keyfiyyətləri olan insanlar gəlsin. Bizim bu yolda fikrimiz qətidir. Hələ fikirləşirik ki, gələcəkdə müsahibəni yazılı imtahan şəklində tətbiq edək.

– Dövlət Qulluğu Məcəlləsinin hazırlanmasında işlər hansı mərhələdədir?

– Məcəlləni beynəlxalq layihə çərçivəsində bir qrup ekspert hazırlayıb. Onların ictimai dinləmələrini aparmışıq. Saytda da yerləşdirilib. Bu işə QHT-lər də cəlb olunub ki, təkliflərini versinlər. Sənədi bütün dövlət orqanlarına göndərmişik. Artıq təkliflər yığılıb. Bir hüquqşünas kimi deyim ki, Məcəllənin üzərində hələ çox iş aparılmalıdır. İndi biz yenə də ekspertlərə müraciət etmişik ki, məcəlləni boşluq olmadan yüksək səviyyədə, bütün dövlət qulluğu sahəsində yaranan münasibətləri tənzimləyən normalar çərçivəsində təmin etsinlər. Hesab edirəm ki, 2014- cü ilin birinci yarısının sonunda Məcəllə tam hazır olacaq.

Yaqut Tapdıqqızı

BakuPost.-2013.- 14 dekabr. - S.9.