«Cəmiyyətimiz
kütləvi xroniki karlığa doğru gedir»
Həsrət Rüstəmov: “Azərbaycanda
aqressiyanın çoxluğuna görə nevroz diaqnozunu
uzaqdan təyin etmək çətindir»
«İnsan
orqanizmi uzun müddət səs-küy və “vibrasiya”ya məruz
qalırsa, çox ciddi xəstəliklərin yaranmasına səbəb
olur»
Keçən həftə şəhəri bürüyən
endirimlərlə bağlı yazı yazırdım. Mərkəzi
küçələrin birində apardığım
monitorinq zamanı vaxta qənaət etmək üçün
müşahidələrimi diktofona yazırdım. Sonradan yazını qələmə alanda məlum
oldu ki, diktofondan bir çox məlumatları eşidə
bilmirəm. Problem mənim qulağımda
deyildi. Müşahidə
apardığım bütün mağaza və iaşə
obyektlərində yüksək tonla əcayib musiqi səsləri
sən demə mənim səsimi batırırmış.
Diktofona nə qədər yaxın olsam da,
ağzım deyəni indi qulağım eşitmirdi. Və o yazını bitirəndə beynimdə ancaq
mənasız gurultulu səslər vardı. Ümumiyyətlə, son zamanlar ətrafdakı səslərə
həssaslığım artıb. Indi
bilmirəm, mənim qulağımdamı problem var, yoxsa şəhərimizin
hay-küyü çoxalıb.
Əlbəttə, bütün bunlar bizim
sağlamlığımıza təsirsiz
ötüşmür. Lap elə bəlkə mənim
özümdə də müəyyən izlər buraxıb.
Bütün bunlara aydınlıq gətirmək
üçün bir mütəxəssislə
danışmağı qərara aldım. Sağlam Həyata
Doğru Ekoloji İctimai Birliyinin (SHDE İB) tibbi məsələlər
üzrə eksperti, həkim Həsrət Rüstəmov bizi
maraqlandıran sualları cavablandırdı:
- Həsrət
bəy, kənar səs-küy, “vibrasiya” insan orqanizmində
hansı dəyişikliklərə səbəb olur?
-
Ətraf mühitə normadan artıq səs-küy və
“vibrasiya”nın daxil olması insan orqanizmi
üçün təhlükəli sayılır. Səsin müəyyən normadan
artıqlığı səs-küy çirklənməsi adlanır.
Hazırda dünyanı narahat edən əsas
problemlərdən biri də budur. Avtomobillərin,
tikinti işlərinin, sənayenin və o cümlədən məişətdə
istifadə olunan avadanlıqların, müsiqi
cihazlarının yaratdığı səs-küy müzakirə
olunur. Artıq çoxdandır tibb elminə
bəllidir ki, səs-küy və “vibrasiya” insan orqanizmində
ciddi dəyişikliklər yaradır. Ilk
növbədə sizi ictimai-iaşə obyektlərindəki səs-küy
maraqlandırdığına görə, birinci buna diqqət
yetirək.
Yersiz hay-küy insanın eşitmə analizatorunun səsə
olan həssaslığını azaldır. Bu,
“qıcıq qapısı” adlanır. Bir
insan əgər uzun müddət yüksək səs-küy
olan bir yerdə işləyir, orda oturursa, ondan sonra kiçik
səs dalğalarını onun eşitmə analizatoru qəbul
edə bilmir. Çünki, hiss hüceyrələri
yüksək səs-küyə öyrəşir və ondan
aşağı dalğalı səsləri eşitmir. Başqa cür desək, bu, tədricən xroniki
karlığa gətirib çıxaran səbəblərdən
biridir. Eyni zamanda, əgər insan orqanizmi
uzun müddət səs-küy və “vibrasiya”ya məruz
qalırsa, geriyədönməz, çox ciddi xroniki xəstəliklərin
yaranmasına səbəb olur. Məsələn,
hipertoniya kimi tanıdığımız arterial təzyiqin
qalxması xəstəliyinin əsas səbəblərindən
biri kimi məhz uzunmüddətli səs-küyün və
vibrasiyanın təsiri ilə meydana
çıxdığı güman olunur. Doğrudur, bu
yöndə çoxlu tədqiqatlar var və nəticələr tam bəlli deyil, amma səs-küy
və “vibrasiya”nın adıçəkilən xəstəliyin
yaranmasında mühüm rol oynadığı şübhəsizdir.
Eyni zamanda, bu, bir çox sinir xəstəlikləri, nevrozlar,
yuxu pozğunluğu ilə müşayət olunan sinir, hətta
psixi xəstəliklərin belə əmələ gəlməsinə
şərait yarada və ya bilavasitə buna səbəb ola bilər. Səs-küyün ən
çox təsir göstərdiyi orqanizmlər yaşca
kiçik olan uşaqlar və yaşlı insanlardır ki,
onların səs-küy, “vibrasiya”, ümumiyyətlə ətraf
mühitin zərərli təsirlərinə dözmək
imkanları həddindən artıq aşağıdır.
Ona görə də körpə uşaqlar və
yaşlı adamların bu cür yerlərdə olması məsləhət
deyil və maksimum çalışılmalıdır ki, onlar
belə yerlərdən uzaq olsunlar.
- Avropada
ictimai yerlərdə, iaşə obyektlərində bizdəki
qədər səs-küy yoxdur. Ümumiyyətlə,
orda sizi narahat edən kənar səslər yox dərəcəsindədir.
Bizimlə müqayisə olunmazdır. Bizdə
alış-veriş üçün dükana və ya fast
foodlara girirsiz, sanki dəlixanadır. Ağız
deyəni qulaq eşitmir. Azərbaycanda bu səs-küyün
fəsadları artıq hiss olunur?
- Bu cür
təsirlər qısa müddətdə ciddi xəstəliklərə
gətirib çıxarmasalar belə, uşaqların
psixologiyasına mənfi təsir göstərir. Eyni zamanda digər qruplar, yaşlı və orta
yaşlılar, cavanlar da həmçinin bundan zərər
görürlər. Uzun müddət səs-küyə
məruz qalan insanlar aqressiv olurlar, onlarda yuxu
pozğunluqları meydana gəlir, başqalarına
qarşı laqeydlik göstərirlər. Bəlkə
də küçədə fikir vermisiz, qulaqcıqla musiqiyə
ucadan qulaq asan insanlara çox rast gəlirik. Ictimai nəqliyyatda yanınızda oturub, siz onun
qulaqcığından gələn səsdən narahat olursuz.
Çox ucadan dinləyirlər. Ancaq başa düşmürlər ki, bu səs
onların eşitmə analizatorunu sıradan
çıxartmaqla yanaşı sinir sisteminə də mənfi
təsir göstərir. Çox vaxt həmin
insanlar onlara olan müraciətləri eşitmirlər, hətta
qulaqcıqsız belə. Çünki,
qulaq artıq o yüksək səsə öyrəşib,
onunla asta səslə danışmaq mümkün deyil. Belə adamlar ictimai yerlərdə ucadan,
başqalarını narahat edən tonda danışırlar.
-
Artıq deyə bilərikimi ki, bunun fəsadlarını biz cəmiyyətdə
hiss edirik? Həqiqətən, bizdə insanlar
çox vaxt bir-birinə qarşı aqressiv davranırlar.
Başqa ölkələrdə insanların
davranışları fərqlidir. Həmkarlarımdan
biri yazırdı ki, Fransada bir xanımın
ayağını təsadüfən tapdalayıb, xanım
onun üzrünü gözləmədən özü
üzr istəyib. Biz bu şəkildə
davranış nümayiş etdirə bilmərik. Mən artıq 10 ildən çoxdur küçədə
və ya ictimai nəqliyyatda məni narahat etdiyinə görə
kiminsə üzr istədiyini eşitməmişəm. Bizdə nöqsanına görə artıq kimsə
başqasından üzr istəmir. Əksinə,
bir-birini narahat etməkdən zövq alanların sayı
çoxalır. Sanki, cəmiyyətdə
kütləvi psixoz var. Sizcə,
davranışlarımızdakı bu anormallıqla
bağlı hay-küyün “xidmətləri” var?
- Bu məsələlərə
səs-küy yeganə səbəb olmasa da, hər halda onun da
şübhəsiz ki, böyük təsiri var. Əvvəla
dünyanın heç bir ölkəsində səs-küy
bizimki qədər kütləvi və geniş deyil. Mən də Avropa ölkələrində
olmuşam, ictimai yerlərinə getmişəm. Onların nəinki ictimai yerlərində, heç
restoran, barlarında bu qədər hay-küy olmur. Mənim yaşadığım evin zirzəmisində
bar var. Gecə orda çalınan zərb alətlərinin
titrəyişləri bizi narahat edir. Dəfələrlə
şikayət də etmişik, əncam çəkən
yoxdur.
Indi görün o barda
oturanların qulaqlarındakı təbil pərdəsi nə
vəziyyətdədir. Dediyiniz əlamətlər
insanların nevrotik vəziyyətlərini göstərir.
Aqressivdirlər, kiçik hadisələrə
onlarda böyük reaksiyalar doğur. Bu
insanların həmin vəziyyətə gəlməsinin səbəbi
təkcə səs-küy olmasa da, səs-küyün də
böyük rolu var. Çünki, sakit musiqiyə qulaq asanda
sinir sistemi dincələ bilir. Amma səs
tembri bəlli normanı aşanda, bu, sakitləşdirici yox,
qıcıqlandırıcı təsirə çevrilir və
bu da uzun müddət davam edəndə sinir sistemində ciddi
fəsadlar törədir.
- Mənim
gördüyüm o fərqi yəqin siz də
görürsüz. Qərb insanı ilə bizim
davranışımız nə qədər fərqlidir.
Lap elə qonşu ölkələrlə
müqayisədə də biz çox aqressivik. Bir həkim
kimi hiss edirsinizmi ki, insanların davranışları 10-20 il əvvəlki kimi deyil?
- Əlbəttə. Qərbdə insanlar əsasən
sakitdirlər.
Orda nevrozun diaqnozunu küçədə uzaqdan
belə qoymaq olar. Çünki,
insaların böyük əksəriyyəti sakitdir. Bunun da səbəbləri çoxdur. Burada iqtisadi-sosial səbəblər də
böyük rol oynayır. Insanların normal işləri
varsa, həyatlarını təmin edə biləcək qədər
qazanırlarsa, həftəsonu 2 gün istirahətə gedə
bilirlər, ilin bir ayını səyahət edib dincəlirlərsə,
bu insanlarda niyə nevroz olsun ki?! Bizim əhalidə
isə bu problemlər var. Hətta yaxşı təmin
olunmuş insanlar belə həftənin 6 gününü
işləyirlər. Çox vaxt yerdə
qalan o bir günü də istirahətə həsr edə
bilmirlər. Böyük bir insan toplumu
işsizdir. Belə vəziyyətdə
onlarda nevrozun olması o qədər də təəccüblü
deyil. Amma bunun da üzərinə səs-küy
və “vibrasiya” çirklənməsi gələndə, təbii
ki, insanlar artıq xəstələnmə hallarına
keçirlər. Mən praktikada da
görürəm. Nevrozların sayı həddindən
artıq çoxalıb. Bizdə nevrozun
diaqnozunu Avropadakı kimi uzaqdan təyin etmək çətindir,
çünki, çoxluq aqressiv davranır. Həkimə müraciət edənlər arasında
nevrozun əlamətlərinə, bu xəstəlik səviyyəsində
olmasa da, çox rast gəlirik. Xüsusilə
də gənc nəsil arasında, yetkinlik yaşına
çatanlarda və gənclərdə. Nevroz
artıq gəncləşib. Yeniyetmə və
gənclər səs-küyə ən çox məruz qalan
sosial qrupdur. İctimai yerlərdə daha
çox olanlar, səs-küylü musiqiləri çox dinləyənlər
səs-küyün təsirinə ən çox məruz qalan
təbəqədir ki, bunların arasında əsəbi
insanlara çox rast gəlinir.
- Bu
yazını yazmağıma əsas səbəblərdən
biri də nəqliyyatı intellektual idarəetmənin
monitorlarıdır. Ordakı yüksək səslərlə
lazımsız reklamlara mən dözə bilmirəm. Dayanacaqlarda demək olar, həmişə onların
səs düyməsini bağlayıram.
- Mən
də bunu müşahidə etmişəm. Amma
bəzi yerlərdə səsi çıxmır. Ola bilsin, sizin kimi onların da səsini
bağlayıblar. Təbii ki, belə kənar
səslərin də insan orqanizminə mənfi təsirləri
çoxdur. Məsələn, bizim təşkilat
avtomobillərin ətraf mühitə zərərli təsirləri
ilə bağlı bir layihə işləmişdi. Avtomobillərin zərərli təsirləri içərisində
onların yaratdıqları səs-küy də böyük
rol oynayır. Sivil ölkələrdə avtomobil
yolları ilə yaşayış məntəqələri
arasında məsafənin olması və orada mümkün qədər
çox ağacların əkilməsi, yaşıl
örtüyün salınması norma kimi
qəbul olunub. Ona görə ki, ağaclar səs-küyü
müəyyən qədər udurlar. Həm
də avtomobilin hərəkətindən qalxan tozları
özlərinə çəkirlər. Eyni
zamanda üzü böyük avtomobil yollarına baxan binalar
tikəndə inşaat şirkətləri avtomobil yolu istiqamətində
pəncərə şüşələrini ikiqat edirlər,
ya da müxtəlif izolyasiya tədbirləri görürlər
ki, yaşayış və ya ofis binalarına avtomobillərin
səs-küyü çox keçməsin. Çünki, kənar səslərin insan orqanizminə
mənfi təsirləri artıq sübut olunub.
- Sivil
ölkələrdə avtomobilin mexanizminin səs problemi var,
bizdə isə bunun üzərinə bir də
sürücülərin siqnal səsini əlavə edək...
- Mənim
praktikamda rast gəlmişəm ki, hipertoniya xəstələri
əcayib səs siqnallarından əsəbləşib, krizisə
düşüblər. İnsanlar səslərə
müxtəlif reaksiyalar verirlər. Xüsusilə
də xroniki xəstəlikləri, ürək-damar
patologiyaları olanlar o səslərə qarşı çox
həssasdırlar və adi bir siqnal səsi onu əsəbləşdirib,
vəziyyətini ağırlaşdıra bilər. Yol-hərəkəti qaydalarında da
yaşayış məntəqələrində siqnal vermək
qadağandır. Bunun üçün cərimə
nəzərdə tutulur. Amma, təəssüf
ki. bizdə sürücülərin
çoxu cəzasız qaldıqlarından bunu nəzərə
almırlar.
- Doktor,
xahiş edirəm, mənə diaqnoz qoyun. Barəsində
söhbət etdiyimiz səslər məni əsəbləşdirir
axı...
- İstirahət etmək lazımdır. Siz yəqin
fasiləsiz işləyirsiz, ona görə də səslərə
qarşı həssaslıq göstərirsiz.
-
Üç ildir istirahət edirəm.
- Onda
işə hələ alışmamısız.
- Söhbət
bundan getmir. Mən keçən həftə
iaşə obyektlərində qiymət endirimlərilə
bağlı bir monitorinq keçirirdim. Sonradan
diktofonda qulaq asıram və baş çəkdiyim hər
yerdə yüksək musiqi fonunda diktofonda nəinki
satıcıların, heç öz dediyimi belə başa
düşmürəm.
- Onda siz
həssas insansınız. Bu xarakterlə də
bağlıdır. Sizə o cür yerlərdə
çox qalmaq lazım deyil. Ciddi narahat
edirsə, gərək o səs-küylü yerlərdən
qaçasız.
- O zaman
problem məndədir, yoxsa cəmiyyətdə?
(ardı növbəti sayımızda)
H.HƏMİDOVA
Bizim yol.-2014.-25 fevral.-S.11.