Ən yüksək səviyyə

Azərbaycan və Türkiyə münasibətlərini, qarşıdakı perspektivləri Azərbaycanın Türkiyədəki fövqəladə və səlahiyyətli səfiri Faiq Bağırov “New Baku Post”a şərh edir:

– Azərbaycan və Türkiyə arasındakı münasibətlər indi hansı dövrünü yaşayır?

– Azərbaycan və Türkiyə iki dost, qardaş ölkədir. Hazırda Azərbaycan və Türkiyə arasındakı münasibətlərin ən yüksək səviyyədə olduğunu müşahidə edirik. Yüksək Səviyyəli Strateji Əməkdaşlıq Şurasının toplantılarının keçirilməsi və bu şuraların toplantılarında çoxlu sayda nazirlərin, hökumət üzvlərinin iştirakı onu göstərir ki, Azərbaycan və Türkiyə arasında strateji tərəfdaşlıq əlaqələri hər sahədə inkişaf edir və bunu biz önümüzdəki dövrdə də müşahidə edəcəyik. Çünki bizim əməkdaşlığımız istər siyasi, istər iqtisadi, mədəni və elmi sahələrdə yüksək səviyyədə inkişaf edir.

– İqtisadi sahədə qarşıda hansı planlar var?

– Hər sahədə olduğu kimi iqtisadi sahəyə də öncəlik verilir. Azərbaycanı Türkiyə ilə bağlayan Bakı-Tiflis-Ceyhan, Bakı-Tiflis- Ərzurum və Bakı-Tiflis-Qars dəmiryol layihələri iqtisadi sahədə əməkdaşlığımızın ən yüksək səviyyədə olduğunu sübut edir. Əlavə olaraq enerji sahəsində olan əməkdaşlığımızı söyləmək olar. Trans Anadolu boru xəttinin çəkilməsi istiqamətində dövlətlərarası saziş imzalanıb. Söyləmək olar ki, Azərbaycan və Türkiyə arasında əməkdaşlıq daha da inkişaf edəcək. Hazırda Azərbaycan Türkiyədə ən çox sərmayə qoyan ölkələr sırasındadır. Bununla biz fəxr edirik. Çünki dəfələrlə ölkə rəhbərliyinin söylədiyi kimi, Azərbaycanın imkanları get-gedə artır, öz imkanını qardaş, dost ölkələrlə paylaşmağa hazırdır. Bunun bariz nümunəsini biz Türkiyədə görürük.

– TANAP 2 ölkənin birgə layihəsidir. Bunun strateji əhəmiyyətini necə qiymətləndirirsiniz?

– Bunun əhəmiyyəti çox böyükdür. Təşəbbüskar Azərbaycan və Türkiyədir. Başqa iştirakçılar bu layihədə yoxdur. Bu, həm Azərbaycana, həm Türkiyəyə gələcəkdə böyük faydalar gətirə biləcək bir layihədir. TANAP Azərbaycanın zəngin qaz yataqlarına malik ölkə kimi öz qazını xarici ölkələrə, xüsusən Avropaya nəql edilməsinə imkan yaradacaq. Bununla da Azərbaycanın Qərb ölkələri, Avropanın enerji təhlükəsizliyini təmin etmək istiqamətində müəyyən addımın atılması öngörülür. Türkiyə tərəfi də bu layihə sayəsində nailiyyətlərə sahib olacaq. Ən önəmlisi Türkiyənin çoxsaylı insanları bu layihənin həyata keçirilməsində işlə təmin olunacaq. Türkiyə təbii qazın Avropaya nəql edilməsindən qazanc əldə edəcək. Qazın bir hissəsi Türkiyəyə satılacaq, bu da Türkiyə üçün böyük əhəmiyyətə malik layihədir.

– Türkiyədə çoxlu azərbaycanlı gənc təhsil alır. Səfirlik onlarla necə işləyir?

– Türkiyədə çoxlu bizim tələbələrimiz var. Azərbaycandan çoxsaylı tələbələr Türkiyədə təhsil alırlar. Tələbələrlə sıx əlaqəmiz var, müxtəlif tədbirlərimiz keçirilir, tədbirlərdə iştirak edirlər. Yenə də daha fəal və aktiv olmalıdırlar. Daha çox öz imkanlarından istifadə etməlidirlər. Təhsil aldıqları universitetlərdə digər ölkələrin tələbələri ilə ünsiyyət qurmalıdırlar. Tələbə təşkilatları ilə işgüzar əlaqələr yaratmalıdırlar. Biz də səfirlik və dövlət olaraq bizim tələbələrə dəstək olmağa hazırıq.

Tural Əliyev

Baku Post.-2013.-12 yanvar.-S.-6.