“Polkovnikin xəzinəsi” hardadır?

“Azərbaycanfilm” kinostudiyasında Mədəniyyət və Turizm Nazirliyinin sifarişi ilə “Polkovnikin xəzinəsi” adlı yeni filmin istehsalına başlanılıb. Filmin ssenari müəllifi İlqar Fəhmi, rejissoru əməkdar incəsənət xadimi Fikrət Əliyevdir. Filmdəki əhvalatlar qocalar evində baş verir. Ekran əsəri real insanlar və hadisələr üzərində qurulub.

Lentin təbii alınması üçün rejissor hətta bir müddət qocalar evinin sakini olub. O deyir: “Mənə hər zaman qocalar evi maraqlı idi. Orada ömrünün son fəsillərini yaşayan insanlar, onların xarakteri və taleləri bir yaradıcı şəxs kimi məni düşündürürdü. Oradakı mühiti daha yaxşı duymaq üçün qocalar evinə getmək qərarına gəldim. Baş həkimdən başqa, kimsə mənim rejissor olduğumu bilmirdi. Hamı ilə bərabər yeyir, yatır və gəzirdim”.

F.Əliyev Bilgəhdəki qocalar evinin ən maraqlı insanlarını obrazlaşdıracaq. Ekran əsəri ironik-komediya janrında çəkiləcək: “Qocalar evindəki qeydlərimi gündəliyə yazdım. Burada yaşayan 180 ahılın hər birinin maraqlı və qəmli həyat hekayəti var. Əlbəttə ki, biz bunların hamısını bir filmə yerləşdirə bilməzdik. Əvvəlcə ssenari kədərli notlar üzərində faciə janrında yazıldı. Lakin Mədəniyyət və Turizm Nazirliyinin məsləhəti ilə ssenariyə komediya janrını gətirdik. Qərara aldıq ki, qocalığın yalnız kədərli anlarını yox, həm də komik məqamlarını üzə çıxaraq”.

Son dayanacaq

Filmin adı da qocalar evinin sakinlərindən birinə xitabən qoyulub. “Polkovnikin xəzinəsi” rejissorun burada tanış olduğu keçmiş polkovnikin kiçik hekayətini əks etdirir. F.Əliyev filmə əvvəlcə “Son dayanacaq” adını verib. Lakin kədərli səsləndiyindən filmin adı dəyişdirilib: “Ən dəhşətlisi budur ki, qocalar evindəki insanlar nə zamansa oradan çıxacaqlarına ümid edir. Lakin çoxları dünyasını orada dəyişir. Burada uzun illər sovet ordusunda xidmət edərək polkovnik rütbəsində istefaya çıxmış ahıl bir adam yaşayır. Ötən əsrin 90-cı illərində Bakıya dönüb. Xalis subay polkovnik Bakıda qohum-əqrəbası olmadığı üçün bir müddət tək yaşayıb, sonra isə qocalar evinə gəlib. Həmin polkovnik “qara günü” üçün pul yığıb və həmin pulları dolabda saxlayıb”.

F.Əliyev bir maraqlı faktı da açıqladı. Haqqında söhbət açılacaq qocalar evi 172 saylı marşrutun son dayanacağında yerləşir. Məhz bu səbəbdən də rejissor filmin adı üzərində yenidən düşünür.

Süjet xətti də yaşlı polkovnikin macərası üzərində qurulub. Lakin film boyu tamaşaçılar maraqlı xarakteri və taleyi olan digər insanlarla da tanış olacaq: “Qocalar evində bir çox sakinlər bir-biri ilə ailə həyatı qurur, heç olmasa, ömürlərinin son illərini tənha yaşamaq istəmir. Həmin polkovnikin də arzusu burada evlənmək olur. Filmin kulminasiya nöqtəsi polkovnikin pulunun itməsi ilə bağlıdır. Sən demə, o, pullarını təkcə paltar dolabında yox, samovarın içərisində də saxlayırmış. Zabit pul qoyduğu yeri unudur. Günlərin birində sakinlərlə bərabər samovar çayı içir və qəfildən pulların yerini xatırlayır...”.

Güldürən, ağladan, düşündürən lent

Rejissor deyir ki, hər kəs bu filmə baxıb özü üçün bir nəticə çıxaracaq. Kimisi güləcək, kimisi ağlayacaq, kimisi isə düşüncələrə qapılacaq. Yeni əsərin həmin qocalar evində də nümayişi nəzərdə tutulub: “Bayramların birini qocalarla bərabər keçirmişdim. Onların simasındakı kimsəsizlik hüznünü hələ də unuda bilmirəm. Bir müddət əvvəl həmin polkovnik dünyasını dəyişib. Kaş ona deyəydik ki, sənin həyatından film çəkiləcək”.

“Qocalar evi” kinostudiyanın pavilyonunda qurulacaq. Rejissor qocaları canlandıracaq aktyorların sürpriz olmasını istəyir. Lakin sınaq çəkilişlərində iştirak edəcək bir neçə aktyorun kimliyi artıq bəllidir. Belə ki, “Polkovnikin xəzinəsi”ndə xalq artistləri – Fuad Poladov, Arif Quliyev, Zemfira Nərimanova, Lətifə Əliyeva, Ağaxan Salmanlı, Cahangir Zeynalovla yanaşı, Murad Dadaşov, Qorxmaz Əlili də əsas rolları ifa edə bilər. F.Əliyev yeni ekranlaşdırılacaq filmin tamaşaçılar tərəfindən maraqla qarşılanacağına əmindir: “Bu film üçün şüar seçmişəm: ən yaxşı artist – artistlik etməyəndir! Bu bütün aktyorlara ilk şərtimdir”.

Əməkdar incəsənət xadimi köhnə filmlərin indiyədək maraqla baxılması səbəbini də açıqladı. Rejissor aktyorların rolu özününküləşdirməyi əsas şərt hesab edir: “O vaxt sənətkarlıq məktəbi vardı – Rza Təhmasib, Adil İsgəndərov, Ələsgər Ələkbərov kimi sənətkarları örnək bilirdik. İndi isə Mədəniyyət və İncəsənət Universitetini bitirənlər artıq özlərini peşəkar hesab edir. İndiki filmlərdə süniliyin səbəblərindən biri də aktyor və rejissorların təkəbbürlüyü və özündən razı olmasıdır”.

Ümidə Həsənli

BakuPost.- 2013.- 10 iyul.- S.10.