Azərbaycan elminin 70 qızıl ili
Yaxud AMEA-nın
ölkədə elmi-intellektual potensialın milli sərvət
kimi formalaşdırılmasında xidmətləri
2015-ci ildə Azərbaycan Milli Elmlər
Akademiyasının (AMEA) təsis edilməsinin 70 ili tamam olur. Bununla bağlı olaraq Azərbaycan
Respublikasının Prezidenti 14 mart 2014-cü il
tarixdə sərəncam imzalayıb.
Sərəncamda bildirilir: “Ölkədə
elmi-intellektual potensialın milli sərvət kimi
formalaşdırılmasında, elmin dövrün tələblərindən
irəli gələn strateji istiqamətlərinin müəyyənləşdirilməsi
və ən müxtəlif sahələri üzrə yüksəkixtisaslı
kadrların hazırlanmasında Milli Elmlər
Akademiyasının müstəsna rolu vardır. Yarandığı vaxtdan etibarən ötən fəaliyyət
müddəti ərzində o, mühüm nailiyyətlər
qazanmış, elmi məktəblərin qurulmasına müvəffəq
olmuş, beynəlxalq elm strukturlarına uğurla inteqrasiya
etmişdir. Akademiya müstəqil dövlətçiliyin
əsaslarının möhkəmləndirilməsində
öz üzərinə düşən vəzifələrin
öhdəsindən bu gün də layiqincə gəlir və
cəmiyyətin sosial-iqtisadi tərəqqisinə, mədəni-mənəvi
təşəkkülünə töhfələrini əsirgəmir.
Azərbaycan Respublikası Konstitusiyasının 109-cu maddəsinin
32-ci bəndini rəhbər tutaraq, Azərbaycan Milli Elmlər
Akademiyasının respublikada elmin təşkili və
inkişafındakı böyük xidmətlərini nəzərə
alaraq qərara alıram: Azərbaycan Respublikasının
Nazirlər Kabineti Azərbaycan Milli Elmlər Akademiyası ilə
birlikdə Akademiyanın 70 illik yubileyinə həsr olunmuş
tədbirlər planının hazırlanıb həyata
keçirilməsini təmin etsin”.
Azərbaycan Milli Elmlər
Akademiyasının fəaliyyəti nədən ibarətdir? Niyə məhz
Akademiya? Bu və başqa suallara cavab tapmaq
üçün qurumla əlaqə saxladıq. Qurumdan bildirildi ki, AMEA respublikanın əsas elmi
qurumudur. Qurum 1945-ci ildə Bakı şəhərində
təsis edilib. AMEA-dan məlumat verildi ki, 1945-ci il martın 31-də akademiyanın həqiqi
üzvlərinin ilk ümumi iclasında Akademiyaya
M.Mirqasımov prezident seçilib. Sonrakı illərdə Y.Məmmədəliyev
(1947-1950, 1958-1961), M.Əliyev (1950-1958), Z.Xəlilov (1961-1967),
R.İsmayIlov (1967-1970), H.M.Abdullayev (1970-1983), E.Y.Salayev
(1983-1997), F.Q.Maqsudov (1997-2000), M.Kərimov (2001-2013)
Akademiyanın prezidenti olublar. 2013-cü ildən
akademik Akif Əli-zadə AMEA-nın prezidentidir.
Bölmələr
AMEA-nın aşağıdakı
bölmələri var:
1.Fizika-Riyaziyyat və Texnika Elmləri
Bölməsi.
Bu bölməyə Fizika İnstitutu, Akademik Ə.Hüseynov
adına Kibernetika İnstitutu, Riyaziyyat və Mexanika
İnstitutu, Nəsirəddin Tusi adına Şamaxı
Astrofizika Rəsədxanası, Radiasiya Problemləri
İnstitutu, İnformasiya Texnologiyaları İnstitutu daxildir.
2.Kimya Elmləri Bölməsi. Bu bölməyə Akademik
Y.H.Məmmədəliyev adına Neft-Kimya
Prosesləri İnstitutu, Akademik M.F.Nağıyev adına Kimya
Problemləri İnstitutu, Akademik Ə.Quluyev adına
Aşqarlar Kimyası İnstitutu, Polimer Materialları
İnstitutu, Mineral Xammalın Kompleks Emalı Üzrə
Xüsusi Konstruktor-Texnologiya Bürosu elmi təşkilatlar
daxildir.
3. Yer Haqqında
Elmlər Bölməsi. Bu bölməyə Geologiya İnstitutu, Akademik
H.Əliyev adına Coğrafiya İnstitutu, Biologiya və Tibb
Elmləri Bölməsi, Botanika İnstitutu, Zoologiya
İnstitutu, A.İ.Qarayev adına Fiziologiya İnstitutu,
Mikrobiologiya İnstitutu, Mərkəzi Nəbatat bağı, Mərdəkan
Dendrarisi daxildir.
4.Humanitar və İctimai Elmlər
Bölməsi.
Bu bölməyə A.Bakıxanov adına Tarix İnstitutu,
Arxeologiya və Etnoqrafiya İnstitutu, İqtisadiyyat
İnstitutu, Fəlsəfə, Sosiologiya və Hüquq
İnstitutu, Akademik Z.M.Bünyadov adına Şərqşünaslıq
İnstitutu, İnsan Hüquqları üzrə Elmi-Tədqiqat
İnstitutu, Nizami adına Ədəbiyyat İnstitutu, Nəsimi
adına Dilçilik İnstitutu, M.Füzuli adına
Əlyazmalar İnstitutu, Memarlıq və İncəsənət
İnstitutu, Milli Azərbaycan Tarixi Muzeyi, Folklor İnstitutu,
Nizami Gəncəvi adına Milli Azərbaycan Ədəbiyyatı
Muzeyi, Hüseyn Cavidin Ev Muzeyi daxildir.
5.Aqrar Elmlər Bölməsi. Bu bölməyə
Torpaqşünaslıq və Aqrokimya İnstitutu, Genetik
Ehtiyatlar İnstitutu, Azərbaycan Elmi-tədqiqat Eroziya və
Suvarma İnstitutu daxildir.
Akademiya alimlərinin əsərləri 40 ölkədə
20 dildə nəşr olunub
Qurumdan bildirildi ki, 1972-ci ildə
AMEA Naxçıvan filialının elmi mərkəzi
yaradılıb. Akademiyanın əsaslı kitabxanası
var. Akademiya alimləri QİYŞ xətti ilə 12 problem
üzərində müştərək tədqiqat
aparıblar. Akademiya digər xarici ölkələrin
elmi müəssələri ilə əlaqə saxlayır.
Elmin müasir problemlərinə dair fikir mübadiləsi
aparmaq, elmi-tədqiqat təcrübəsini öyrənmək,
elmin təşkili ilə tanış olmaq
məqsədi ilə hər il akademiyaya çoxlu əcnəbi
alim gəlir. Akademiyanın alimləri beynəlxalq
elmi qurultay, konqres və simpoziumlarda elm və texnikanın
aktual problemlərinə dair məruzələrlə
çıxış edirlər. AMEA-nın
təşəbbüsü və təşkilatçılığı
ilə tez-tez beynəlxalq elmi müşavirə və
konfranslar keçirilir. Akademiya alimlərinin
əsərləri 40 ölkədə 20 dildə nəşr
olunub.
Qurumda 2000-ci ildə 116 problemin 387
mövzusu və 1044 işi üzrə elmi tədqiqatlar
aparılıb və 175 mühüm elmi nəticə
alınıb. AMEA-nın institutları, xüsusi konstruktor
büroları və təcrübə zavodları 46 elmi-tədqiqat
işinin nəticələrini tətbiq etmək
üçün tədbirlər həyata keçirib, bu
işlərdən 26-nın tətbiqi başa çatıb,
18-i isə 2000-ci il üçün nəzərdə
tutulmuş plan həcmində yerinə yetirilib.
2000-ci ildə 224 kitab və 3027 məqalə,
o cümlədən, 1034 məqalə xaricdə çap
edilib. AMEA-nın 187 əməkdaşı xarici
dövlətlərə ezam olunub, 20 nəfər xarici qonaq qəbul
edilib. 1995-2000-ci illərdə EA-nın elmi müəssisələrində
737 mühüm nəticə alınıb, 829 kitab və 11929
məqalə çap edilib, 61 doktorluq və 291 namizədlik
dissertasiyası müdafiə edilib, aspiranturaya 497 nəfər
qəbul olunub. İstehsalatda 278 iş tətbiq olunub, 800-dən
artıq elmi işçi xarici ölkələrdə ezamiyyətdə
olub.
2005-ci ildə isə
Akademiyanın elmi müəssisələrində 159 problemin
488 mövzusu üzrə tədqiqatlar aparılıb və
140-dan artıq mühüm elmi nəticə alınıb. 71 elmi-tədqiqat işinin nəticələrini
tətbiq etmək üçün tədbirlər həyata
keçirilib, bu işlərin 42-sinin tətbiqi başa
çatıb, 27 iş hesabat ili
üçün nəzərdə tutulmuş plan həcmində
yerinə yetirilib, plandan əlavə isə 9 iş tətbiq
olunub. 350-dən çox kitab, 4800-ə yaxın
məqalə, o cümlədən 900-dən çox məqalə
xaricdə çap edilib. 50-yə yaxın
patent, müxtəlif fond və qurumlardan 70-ə yaxın qrant
alınıb.
Niyə məhz Akademiya?
Tanıdığımız,
fəaliyyət istiqamətlərinə bələd
olduğumuz saysız-hesabsız elm ocaqları mövcuddur. Elmi müəssisə,
təşkilat dedikdə, ilk növbədə göz
önünə Akademiya gəlir. Bəs,
niyə məhz Akademiya?
Həyatda heç bir şey
təsadüfi olmadığı kimi, “Akademiya” adı da təsadüfən
seçilməyib. Bəşər yaranandan
saysız-hesabsız alimin yetişdiyi elm məbədgahı
bir zamanlar Afina yaxınlığında yaşayan mifik qəhrəman
Akademinin şərəfinə belə adlandırılıb.
Sonralar (b.e. əvvəl 427-347-ci illərdə)
məhz bu qəhrəmanın adını daşıyan ərazidə
Platon tərəfindən əsası qoyulmuş ilk elmi məktəb
“Akademiya ” adlandırmışlar. O zamandan
etibarən bütün elmi məktəblər və digər
elm ocaqları “Akademiya ”
adlandırılıb. XII-XIV əsrlərdə geniş
vüsət alan bir çox Qərbi Avropa
və Şərq elmi birliklərinə də Akademiya adı
verilib.
Qeyd edək ki, 10 Noyabr Sülh və
İnkişaf Naminə Ümumdünya Elm Günüdür. VII əsrin tanınmış hind alimi, müdrik kəlamlar
ustadı Bhartihari elmin beynəlmiləlləşməsi zəruriliyini
“Elm bölüşdükcə artan xəzinədir” deməklə
ifadə edib. Bir zamanlar Qərb alimlərinin
Şərqə üz tutaraq gəlməsi və burada məhz
birgə əməkdaşlıq sayəsində bir çox
elmlərin əsasının qoyulması danılmaz
faktdır.
Müasir dövrdə elmin
dinamik inkişafını əməkdaşlıq əlaqələrini
genişləndirmədən təsəvvür etmək
qeyri-mümkündür. Hazırda ən nüfuzlu elmi təşkilatlar
və institutlar belə dünya ölkələrinin, o
cümlədən Azərbaycanın elmi qurumları ilə əməkdaşlıq
əlaqələrini inkişaf etdirməkdə
maraqlıdırlar. Bu vacib meyarı dəyərləndirən
BMT Sülh və İnkişaf Naminə Ümumdünya Elm
Gününə həsr olunmuş ilk rəsmi konfransda üzv
dövlətləri təkidlə alimlər arasında beynəlxalq
əməkdaşlıq əlaqələrinin
yaradılması, inkişaf etdirilməsinə dəstək
olmağa çağırıb. Həmin
çağırış indi də qüvvədədir və
bu gün dünya alimlərinin birliyinə daha çox ehtiyac
duyulur.
Hər il elm həftəsinin
keçirilməsi beynəlxalq miqyasda yeni cəmiyyətin
quruculuğuna böyük töhfədir. Bu
hadisə müxtəlif mövzular üzrə daha geniş
şəkildə, əhəmiyyətli elmi mübadiləyə,
eləcə də elm və sülhə dair problemlərin
qarşılıqlı əlaqəsi ilə bağlı
ictimaiyyətin maarifləndirilməsinə meydan açır.
Hər il elm həftəsi
iştirakçılarının sayının artması, eləcə
də müxtəlif ölkələrin rəhbərləri tərəfindən
milli elm gününün təsis olunması da buna dəlalət
edir.
YUNESKO ənənəvi olaraq hər il elmi və ictimai kollektivlər, təhsil
müəssisələri və hökumət təşkilatları
ilə Beynəlxalq Elm Gününün hədəflərini
təcəssüm etdirən iri miqyaslı layihələr həyata
keçirir. 2002-ci ildən etibarən dünyada qeyd edilən
elm həftəsi çərçivəsində universitet və
digər ali təhsil müəssisələri,
elmi institutlar, assosiasiyalar tərəfindən elmi-texniki tərəqqi
ilə sülh və təhlükəsizliyə dəstək
arasında əlaqələr haqda informasiyanı özündə
əks etdirən seminarlar, xüsusi diskussiyalar və digər
tədbirlər keçirilir. Bu tədbirlərin
sırasına elmi əməkdaşlığın
inkişafında xüsusi rola malik açıq qapı
günləri, seminar və dəyirmi masalar, muzey və sərgilərə
ekskursiyaların təşkili və s. daxildir.
Ramid İBRAHİMOV
Bizim
yol.-2014.-29 mart.-S.11.