Kamilliyin təntənəsi

Eldar Xankişi oğlu İsmayılov. 1948-ci il yanvarın 9-da anadan olub. Azərbaycan Dövlət Universitetinin jurnalistika fakültəsini bitirib. Yazıları respublika və İttifaq mətbu orqanlarında dərc edilib. Azərbaycan və SSRİ Jurnalistlər İttifaqının üzvü olub. Azərbaycan Dövlət Televiziya və Radio Verilişləri Komitəsinin Dağlıq Qarabağ və ətraf rayonları üzrə xüsusi müxbiri olub. Qarabağ müharibəsi veteranıdır. Azərbaycan İdman Jurnalistləri Assosiasiyasının (AİJA) prezidenti, MOK-un və Avropa İdman Mətbuatı İttifaqı İcraiyyə Komitəsinin üzvüdür. Azərbaycan Respublikasının Prezidenti İlham Əliyevin 5 noyabr 2012-ci il tarixli Sərəncamı ilə “Əməkdar jurnalist” fəxri adına layiq görülüb.

İlk yazının tarixçəsi

Onu yaxından tanıyanlardan biri ilə söhbətdə öyrənmişdim ki, bacarıqlı jurnalist olmaqla yanaşı, həm də maraqlı şeir və hekayələr müəllifidir. Bir başqasından isə eşitmişdim ki, həm də rəssamlığı var. Bənzərsiz fotoları barədə də məlumatlı idim. Görüşümüz zamanı beynimdə dolaşan da, ilk növbədə, bu gün 65 yaşını qeyd edən E.İsmayılovla bağlı deyilənlərin həqiqət olub-olmamasını dəqiqləşdirmək idi:

– Ədəbiyyata, rəssamlığa uşaq yaşlarından maraq göstərmişəm. O vaxtlar “Hüsnxətt” deyilən fənn tədris olunurdu. Xəttimin gözəlliyindən danışmaqdan yorulmayan müəllimim deyirdi ki, ola bilməz ki, sənin rəsm çəkmək qabiliyyətin olmasın. Sonralar məktəbin divar qəzetinin bütün karikatura, illüstrasiya və rəsmlərini mən çəkirdim. Musiqiyə də həvəsim olub, Üzeyir Hacıbəyli adına Ağdam Orta İxtisas Musiqi Məktəbində təhsil almış, bir müddət şəhər 2 №-li beynəlmiləl orta məktəbdə rəsm və musiqi müəllimi işləmişəm. Yerli qəzetdə çalışdığım illərdə isə redaksiyanın nəzdindəki “Gənc qələmlər” ədəbi birliyinin fəal üzvlərindən sayılmışam, amma aparıcı xətti jurnalistika təşkil edib.

İlk yazısının maraqlı tarixçəsi var – onda 7-8 yaşında olub. Qadınlar bayramı ərəfəsində “Pionerskaya pravda” qəzetinə bu məzmunda məktub göndərir: “Mən əlaçıyam. Ancaq müəllim dünən mənə “4” verdi. Çünki cümlənin içində “ana” sözünü böyük hərflə yazmışdım. Bəli, mən qrammatik səhvə yol vermişdim, amma bunu bilərəkdən etmişdim – ana böyüklüyü qarşısında, anaya olan sonsuz sevgi və ehtiram naminə! Hörmətli redaksiya, olmazmı ki, dilçilər elə etsinlər ki, “ana” kəlməsinin böyük hərflə yazılması səhv sayılmasın?” Yazı qəzetin “8 Mart” nömrəsinin birinci səhifəsində dərc olunur.

AİJA səhifəsi

Qəzetdə işləyərkən yazılarına lazım olan fotoları, illüstrasiya və rəsmləri həmişə özü çəkib:

– Çalışırdım ki, hər şey yazının ruhuna uyğun olsun. Ancaq mənə, daha dəqiq desək, fotomüxbirlərə fotoqraf gözü ilə baxılmasını qəbul etmirdim. Diplom işimdə də bu məsələyə toxunmuşdum və professor-müəllim heyəti yanaşma tərzimi təqdir etmişdi. Mətləbdən uzaqlaşmayaq, işimin bəyənilməsinin nəticəsi idi ki, əlamətdar günlərlə bağlı hətta siyasi motivli illüstrasiya və rəsmləri çəkməyi də mənə həvalə edirdilər. Televiziya fəaliyyətimdə də həm ssenarini yazır, həm materialı səsləndirir, həm də müvafiq çəkilişləri aparırdım. Dağlıq Qarabağ üzrə xüsusi müxbir işləyərkən bu universallıq daha əhəmiyyətli idi, çünki döyüş bölgəsindən aktual və operativ teleproqramların, radio verilişlərin, informasiyaların respublika efirinə vaxtında çatdırılması çox vacibdi...

E.İsmayılovun ciddi məşğul olduğu sahələrdən biri idmandır. Hələ məktəbli ikən samboya həvəs göstərir. Tale elə gətirir ki, bu növün yaradıcılarından sayılan Anatoli Xarlampiyevlə görüşür, onun məsləhət və tövsiyələrini alır.

İdman jurnalistikası ilə bilavasitə məşğul olmasa da, bədən tərbiyəsi və idman mövzusunu fəaliyyətinin əsas qayələrindən hesab edir:

– İdmanı çox sevirəm. Bəlkə buna görə tale məni sevdiyim iki sahənin vəhdəti olan təşkilata gətirdi. 1995-ci il idi. Gənclər və İdman Nazirliyində AİJA-nın təsis konfransı keçirilirdi. İdman ictimaiyyətinin öncül nümayəndələrinin, mütəxəssislərin iştirak etdiyi yığıncaqda yeni qurumun prezidenti seçildim. Qısa müddətdə təşkilatın müvafiq Avropa və dünya idman mətbuatı birliklərinə üzvlük məsələsi həll edildi. Təbii ki, bununla kifayətlənmək olmazdı, idman ölkəsi kimi tanınan Azərbaycanın idman yazarlarının cəmləşdiyi qurum daha da irəli getməli idi ki, ona da nail olundu. Bu gün ölkənin ən qabaqcıl, çevik və ən peşəkar jurnalist təşkilatlarından sayılan AİJA, üzvü olduğu beynəlxalq qurumların da öncülləri sırasındadır.

“Əməkdar jurnalist” adına layiq görülməsini 65 illik yubileyinə ən böyük hədiyyə sayan E.İsmayılov bunu həm də ümumilikdə idman jurnalistlərinin işinə verilən qiymət kimi dəyərləndirdi:

– Digər sahələrdə olduğu kimi, Azərbaycanda idmanla bağlı da görülən işlər göz qabağındadır. Ölkə başçısı İlham Əliyevin idmançılara, mütəxəssislərə yaratdığı ideal şəraitin müqabilində jurnalistlərin də borcu olanları ictimaiyyətə çatdırmaqdır – həm bir vətəndaş, həm də bir peşəkar kimi. Peşə fəaliyyətimizi belə yüksək qiymətləndirmək, ona dəyər vermək isə böyüklük nişanəsidir. Elə bir böyüklük ki, bizi daha məhsuldar və daha məsuliyyətli olmağa çağırır...

Tofiq Vəziroğlu

Baku Post.-2013.-9 yanvar.-S.9.