Həyatı mübarizə
epopeyasına çevrilən şəxsiyyət
Nəsiman
Yaqublu: "Məhəmməd Əmin Rəsulzadənin fəaliyyəti
Azərbayjan
xalqının siyasi baxımdan formalaşma səlnaməsidir"
2014-cü ilin yanvar ayında Azərbaycan Xalq Cümhuriyyətinin (AXC) banilərindən biri, Azərbaycan Milli Şurasının sədri olmuş Məhəmməd Əmin Rəsulzadənin anadan olmasının 130 illiyi tamam oldu. Azərbaycan Respublikasının Prezidenti 22 noyabr 2013-cü il tarixində "Məhəmməd Əmin Rəsulzadənin 130 illik yubileyinin keçirilməsi haqqında" sərəncam verdi.
Sərəncamda bildirilir ki, M.Ə.Rəsulzadə Azərbaycan xalqının müstəqillik
idealının gerçəkləşdirilməsində, Azərbaycanın
tarixi dövlətçilik ənənələri
zəminində milli dövlət quruluşunun dirçəldilməsində, milli istiqlal
ideyalarının geniş
yayılmasında böyük xidmətlər
göstərmiş və siyasi
publisistikası ilə ədəbi-ictimai fikir
tariximizə layiqli töhfələr vermiş görkəmli ictimai-siyasi
xadimdir. Qeyd olunur ki, Mədəniyyət
və Turizm Nazirliyi,
Azərbaycan Milli Elmlər Akademiyası, Təhsil
Nazirliyi və digər aidiyyəti qurumlarla birlikdə Məhəmməd Əmin
Rəsulzadənin 130 illik yubileyinə həsr
olunmuş tədbirlər planını
hazırlayıb həyata keçirsin.
M.Ə.Rəsulzadə
Azərbaycanın görkəmli dövlət və ictimai xadimi, dahi mütəfəkkiri, siyasətçi və
publisisti, Azərbaycan Xalq
Cümhuriyyətinin (1918-1920) banilərindən və Azərbaycan
siyasi mühacirətinin liderlərindən
biridir. Azərbaycan tarixinin
ən görkəmli və böyük
şəxsiyyətlərindən olub, Azərbaycan
milli istiqlal hərəkatına
başçılıq edib. Onun "Bir kərə
yüksələn bayraq, bir
daha enməz!" ifadəsi XX əsrdə
Azərbaycanda müstəqillik hərəkatının
şüarı olub.
Məhəmməd
Əmin Rəsulzadə 1884-cü il
yanvarın 31-də Bakının Novxanı kəndində anadan olmuşdur. Din xadimi olan
atası oğlunu məşhur pedaqoq Sultan Məcid Qənizadənin
müdiri olduğu ikinci "Rus-müsəlman" məktəbinə
qoymuş, buranı bitirdikdən sonra M.Ə.Rəsulzadə öz
təhsilini Bakı texniki məktəbində,
rus dilində davam etdirmişdir. Azərbaycan milli istiqlal hərəkatının
və təkcə türk ellərində
deyil, bütün islam aləmində ilk respublika üsul-idarəsi olan
Azərbaycan Demokratik Respublikasının
təməl daşını qoyan Məhəmməd
Əmin Rəsulzadənin inqilabi fəaliyyətinin
ilk illəri də məhz bu
dövrə təsadüf edir.
1902-ci ildə on yeddi
yaşında olan M.Ə.Rəsulzadə
"Müsəlman gənclik təşkilatı"nı
yaratmışdır. Bu, XX əsrdə Azərbaycanda
rus müstəmləkə üsul-idarəsinə
qarşı gizli mübarizə aparan ilk siyasi
təşkilat idi.
"Hüquqi bir dövlətin əsasını qoyub"
Rəsulzadənin fəaliyyəti
haqqında tarix elmləri üzrə fəlsəfə
doktoru, Rəsulzadə irsinin
araşdırmaçısı Nəsiman Yaqublu
ilə həmsöhbət olduq. Müsahibəni təqdim etməmişdən öncə
bildirək ki, N.Yaqublu
Bakı Dövlət Universitetinin Curnalistika fakültəsində və Sankt-Peterburq Universitetinin Curnalistika fakültəsində təhsil
alıb. 1990-cı ildə stalinizmin azərbaycanlı
qurbanları haqqında "Ağrılı ömürlər"
kitabını, 1991-ci ildə isə Azərbaycan Xalq Cümhuriyyəti və onun yaradıcısı olan
M. Ə. Rəsulzadə haqqında əsərini nəşr etdirib.
O, 2001-ci ildə
"Azərbaycan Milli İstiqlal
Mübarizəsi və Məhəmməd Əmin Rəsulzadə"
kitabını çap etdirib.
Nəsiman Yaqublunun 2007-ci ildə "Azərbaycan-Polşa
əlaqələrində M.Ə.Rəsulzadənin rolu", 2008-ci ildə "Bakının qurtuluşu", 2009-cu ildə "Türkiyənin
azərbaycanlılara müstəqillik mücadiləsində dəstəyi" və 2013-cü ildə "Məhəmməd
Əmin Rəsulzadə ensiklopediyası" kitabları çap olunub.
N.Yaqublunun sözlərinə görə, XX əsr
Azərbaycanın milli istiqlal
və dövlətçilik tarixində Rəsulzadənin
adı xüsusi ilə çəkilməlidir:
"İlk dəfə olaraq
1918-ci ildə demokratik əsaslara söykənən,
hüquqi prinsiplərə əsaslanan,
dövləti-xalq cümhuriyyətini quran-əsas ideoloq Məhəmməd Əmin Rəsulzadə olub.
Yəni bu zamana
qədər bizim bir
millət olaraq mövcudluğumuz
və qurduğumuz dövlətlər
tarixində ilk dəfə olaraq
demokratik əsaslara söykənən hüquqi bir dövlətin
əsasını qoyub və bu dövlət onun adı
ilə bağlıdır. O mənada Rəsulzadə Azərbaycanın
dövlətçilik tarixində önəmli yer tutur".
"O, bir mübarizə epopeyasıdır"
N.Yaqublu bildirdi ki, Məhəmməd Əmin Rəsulzadənin
fəaliyyəti həm də Azərbaycan xalqının siyasi baxımdan formalaşmaq
səlnaməsidir: "Bu sözü
inamla demək istəyirəm ki, Rəsulzadə XX əsrin əvvəllərində
fikir fəaliyyəti Azərbaycan
xalqının bütövlükdə azadlığına həsr
edilmiş bir
mübarizə epopeyasıdır. O, özünün
bu mübarizəsi ilə xalqın özünü həm maarifləndirmiş, həm
elmləndirmiş, həm də siyasi səhnəyə
çıxması üçün bir əsas yaratmışdı.
Rəsulzadənin
1902-1903-cü illərdə siyasi fəaliyyətə
başlamaq dövrünü
nəzərə alaraq deyim
ki, əgər o, Azərbaycan
tarixində aşağıda göstərəcəyim fəaliyyətləri
həyata keçirməsəydi, yəqin, Azərbaycan
xalqı bir millət olaraq
formalaşmaqda başqa
xalqlara nisbətən gecikərdi. Və onsuz da XX əsrin əvvəllərində Azərbaycan
xalqı gecikmişdi. Biz
bu dövrdə Azərbaycan
xalqının ümumi mənzərəsinə
diqqət yetirsək, məsələn, ermənilərlə,
gürcülərlə müqayisə etsək, hansı mənzərənin
şahidi olarıq. Ermənilər,
gürcülər artıq ilk siyasi partiyalarını
yaratmışdılar. Eləcə də başqa
xalqlar da öz partiyalarını, ictimai
birliklərini yaratmışdılar. Amma biz XX əsrin ilk illərində
siyasi partiya
yaratmamışdıq.
Milli yönümlü siyasi partiya yaradan da məhz Məmməd
Əmin Rəsulzadə oldu. O, Müsavat partiyasını yaratdı. Rəsulzadə
ilk dəfə olaraq öz yazılarında milli
birlik konsepsiyasını ortalığa qoydu. "Milli istiqlal nədir?" fikrini
ortalığa qoydu. Və bunları millətin
şüuruna yeritdi.
Rəsulzadə ilk dəfə olaraq xalqın tarixinə diqqət yetirib, onun türk
xalqı olduğunu araşdırıb ortaya qoydu. Və
o, ilk dəfə olaraq Güney Azərbaycanda
yaşayan türklərin də tarixini araşdırdı və "İran türkləri" başlıqlı serial yazılar yazdı. Güney
Azərbaycanda yaşayan türklərin tarixini, ədəbiyyatını
araşdırdı. Rəsulzadə 1915-ci ildə
"Açıq söz" qəzetini
yaratdı. Azərbaycanın mətbuat tarixində ilk dəfə olaraq bu qəzeti Azərbaycanın ədəbi
türkçəsində çap etdirdi. Yəni demək istəyirəm ki, Rəsulzadənin bu xalqa verdiyi o
qədər dəyərlər var ki, onları sadalamaqla başa çatdırmaq qeyri-mümkündür.
Və nəhayət, Rəsulzadə ilk dəfə olaraq Rusiya ərazisində yaşayan
müsəlmanlara muxtariyyət ideyasını 1917-ci ilin aprelin 15-dən 20-nə
qədər keçirilən Qafqaz Müsəlmanlarının
Qurultayında irəli sürdü. Və
həmin ideyanı bir qədər inkişaf etdirib, 1917-ci ilin mayında Rusiyada keçirilən Rusiya Müsəlmanlarının
Qurultayında irəli sürdü.
Maraqlıdır ki, həmin vaxt Əhməd bəy Sanikovun
Rusiya Müsəlmanları Qurultayında
irəli sürdüyü Rusiya
müsəlmanlarına mədəni muxtariyyət
şüarı o qədər səs toplaya bilmədi. Amma Rəsulzadənin irəli
sürdüyü Rusiya
müsəlmanlarına məhəlli muxtariyyət ideyası səsçoxluğu
ilə üstünlük qazandı. Və
Rəsulzadə artıq Rusiya müsəlmanlarının
lideri olaraq qəbul
edilməyə başlandı. O, böyük
şəxsiyytə çevrildi:
savadı, natiqliyi, dönməzliyi ilə.
Rəsulzadənin
1902-ci ildən başlayan siyasi
fəaliyyət dövründən 1920-ci ilə qədər biz onu haralarda
görürük. Diqqət yetirək:
1900-cü ildən 1909-cu ilə qədər Bakıda fəaliyyət
göstərir. Tiflisdə çap olunan "Şərqi Rus"
qəzetində yazılar çap etdirir. Eləcə də "İrşad"
və "Tərəqqi" qəzetlərində yazılar çap etdirir. Siyasi fəaliyyət göstərir. Rəsulzadə
İosif Stalin ilə
birlikdə siyasi təşkilatda çar Rusiyasına qarşı mübarizə
aparırlar. 1907-1908-ci ildə pyes, teatr tamaşası üçün
əsərlər və şeir yazır,
tərcümələr edir. Yüzlərlə məqalələri "Təkamül",
"Tərəqqi", "İrşad"
və başqa qəzetlərdə çap etdirir. 1909-cu ildən
1911-ci ilə qədər İranda fəaliyyət
göstərir. 1909-cu il avqustun
23-də çapdan çıxan "Yeni İran" adlı qəzetin
naşiri olur. Və Avropa tipli qəzetçiliyin əsasını qoyur. Səttarxan hərəkəti ilə əlaqəli
olur, Səttarxanla görüşür.
Onun haqqında yazılar yazır. İran Demokratik
Partiyasının əsas qurucularından birinə çevrilir. Sonralar
İranın Londonda böyük
elçisi olan Seyid Həsən Tağızadə
yazırdı: "Rəsulzadə bütün
ömrüm boyunca
Şərq dünyasında rastlaşmadığım
fövqəladə, qeyri-adi insanlardan biridir. Belə insana nəinki bizim məkanımızda,
dünyanın istənilən yerində rastlanmaz".
1911-1913-cü illərdə
Rəsulzadə Türkiyədə olur, Türk Ocaqlarında fəal çalışır.
"Türk yurdu"
curnalında yazır. "Ədalətli yol"
curnalında silsilə yazılar yazır. Türkiyə
ictimaiyyətini İranda yaşayan
türk toplumu ilə
tanış edir. Və bu
ona şöhrət gətirir. Ziya Göyalpla, Əli bəy
Hüseynzadə ilə, Zəki Vəli Turanla
birlikdə fəaliyyət göstərirlər. Bu Rəsulzadənin 20-25 yaşında fəaliyyətidir".
"1920-ci ildən sonra..."
Nəsiman Yaqublu Azərbaycan Xalq Cümhuriyyətini Məhəmməd Əmin Rəsulzadənin adı ilə bağladı: "Rəsulzadə 1918-ci il 28 may tarixində yaranan Azərbaycan Xalq Cümhuriyyətinin yaradılmasına nail oldu. Və Azərbaycan parlamentinin yaradılmasında və parlamentdə çoxlu sənədlərin qəbul edilməsində fəal iştirak edir. Rəsulzadə 1918-ci il sentyabrın 15-də Bakının işğaldan azad olunmasında böyük işlər görür. Qafqaz İslam Ordusu Bakıya gələndən sonra onlara ciddi dəstək verir. Türkiyənin hərbi naziri Ənvər Paşa ilə görüşür, ondan əlavə güc-qüvvə istəyir ki, Bakı azad edilsin. Və Bakının azad olunmasına nail olur. Azərbaycanın dövlətçilik tarixini Rəsulzadəsiz təsəvvür etmək olmur. 1920-ci ildən sonra Rəsulzadə çətin, ağır həyat yaşayır".
(Davamı gələn sayımızda)
Ramid İbrahimov
Bizim Yol.- 2014.- 26 iyun.- S.13.