Həmyerlimiz “Günəş sirki”ndə

Sirk ustası Araz Həmzəyev xarici ölkələrdə “Sümüksüz oğlan”, “İlan-adam” ləqəbi ilə məşhurlaşıb

Azərbaycanlı sirk ustası Araz Həmzəyev dünyanın bir nömrəli sirki sayılan, Kanadanın Cirque du Soleil (“Günəş sirki”) sirkinin Las-Veqasdakı proqramına dəvət alıb. Baş ofisi Kanadanın Monreal şəhərində yerləşən Cirque du Soleil, dünyada analoqu olmayan nəhəng bir sirk korporasiyasıdır. Bu sirkin hər bir proqramı üzərində böyük yaradıcı qrup çalışır, sirk artistləri, rejissorlar, xoreoqraflar, geyim və qrim ustaları, səs rejissorları və başqa sənət sahibləri bir araya gələrək, maraqlı süjetə malik baxımlı, rəngarəng, qeyri-adi tamaşalar yaradır. Əsası 1984-cü ildə qoyulan Cirque du Soleil sirkinin tamaşaları dünyanın 280-dən artıq şəhərində nümayiş edilib. Hazırda “Günəş sirki”ndə 40 fərqli millətə mənsub 4 min adam çalışır.

26 yaşlı Araz Həmzəyev uşaq yaşlarından sirkdə çıxış etməyə başlayıb, gərgin məşqlər sayəsində öz bədəninin yüksək dərəcədə elastikliyinə və çevikliyinə nail olub. Xarici ölkələrdə “Sümüksüz oğlan”, “İlan-adam” ləqəbi ilə məşhurlaşmış Araz, son 15 il ərzində Avropanın ən məşhur sirklərinin – İtaliyanın “Medrano”, “Circo Embel Riva”, “Lidia Togni”, “Rony Roller”, “Circo di Francia”, “Circo di Mosca”, “Bellucci”, İspaniyanın “Raluy”, Norveç Krallığının “Arnardo”, Finlandiyanin “Sirkus Finlandia” və digər bu kimi sirklərinin heyətində uğurla çıxış edib.

Arazın istedadı teatr rejissorlarının da diqqətindən yayınmayıb. 2001-ci ildə məşhur İtaliya rejissoru Romeo Kastelluçi onu hazırladığı “Genezis” tamaşasına dəvət edib. Tamaşa Moskvada, Çexov adına IV Beynəlxalq teatr festivalında uğurla nümayiş olunduqdan sonra, Los-Anceles, Melburn, Pert, Honq Konq, Seul şəhərlərində də göstərilib. A.Həmzəyev bu il İjevskdə keçirilən festivalda uğurlu çıxışından sonra Fransanın Sen-Pol-le-Daks (Saint-Paul-les-Dax) şəhərində keçiriləcək beynəlxalq sirk festivalına, eləcə də dekabr ayında Almanyanin “Circus Flic Flac” sirkinə dəvət alıb.

BakuPost.- 2013.- 13 iyul.- S.10.