Hərbçi müğənni

Müdafiə Nazirliyinin Nəfəsli Alətlər Nümunəvi Orkestrinin solisti, Xalq artisti Zümrüd Məmmədova bu gün Silahlı Qüvvələr Gününü əsgərlər qarşısında qeyd edəcək. O, “New Baku Post”a müsahibəsində yeni disk üzərində çalışdığını da açıqladı. Vətənpərvərlik mahnıların mahir ifaçısı 2009-cu ildə Müdafiə Nazirliyi tərəfindən “İşində qüsursuz xidmətinə görə” medalı ilə təltif olunub. Xalq artisti, həmçinin Mədəniyyət və İncəsənət Universiteti və İncəsənət Gimnaziyasında muğamdan dərs deyir. Prezident təqaüdçüsüdür.

– Bir çox qadın müğənnilərdən fərqli bir yol tutmusunuz. Müdafiə Nazirliyinin Orkestrinə necə gəldiniz?

– Bəstəkar Sevda Həmidqızının “Əsgər marşı” mahnısını ifa etdikdən sonra məni hərbi orkestrə solist kimi işə götürdülər. Bu mahnı dillər əzbəridir. Əvvəlcə dedilər ki, bu mahnını kişi müğənni oxusa yaxşı olar. Tərəddüdüm xeyli sürdü, ancaq oxumağa qərar verdim və səsyazma studiyasında bildirdilər ki, bu mahnı hərbi orkestrin nəfəsli alətləri ilə çalınsa, daha əzəmətli səslənər. Professor, Xalq artisti, Müdafiə Nazirliyinin Hərbi Orkestr xidmətinin rəisi, baş Hərbi dirijor və polkovnik Yusif Axundzadəyə müraciət etdik, mahnını dinləyib bəyəndi və məşqlər başladı. Sonra Yusif müəllim mənə orkestrin solisti olmağı təklif etdi. O vaxtadək həm Filarmoniyanın, həm də “Azkonsert” Birliyinin solisti idim. Hərbi rütbəm var. Bir hərbçi kimi hər zaman cəbhəyə getməyə hazıram. Vətənpərvərlik mövzusunda yazılmış mahnılar yaradıcılığımda üstünlük təşkil edir. Bir Xalq artisti kimi Prezident təqaüdçüsü olmağım da məni daim ruhlandırır.

– Cəbhə bölgəsində çıxışlarınız zamanı unutmadığınız hadisələr yəqin ki, çoxdur...

– Cəbhə bölgəsinə gedib əsgərlər qarşısında konsert verməyimi heç vaxt reklam etmirəm, bu çıxışlar heç kameraya da çəkilmir. İstənilən vaxt hər hansı hərbi hissəyə getməyə hazıram. Dəfələrlə təhlükəli məqamlarla qarşılaşmışam. Yaxşı yadımdadı, səngərlərin birində oxuyurdum, əsgərlər də tankların üstündə oturub mahnını dinləyirdi. Birdən ermənilər mövqeyimizi atəşə tutdu. Döyüşçülərimiz silaha sarıldı. Həyəcandan ürəyim getdi. Ayıldım ki, hospitaldayam. Sonra atəş səslərinə alışdım. Elə anlar olub ki, ifa zamanı başımın üstündən güllələr vıyıltı ilə keçib, amma konserti dayandırmamışam. Əksinə, döyüşçülərimizə ürək-dirək vermişəm, onları mahnılarımla ruhlandırmışam.

– Sizcə, müğənnilər əsgərlər qarşısında çıxış üçün kifayət qədər vaxt ayırırmı?

– Gedənlər sağ olsun, getməyənlər özü bilər, heç kimi məcbur etmək olmaz. Bu istək daxildən gəlməlidir. Konsertdə döyüşçülər qarşısında özümü bir müğənni kimi yox, ana, böyük bacı kimi aparıram. Səngərdə günlərlə keşik çəkən igidlərimizin məhz ana nəvazişinə, bacı qayğısına böyük ehtiyacı var. Hər bir müğənninin səngərə gəlib mahnı oxumağı onlara böyük mənəvi qidadır, ruh yüksəkliyinin artması deməkdir. Biz sənətçilər Vətənimizin keşiyində duran bu qəhrəmanlar üçün əlimizdən gələni əsirgəməməliyik. Fəxr edirəm ki, məndən çox əsgərlər qarşısında çıxış edən qadın müğənni yoxdur. Hiss edirəm ki, vətənpərvər mahnılar onları ruhlandırır, sanki cəngavərə dönürlər.

– Vətənpərvərlik mövzusunda yazılmış mahnılar sizi qane edirmi?

– Bu mahnılar efirlərdən kifayət qədər səslənmir. Əvvəllər belə əsərlər az yazılırdı. İndi vəziyyət getdikcə dəyişir. Amma yenə də hərbi mövzuda olan mahnıların qıtlığını hiss edirəm. Hər zaman muğam ifaçısı olmuşam. Sonradan bu sahəyə gələndə həmkarlarımın çoxu mənə dedi ki, “işin-gücün qurtarıb, gedib hərbi orkestrlə oxuyacaqsan?!”. Hətta rejissorlar ancaq hərbi mahnılar oxuduğuma görə məni televerilişlərə çağırmırdılar. Telekanallara ancaq hərblə bağlı günlərdə hazırlanan xüsusi verilişlərə dəvət edirdilər. Onda gördülər ki, repertuarım zəngindir. Müğənnilər indi ayılıb, çoxları reklam naminə vətənpərvər mahnılar oxuyur. Ancaq mən bu əsərləri efir xatirinə ifa etmirəm. Şən mahnılar da oxumaq lazımdır, lakin Vətən sevgisini tərənnüm edən bəstələr öndə durmalıdır.

– Solo konsert proqramı ilə çıxış etmək fikriniz var?

– 1976-cı ildən bütün dünyanı gəzmişəm, konsert proqramları ilə çıxış etmişəm. 1991-ci ildən Nəfəsli Alətlər Nümunəvi Orkestrinin solisti kimi cəbhə bölgələrində konsertlər vermişəm. Hətta istirahətə vaxtım olmayıb. Kömək olmasa, solo konsert hazırlamaq mümkün deyil. 40-50 minə başa gələn konsert xərclərini mən necə ödəyim? Yeni qastrol səfərimiz planlaşdırılır. Qızım İlahə Qismətin bəstələdiyi “Müqəddəs Vətən”, Rauf Məmmədovun “Qalx ayağa millətim”, eləcə də muğam dəsgahları üzərində işləyirəm. Çox sayda diskim var. Hazırladığım yeni disk isə məhəbbət mövzusundadır. Gələcəkdə qızımın silsilə mahnılarını ifa edəcəm. Hazırda o, Bakı Musiqi Akademiyasında məşhur bəstəkar Arif Məlikovun tələbəsidir.

– İndi bir çox müğənnilər kimi, Siz də toylara gedirsinizmi?

– Gəncliyimdə qadın toylarına getmişəm. Uzun illərdir ki, bu işdən uzağam. Ruzimi Allah yetirir, nazirlikdən, universitetdən maaş alıram, Prezident təqaüdçüsü, Xalq artisti kimi aldığım pul məni qane edir. Toylara isə yalnız qonaq kimi gedirəm, xahiş edəndə oxuyuram.

Ümidə Həsənli

BakuPost.- 2013.- 26 iyun.- S.10.