«Arzuladığım rolu hələ teatrda görməmişəm»

Təhminə Məmmədova: «Gürcüstan, Türkiyə, Rusiya, Ukrayna teatrlarında olmuşam, etiraf edim ki, paxıllığım tutub»

«Hər ailədə birdən çox uşağın dünyaya gəlməsinə icazə verilməməlidir»

Müsahibimiz aktrisa Təhminə Məmmədovadır. O, Azərbaycan Dövlət Gənc Tamaşaçılar Teatrınında fəliyyət göstərir, filmlərə və teleseriallara çəkilib.

Müsahibəni təqdim etməmişdən öncə aktrisanın fəaliyyəti haqqında qısa məlumat verək. Təhminə Məmmədova quruluşçu rejissoru Nicat Kazımov olan "Ana qaz", "Ələddinin sehrli çırağı", "Şahzadə Xəzərin nağılı" və Samuel Marşakın "Pişiyin evi" əsərlərinin tamaşasında müxtəlif obrazları canlanıdırıb. Aktrisa 26 fevral 2014-cü ildə cffn 10:00-lf Azərbaycan Dövlət Gənc Tamaşaçılar Teatrında nümayiş etdiriləcək Xanımana Əlibəylinin "Dovşanın ad günü" əsərinin tamaşasında da rol alacaq. Bildirək ki, tamaşanın quruluşçu rejissoru Ağaxan Salmanlı, quruluşçu rəssamı Fuad Əliyev, bəstəkar Şəfiqə Axundovadır. Rollarda Təhminə Məmmədova ilə yanaşı Eyvaz İbrahimov, Ceyhun Məmmədov, Sevinc Mehrəliyeva da rol alıblar.

Müsahibimiz 2007-ci il istehsalı olan “Qızlar” filmində də obraz yaradıb. Sözügedən filmin məzmunu belədir: filmdə olan hadisələr XXI əsrin əvvəllərində Bakıda baş verir. Zamanın gerçəkliyi dörd xanımın nəzər nöqtəsində canlanır. Bu qızların hər birinin öz taleyi, öz dünyası, həyata öz baxışları var. Xarakterləri fərqli olsa da, onları bir-birinə bağlayan ali bir qüvvə var: dostluq! Bəs kimdir bu qızlar?!

Arzu (Təhminə Məmmədova) - Əksər azəri qadınlar kimi arzuları böyükdür - ərə getmək istəyir. Amma sevgidə bəxti gətirmir. Çətin vəziyyətlərə düşdükdə isə, rəfiqələri onu düşdüyü vəziyyətdən xilas edirlər.

Leyla (Vəfa Zeynalova) - jurnalistdir, əsasən gender problemlərindən, eyni zamanda cəmiyyətin sosial yaşantıları haqda yazır. Vətənpərvərdir, daim ictimai ədalət axtarışındadır.

Turan (Hüsniyyə Mürvətova) - Uğurlu iş adamıdır. Həyat yoldaşı 1992-ci ildə Qarabağda şəhid olub ve bu səbəbdən ömrünün sonunadək sadiq qalacağına söz verib.

Sevda (Zümrüd Qasımova) - Qadın idman klubunda çalışır, sözübütövdür. Kişiləri yoldan çıxarmaq, onlara dərs vermək hobbisidir. Hələlik cəmiyyət tərəfindən layiqli qiymət almır.

Serialda təqdim olunan digər obrazlar, qızların həyatında aparıcı qüvvəyə çevrilirlər. Leylanın işlədiyi yeni redaksiyada qeyri-adi xüsusiyyətlərə malik vəkil Mahmudla (Rəşad Səfərov) tanışlığı, Turanın Türkiyədən qayıtdığı zaman naməlum kişinin onun fotosunu çəkməsi hadisələrə düyün vuraraq, ziddiyyətləri formalaşdırır.

Məhəbbət, sevgi, nifrət, xəyanət, kriminal aləm, sosial həyat - bütün bu sadalananlar serialın əbədi mövzuları kimi vahid dramaturji xətdə cəmlənərək, daim yeni hadisələr yaradır...

Filmin ssenari müəllifi Kamran Qasımov, quruluşçu rejissoru Namiq Ağayev, Abbas Paknəhatdır.

Aktrisa Təhminə Məmmədovanın rol aldığı teleserialları sırasında “Ağabəyovlar” teleserialı var. 2012-ci ildə ANS televiziyasının efirində yeni - “Ağabəyovlar” serialının nümayişi başlanıb. ANS Müstəqil Yayım və Media şirkətinin “Bakı Film” kinostudiyası tərəfindən istehsal edilmiş “Ağabəyovlar” bədii serialının ssenari müəllifləri Vahid Mustafayev və Kamran Qasımov, quruluşcu rejissoru Vahid Mustafayevdir.

“Ağabəyovlar” serialının rejissor assistentləri Yeganə Əbdülməmmədova, Cahangir İmani, baş operator Saman Əhədi, montaj Elşad Rəhimov, səs rejissoru Məcid Əliislam, baş prodüseri Mirşahin Ağayev, prodüseri Eyyub Danışvərdir.

Serialın təqdimatında tədbirin xüsusi qonağı Amerika televiziya seriallarının ulduzu, məşhur “Santa-Barbara” serialından tanıdığımız Meyson rolunun ifaçısı aktyor Leyn Hant Deyvis də iştirak edib. Azərbaycanda serialın təqdimatı bir ilk olduğu kimi, dünya səviyyəli aktyorun dəvət olunması da ilk idi.

“Ağabəyovlar” teleserialı 100 seriyadan ibarət olub. Təhminə Məmmədovanın bu teleserialdakı rolu mənfi obrazdır, işlərin yaxşı getdiyi halda gəlib hər bir şeyi bir-birinə qatır.

- Rol aldığınız hansı yeni tamaşanın məşqi gedir?

- Azərbaycanda Kamera teatrının yaradıcısı, teatr rejissoru Cənnət Səlimova Şekspirin “III Riçird” tamaşasının məşqi gedir. Riçrd rolunda Şövqi Hüseynov oynayır. Mən isə kraliça Marqarita obrazını canlandıracam. Tamaşanın məmunu belədir: Kral III Ricırd murdar insan kimi təqdim edilir ki, ətrafındakılar ona nifrət etsin. Tax-tacını saxlmaq üçün hər bir pisliyi edir. Amma yalnız 3 krallıq edə bilir. Bu müddətdə onun öldürmədiyi, nifrətini qazanmadığı adam qalmayıb.

Marqarita isə taxdan düşmüş kraliçadır. Həyatının ağır məqamları canlandırılacaq. Bir sözlə dramatik, faciəvi həyatı canalandırıram.

-Sizə dramatik, yoxsa komedik rollar yaxındır?

- Romantik obrazlarım çox olubdur. 23 ildir teatrda çalışıram. Bu teatrda (Azərbaycan Dövlət Gənc Tamaşaçılar Teatrınında-R.İ.) 18 ildir ki, fəaliyyət göstərirəm. 5 il isə Bakı Kamera teatrında obrazları canlandırmışam. Təhsil aldığım müddətdə burada işləməyə başladım. Universiteti bitirdikdən sonra təyinatımı Rus Dram Teatrına vermişdilər. Amma Vaqif müəllim məni Dövlət Gənc Tamaşaçılar teatrına gətirdi. Romantik obrazlar var ki, o mənim yaşımla uyğunlaşmır. O obrazları gənclərin oynaması arzuolunandır, uyğundur. Mən istədiyim rolları hələ oynamamışam. Gərək adamın olsun. Müəyyən obrazların arzusu ilə teatra gəldim, amma hələ də rolları oynamamışam. Ssenarist və rejissor Nicat Kazımovun “Ələddinin sehrli çırağı”nın qəhrəmanın həyatı sırf mənim üçün yazılıb və səhnələşdirilib. Bu tamaşa bizim teatrda 2000-ci ildə “İlin ən yaxşı tamaşası” adına layiq görüldü. 2001-ci ildə isə bu tamaşa ilə mən “İlin ən yaxşı aktrisası” adı ilə mükafatlandırıldım. Hələ də o tamaşa repertuarda var. Teatrımızda təmir-bərpa işi aparıldıqdan sonra tamaşada dəyişiklik oldu, tamaşanı bir az da cavanlaşdırdılar. Hər dəfə də anşlaq olur. Bilet tapılmır.

- Dediniz kimi teatra gələrkən arzuladığınız rolu hələ oynamamısınız. Buna səbəb nədir?

- Mən arzuladığım rolu hərə teatrda görməmişəm. Onu da deyim ki, bu arzu mənim üçün artıq kiçilib, çılızlaşıb. Mən planet haqqında düşünürəm. Mənim üçün daha öndə olan məsələ planetin qorunmasıdır. Yəni, planetin insanlardan mühafizəsi məsələsi mənim arzumdur, istəkdir. Flora və faunanın, heyvanların qorunmasını istəyirəm, arzulayıram. İnsanlar vəhşidir. İnsan parazitdir. Düşdüyü yerin imkanlarından istifadə edir və oranı məhv edir. İnsanın gözü doymur. Gözü tox insanların sayı azdır. Dünyanı xilas etmək üçün insanların sayı azaldılmalıdır. İnsan sayı çoxaldıqca planetin problemləri də çoxalır. Hesab edirəm ki, hər ailədə bir uşaqdan çox uşağın dünyaya gəlməsinə icazə verilməməlidir. Canlı aləmi mühafizə etmək lazımdır. Biz buna çalışmalıyıq. Xeyriyyəçilik olmalıdır. İnsanlar bir-birinə kömək, yardım etməklə yanaşı digər canlılara da ziyan verməməli, onu qorumalıdır.

- Bax, siz bu arzularınızla bağlı olmuş, yaxud da olacaq xeyriyyə aksiyalarında öz sənətinizlə dəstək olmaq istərdinizmi?

- Əlbəttə. Şübhəsiz! Canlı aləmi qorumaq üçün hər bir imkanımdan istifadə etməyə hazıram və buna çalışıram da. Mən xeyriyyə aksiyalarında iştirak etməkdən məmnun olaram.

Hesab edirəm ki, aktyorların maaşı qaldırılmalıdır. Aktyorların sayı azdır. Anasından-atasından küsüb teatra gələnləri saymırıq. Mən ikinci, üçünci işlərlə ailəmi saxlayıram.

- Dövlət büdcəsindən teleserialların çəkilməsi üçün maliyyə vəsaiti ayrılıb. Yeni teleseriallar bağlı gözləntilər özünü doğruldubmu?

- “Qanun naminə” çoxseriyalı televiziya filminin bir serialına baxmışam. Uğurlu hesab edirəm. Peşəkarlığa, keyfiyyətə şahidi oldum. Filmdə 20-ci əsrin əvvəllərində böyük səs-küyə səbəb olmuş cinayət işlərindən bəhs olunur. Filmin ssenari müəllifi İsmayıl İmanov, rejissoru Xanlar Ağayev, quruluşçu operatoru Nadir Mehdiyev, bəstəkarı Rəşad Həşimovdur. Film tam HD formatında çəkilir və sənədli xronikadan, arxiv materiallarından, tarixi sənədlərdən istifadə olunur. Baş rollarda Rasim Balayev, Əbdülqəni Əliyev və başqaları oynayırlar. Bax, bu telesriala baxanda adamda ümid yaranır ki, teleserialların səviyyəsi qalxıb.

Hazırda mən Azərbaycan ssenari müəllifi, rejissor, kino redaktoru, Əməkdar İncəsənət Xadimi Ramiz Fətəliyevin çəkdiyi teleserialda rol alıram. Çəkilişlər gedir. Bu ilin sentyabr ayında tamaşaçıların ixtiyarına veriləcək. Serial kimi yox, film kimi çəkilir. İki serialı bir filmdir. Serial çəkmək peşəkarlıq tələb edir. Bizdə bir müddət film sahəsində durğunluq oldu. Filmlər, teleseriallar çəkilmədi. Arada-sırada bir-iki filmr çəkildi. Ancaq bu hər şey demək deyildi. Yəni indiki şərait və imkanlar o zaman olmadı. Nəticədə peşəkarlardan öyrənmək üçün mühit olmadı. İndi peşəkar film çəkənlər azdır.

Ümid edirəm ki, getdikcə uğurlu teleseriallar olacaq. Həm texniki, həm də yaradıcılıq baxından keyfiyyətli filmlər, seriallar olacaq. Azərbaycanda serial çəkilişlərinə hələ yeni öyrənilir, mənimsənilir. Bunu nəzərə alaraq vəziyyətə azacıq alicənablıqla yanaşmalıyıq. Hesab edirəm ki, ssenaristlər fikirlərini yazmaqda azaddırlar. Teleserialların uğurlu olması üçün festivalların olması arzuolunandır.

- Region və xarici ölkələrin teatrlarında olmusunuzmu?

- Olmuşam.

- Müqayisə apara bilərsinizmi?

- Əlbəttə. Deyim ki, region teatrlarında aktyor azlığı var. Məsələn, Naxçıvan teatrının binası, texniki imkanları yüksək səviyyədədir. Arzulolunan şərait o teatr binasında var. Ancaq orada işləmək istəyən aktyorlar azdır. Məsələn, Gəncəli olan aktyor Bakıda təhsil aldıqdan sonra Gəncəyə dönüb yerli teatrda fəaliyyət göstərmir, qalır Bakıda. Buna təəssüflənirəm. Region teatrlarına tələbat var. Deyim ki, region tamaşaları arasında uğurlu tamaşalar var.

Xarici ölkələrin teatrlarından Gürcüstan, Türkiyə, Rusiya, Ukrayna teatrlarında olmuşam. Etiraf edim ki, paxıllığım tutub.

Ramid İbrahimov

Bizim yol.-2014.-25 fevral.-S.13.