Azadlıq ruhu

Qəhrəmanlığın əsl dəyəri təhlükələrin böyüklüyü ilə ölçülür.

Sağ qalmaq ehtimalının az olduğunu və ya heç olmadığını bilə-bilə millət yolunda, müqəddəs məfkurə uğrunda əzmlə, mətanətlə mübarizə aparanlar insanlığın yüksək mərtəbəsinə ucalırlar.

Bir gün şam kimi sönməyə məhkum olan bəşər övladı silinməz izlər qoymaq, şanlı işlər görmək imkanları ilə birlikdə göz açır fani dünyaya. Ruhunu, azacıq da olsa, maddiyyatdan ayırıb ömrünü millətinə həsr edən insanları tarixin şanlı səhifələrinə qızıl hərflərlə düşmək, könüllərdə taxt qurmaq kimi uca məqamlar gözləyir. Millətə xidmət bəşər övladını zirvələrə aparan ən etibarlı yoldur. Üstündən əsrlər, qərinələr ötsə də, o insanların adı, fədakarlığı yaddaşlarda təravətini itirməyəcək.

“20 Yanvar” qəhrəmanları qəlbimizdə sarsılmaz abidəyə çevrilib. Xalqın o gecəki “Azadlıq harayı” milləti millət edən milli diriliş ruhudur. O gecə dünya gördü ki, Azərbaycan milləti yıxılanda ayağa qalxmağı bacaran, əsarətə dözməyən, düşmənin istəyini gözündə qoyub, qəddini dikəldən millətdir.

Azadlıq inancımızla yoğrulan milli ruhumuzdur. Millətinin hürriyyətə qovuşması üçün toxumtək həyatını fəda edən uca qəhrəmanlar xalqın azadlıq abidələridir. Bir gecədə bir əsrlik tarix yazan şəhidlər əllərində dalğalanan, qürurla daşıdıqları üçrəngli bayrağımızla özləri də tarixiləşdilər. Əli silahsız oğul və qızlarımızın soyuq yanvar gecəsi axıdılan qanı şair qələmindən kəlmə-kəlmə, sətir-sətir kağız üzərinə köçdü:

Qatil gülləsinə qurban gedərkən,

Gözünü sabaha dikdi şəhidlər.

Üçrəngli bayrağı öz qanlarıyla

Vətən torpağına çəkdi şəhidlər.

O gecə bir tərəfdə şəhidlər xalqın gələcəyi uğrunda candan keçib azadlıq toxumları əkir, bir tərəfdə də uca Yaradan millətə yeni-yeni qəhrəmanlar bəxş edirdi. O gecə Azərbaycanda dünyaya göz açan körpələrin əksəriyyəti oğlan idi. O gecə əbədiyyətə qanad açan gənclərin yeri gələcəyin qəhrəmanları ilə dolurdu.

İstanbulda şəhərin fəthini təsvir edən “Panorama 1453 – tarix muzeyi” var. Üstündən illər keçsə də, o müqəddəs məkan olmuşları nəsildən-nəslə ötürür, yaddaşları korşalmağa qoymur. İçimdə bir arzu baş qaldırdı – tezliklə Bakıda “Panorama 20 Yanvar – tarix muzeyi” açılaydı…

Əziz şəhidlər, ruhunuz şad olsun!

Mustafa Saatçı

Baku Post.-2013.-19 yanvar.-S.-14.