«Ermənistanda istənilən hədəfi vurmağa imkanımız var»

Eldar Sabiroğlu: «Bu dəfəki müharibə daha faciəvi və dağıdıcı olacaq»

Beynəlxalq Böhran Qrupu fevralın 8-də “Ermənistan-Azərbaycan müharibənin qarşısını alınmalıdır” adlı 33 səhifəlik məruzə yayıb. Məruzədə bir sıra maraqlı məqamlar yer alıb. Xüsusilə burada Azərbaycan və Ermənistan silahlı qüvvələrinin sayı, müharibə olacağı təqdirdə tərəflərin mövqeyi, əllərində olan silahlar haqqında məlumatlar yer alır. Qeyd olunur ki, Ermənistanda Bakını vura biləcək silahlar var. Azərbaycan ordusunun malik olduğu raketlər isə düşmənin bütün şəhərlərini dağıtmağa qadirdir.

Hesabatda səslənən fikirlərə Azərbaycan Müdafiə Nazirliyinin mətbuat xidməti idarəsinin rəisi Eldar Sabiroğlu münasibət bildirib.

- Beynəlxalq Böhran Qrupunun “Azərbaycan-Ermənistan müharibəsinin qarşısı alınmalıdır” hesabatına münasibətiniz necədir?

- Hesaba münasibət birmənalı ola bilməz. Həmişə olduğu kimi, bu dəfə də öz ənənəsinə sadiq qalan təşkilat səbəbləri kənara qoyaraq nəticələrdən danışır və tövsiyələrini verir. Həqiqətən də bölgədə müharibə riski çox böyükdür və Azərbaycan bunu dəfələrlə bəyan edib, müharibəyə aparan yolları da izah edib. Ancaq təəssüflər olsun ki, münaqişənin dinc yolla həllinə dair Azərbaycanın sülh təşəbbüslərinə lazımı dəstək verilməyib. Bu mövqeni tutanlardan biri də elə Beynəlxalq Böhran Qrupudur. Hesabatda Azərbaycanla Ermənistanı eyniləşdirməyə cəhd edilir. Yaxud çox incə formada Ermənistana tərəf durur. Hesabatda qeyd olunur ki, tərəflər silahlanmanın qarşısını almalıdırlar. Bu çox yaxşıdır, əla məsləhətdir. Ancaq həmin təşkilat nədən belə vəziyyətin yarandığını acıqlamaga səy göstərmir. Azərbaycan məcburi şəkildə müdafiə qüdrətini artırır və ordusunu lazımı səviyyədə təchiz edir. Çünki bizim torpaqlarımız işğal edilib necə illərdir ki, aparılan danışıqların nəticəsi yoxdur. Buna görə heç bir beynəlxalq təşkilat, eləcə də xarici dövlət Azərbaycanı günahlandıra bilməz. Bölgədə Azərbaycan-Ermənistan münasibətlərinin gərginliyi müharibəni hər an yaxınlaşdırır. Bu dəfə ki, müharibə daha faciəvi, daha dağıdıcı olacaq. Çünki Azərbaycan əvvəlki Azərbaycan deyil. Ölkənin hərbi qüdrəti kifayət qədər artırılıb. Uzun müddət torpaqların işğal altında qalmasına dözmək mümkün deyil. Zaman da bizim xeyrimizə işləyir. Getdikcə Ermənistanın təcavüzkar siması tam açılır. İşğalçı ölkə zəbt etdiyi torpaqlardan geri çəkilməlidir.

- Hesabatda Ermənistan ordusunda mənəvi əhval-ruhiyyənin yaxşı olduğu bəyan olunur. Bəs sizin informasiyalarınızda bununla bağlı nə deyilir?

- Erməni ordusunda guya mənəvi əhval-ruhiyyənin yaxşı olduğunu gözə soxan Beynəlxalq Böhran Qrupu bununla nə demək istəyir? Ümumiyyətlə, Ermənistanın daxilində baş verən hadisələrdən bu qrupun xəbəri varmı? Bir neçə ay əvvəl Ermənistandakı siyasi partiyaların nümayəndələri, eləcə də sabiq prezident Ter Petrosyan Ermənistan ordusunu faşist ordusu ilə müqayisə etdi. Nə üçün Beynəlxalq Böhran Qrupu bu cür məqamları görmür? Ordu əlbəttə ki, cəmiyyətdən təcrid olunmuş şəkildə götürülə bilməz. Cəmiyyət, hakimiyyət və dövlət necədirsə, onun ordusu da o şəkildədir. Sirr deyil ki, Ermənistan iqtidarı kriminal hakimiyyət olaraq beynəlxalq ictimaiyyətin diqqətini cəlb edir. Yaxşı olardı ki, hesabatı hazırlayan təşkilat bu məqamlara da diqqət yetirsin. Və Azərbaycanla Ermənistanı müharibə vəziyyətində eyni tutmasın. Bizim torpaqlarımızı onlar işğal edib və bu ölkə təcavüzkardır.

- Ancaq hesabatda o da qeyd edilir ki, bu məsələdə zaman prezident İlham Əliyevin əleyhinə işləyir. Müharibə təhlükəsini artıran amillərdən biri də bununla bağlıdır…

- Siz heç Beynəlxalq Böhran Qrupunun Azərbaycan haqqında müsbət bir fikir söyləməsinə rast gəlmisinizmi? Ancaq Azərbaycanın ziyanına hesabatlar, açıqlamalar və bəyanatlar verilib. Bunların da heç bir əsası olmayıb. İndiki münasibət də həmin qəbildəndir. Bu gün zaman məhz Azərbaycanın ali baş komandanının xeyrinə işləyir. O, sülhpərvər insandır və bölgədə sülhün olmasını istəyir. Bəs böhran qrupu nə istəyir? Dövlət və prezident səviyyəsində qeyd edilib ki, münaqişənin həlli çox uzadılsa, Azərbaycan başqa vasitələrdən istifadə edib ərazisini işğaldan xilas edəcək. Bunun arxasında nəyin durduğunu hər kəs bilir. Ancaq indiki halda Beynəlxalq Böhran Qrupu fəaliyyətini təkrarlamaqla təəssüf doğurur.

- Hesabatda açıq yazılıb ki, müharibənin başlayacağı təqdirdə erməni ordusu beynəlxalq avtomobil və dəmir yolları, Bakı -Tiblisi - Ceyhan, Bakı-Tiblisi-Ərzurum, boru kəmərlərinin qarşısını kəsmək üçün Qazax və Ağstafanı işğal etməyə cəhd edəcək, Gəncə, Yevlax və Mingəçevirə hücumlar olacaq. Bu yanaşma nə qədər realdır?

- Bunların hamısı Ermənistanda zaman-zaman səslənən fikirlərdir. İndi bu fikirləri oradan götürərək hesabata salıblar. Əlbəttə ki, bu Azərbaycanı çəkindirmək üçün bir variantdır. Azərbaycanın da öz planları var. Bu gün Silahlı Qüvvələrimiz müharibə başlayacağı təqdirdə Ermənistana elə zərbə endirə bilər ki, o tam sarsıla bilər. Ermənistanda istənilən hədəfi vurmağa imkanımız var. Açıq söyləyirəm ki, Ermənistan müharibə aparmaq qüdrətinə malik deyil. Müharibə aparmaq üçün bir neçə amil tələb olunur. İqtisadi güc vacib amildir, amma bu Ermənistanda yoxdur. Sosial şərait ciddi amildir, lakin bu da Ermənistanda bərbad durumdadır. Bu ölkədən əhali köçüb getməkdə davam edir, 2 milyon insan belə qalmayıb. Bir sıra hərbi hissələr buna görə, komplektləşdirilməyib. Nəhayət ən mühümü insan amilidir. Sabah müharibə başlasa, Ermənistan uzun müddət duruş gətirə bilməz. Bu ölkədə insan faktoru günbəgün öz mahiyyətini itirir.

- Ancaq həmin dövlətin daxilində başqa ölkənin güclü hərbi qüvvələri var...

- Sabah gərgin vəziyyət yaranacağı təqdirdə başqa ölkənin ordusunun bu işə qarışması bölgədə böyük alova səbəb ola bilər. Mən o qədər də inanmıram ki, işarə etdiyiniz həmin ölkə əvvəlki kimi yenə bu məsələlərə müdaxilə edəcək. Bu, çox pis qarşılana bilər.

- Ancaq Ermənistan MDB-də Kollektiv Təhlükəsizlik Müqaviləsinin üzvüdür. Ermənistanın müdafiə olunması üzvlərin hüquqi öhdəliyidir. Hətta bunu açıq şəkildə bəyan edirlər…

- Bəyanatlarla hərəkətləri qatışdırmaq olmaz. Bəyanat verib altından çıxa da bilərlər.

- Hesabatda cəbhə xəttindəki bütün yüksək coğrafi mövqelərin erməni ordusunun əlində olduğu xüsusilə vurğulanır. Qeyd edilir ki, bu fakt erməni ordusunun müharibədə üstünlüyünü təmin edir. Bu yanaşma doğrudurmu?

- Burada sirli bir şey yoxdur. Bizim torpaqlarımızı işğal ediblər və ərazilərimiz onların işğalı altındadır. Burada Amerika kəşf etməyə ehtiyac yoxdur.

- Hesabatda Azərbaycanın 95.000, Ermənistanın isə 70 minlik ordusunun olduğu bildirilir. Bu nisbət həqiqəti əks etdirirmi?

- Burada bir məsələ araşdırılmalıdır. Ermənilər 70 minlik ordu formalaşdıra bilərlərmi? Ermənistandan əhali köçüb gedir. Vəziyyət o həddə çatıb ki, ermənilər orduya çağırışı tam təmin edə bilmirlər. Bu faktdır.

- Hesabatda açıq bəyan edilir ki, Ermənistan əlində olan Skad-B raketləri Bakıya çata bilər…

- Bizdə elə silahlar var ki, Ermənistanda istənilən hədəfi vura bilər. Bu, söz yox, həqiqətdir. Daha yaxşı olardı ki, belə müqayisələr aparan Beynəlxalq Böhran Qrupu Ermənistanın işğalçı siyasətini tənqid atəşinə tutsun. Ancaq bu gün açıq-aydın şəkildə Ermənistana tərəf durur.

- Sizcə, bu təzyiqdir?

- Azərbaycana belə hesabatlarla təzyiqin göstəriləcəyinə inanmıram. Azərbaycan əvvəlki Azərbaycan deyil. Biz müstəqilliyimizi qorumaq üçün kifayət qədər gücə malikik.

- Siz belə hesabatları təhlil edirsinizmi?

- Ümumiyyətlə, ordu və müharibə ilə bağlı kənardan səslənən hər bir məqamı təhlil edib nəticələrimizi çıxarırıq.

- Bu hesabat hazırlanarkən sizin mövqeyiniz öyrənilibmi?

- Təəssüf ki, indiyə qədər belə təşəbbüsün şahidi olmamışıq.

Nemət Hüseynli

Bizim yol.- 2011.- 10 fevral.- S.7.