Mübariz Fərid
Yanvarın
21-i baş leytenant, şəhid Fərid Əhmədovun
doğum günüdür. Artıq 3-cü ildir ki, ailəsi
onun ad gününü Fəridsiz qeyd edir. Anası Nərgiz
xanım deyir ki, Fəridin ən böyük arzusu Milli Qəhrəman
Mübariz İbrahimovun meyidini düşməndə qoymamaq
olub. O, həqiqətən də Vətənə Mübarizlə
qayıdıb. Azərbaycan Prezidenti İlham Əliyev tərəfindən
“İgidliyə görə” medalı ilə təltif
olunmuş Fərid Əhmədov haqqında bilmədiklərimizi
ailəsindən öyrənirik. Nərgiz xanım deyir ki, 20
Yanvara görə heç vaxt Fəridin ad gününü təmtəraqla
qeyd etməyiblər. Heç də o, da bunu istəməyib.
– Fərid uşaqlığında
necə idi?
– O, balaca olanda Rusiyada
yaşamışıq – Saratovda.
Fəridin ağlı kəsən
vaxtı biz köçüb
gəldik Azərbaycana.
17 yaşında Ali Hərbi Məktəbə
qəbul oldu. Uşaqlıqdan çox qorxmaz
idi. Heç nədən qorxmazdı.
Qeyrət, vətənpərvərlik, iradə – hər şey var idi
onda. Uşaq vaxtından özünü
əsl kişi
kimi aparırdı. Davakar idi. İbadətlə də məşğul
olurdu.
Həm özü, həm
də atasi istəyirdi ki, hərbçi olsun. Atasını 2006-cı ildə itirmişik. O, hərbiyə
getməklə həm
özünün, həm
də atasının arzusunu yerinə yetirmiş oldu. Baş leytenant rütbəsi veriləndə Fərid həm də hərbi hissənin ən gənc kəşfiyyat komandiri idi. Bu vəzifə
ona veriləndə
general onun əlini sıxıb “sən əsl hərbiçisən”
demişdi.
– Döyüş
bölgəsinə nə
vaxt yollandı?
– Özü könüllü
ərizəsini yazıb
Gəncədən Tərtərə
– döyüş bölgəsinə
gedib. Mən bunu 1 il
3 aydan sonra öyrəndim. Sonradan öyrəndim ki, zabit yoldaşlarına deyirmiş ki, “mənim özümə maraqlıdır, gedim görüm, ermənilər
orada nə edir?”.
– Atacağı addım barədə heç sizə bildirmişdimi?
– Xeyr. Həmin vaxt Mübarizin
xəbəri gəlmişdi.
Biz rayonda tədbirdə
idik. Mən bu xəbəri
eşidəndə elə
ürəklə ağlayırdım
ki, elə bil öz balam
idi. Sən demə, mənim
balamı da eyni tale gözləyirmiş.
2010-cu il iyulun 15-18 arası o,3 günlük məzuniyyət götürüb
rayona – Cəlilabada gəldi. Mən Bakıda bacımgildə
idim. Eşitdim Fərid gələcək,
qayıtdım rayona.
Bu, onunla axırıncı
görüşümüz imiş... O qədər qəmli idi, gözü daim yol çəkirdi.
Soruşdum, niyə belə bikefsən, dedi işimiz ağırdı. Tutuldum, qayıtdı ki, Vətənə
xidmət borcumuzdur. Heç kimə bildirməmişdi
atacağı addımı.
Bizcə,
mən yanında olmayanda Fəridin qoca nənəsi var, ürəyini ona boşaldıb. Amma o, Fəridin niyyətini başa düşməyib.
Telefonunda Mübarizin şəklini
göstərib nənəsinə
deyib ki, “Nənə, tanıyırsan
bu oğlanı?
O əsl qəhrəmandır,
sənin nəvən qurtaracaq onu düşmən əlindən,
o şəhid olub. Nənə bir gün sənin nəvən də şəhid olacaq”...
Mübarizin düşmən əlində
qalması ona çox pis təsir edirdi. O çoxdan
planlaşdırırmış atacağı addımı.
Sonradan əsgər və zabit yoldaşlarından öyrəndim ki, tez-tez deyirmiş ki, “görəcəksiniz,
bax, bu oğul
gedib gətirəcək
Mübarizi”. Sonuncu zəngi
Ramazan ayı – Qədr gecəsi idi. Zəng vurdu, dedi, ana,
gözlə, sənə
sonra zəng edəcəm. Amma zəng vurmadı,
gözüm telefonda qaldı, bala. Axırıncı dəfə heç
doyunca danışa bilmədim. O öz canını sevə-sevə
qurban etdi Vətəninə. Vətənə bu dar gündə
belə oğullar lazımdır, qızım.
– Hansı arzusu var idi
ki, həyata keçirə bilmədi?
– Xeyirxah insan idi. Sevdiyi qız
var idi... Amma ən böyük
arzusu Mübarizi gətirmək idi və gedib gətirdi
də... Elə ən böyük
arzusu bu imiş, bu yolda
canından keçdi mənim Fəridim. Allah özü bilir
hansı oğulu necə aparır. Ölənlərin ən şərəflisi
şəhidlərdir. Görünür, Allah mənim oğlumu
bu məqama layiq görüb. Danışın, qızım. Mən həyatda olmayanda da danışın.
Belə igidlərin həyatı hər zaman örnəkdir. İndiki gənclər
nümunə götürməlidir
canını sevə-sevə
Vətənə qurban
verən belə qeyrətli igidlərdən.
Mübariz, Fərid kimilərin
qısa və şərəfli ömrü
hər kəsə örnəkdir. İndi Fərid
təkcə mənim deyil, Azərbaycan xalqının, elin balasıdır.
P.S.
Bacısı Əhmədova
Gülnar deyir ki, heç vaxt şeir yazmayıb. Ancaq bu şeiri qardaşı olmadan qeyd etdiyi ilk ad günündə yazıb.
O şeirdən bir bəndi ailəsinin istəyi ilə dərc edirik:
Unutmarıq heç vaxt səni
Çolaq olsun düşmən əli.
Yad edirik bu gün
səni
Heyf ki, özün olmadın!
Rövşanə Məmmədzadə
Baku Post.-2013.-19 yanvar.-S.-11.