Azərbaycan incəsənətində «YARAT» izi

Müasir İncəsənət Məkanı yaradıcı gənclərə mühüm dəstək verir

“2011-ci ildə Aida Mahmudova tərəfindən təsis olunan “YARAT” qeyri-kommersiya təşkilatı Azərbaycanda müasir incəsənətin inkişafı və onun ictimaiyyət tərəfindən dərk olunması sahəsində fəaliyyət göstərir, habelə ölkə daxilində və beynəlxalq səviyyədə Azərbaycan incəsənətinin təmsil olunması ilə məşğuldur”. Bu barədə “Bizim Yol” qəzetinı “YARAT” Müasir İncəsənət Məkanından məlumat verildi.

Məlumatda bildirilir ki, adı “yaratmaq” sözündən əmələ gələn “YARAT” təşkilatının əsas fəaliyyətlərini sərgi proqramları, təhsil tədbirləri və festivallar təşkil edir. “YARAT” yerli və beynəlxalq incəsənət şəbəkələri, o cümlədən, müxtəlif fondlar, sərgi salonları və muzeylər arasında dialoqun qurulması və təcrübə mübadiləsinin həyata keçirilməsi sahəsində çalışır. “YARAT”-ın həyata keçirdiyi təhsil proqramları silsiləsi qlobal səviyyədə mədəniyyətlərarası dialoqun və əməkdaşlığın yaranması üçün imkan yaradır.

Məlumatda o da qeyd edilir ki, “YARAT-ın, əsas məqsədi gənc və istedadlı nəslin motivasiyası və inkişafına istiqamətləndirilmiş peşəkar platformanın yaradılması, incəsənət institutlarının tələbə və məzunlarına “ARTIM Young Artists Project” adlı layihə vasitəsi ilə dəstək verməsini öz öhdəsinə götürür: “Bu isə öz növbəsində rəssamın və onun əsərlərinin peşəkar mühitdə iştirakı, digər incəsənət təşkilatlarının diqqəti cəlb edilməsi, müasir incəsənət sahəsində uğurlu karyeranın qurulmasına imkan əldə etməsidir. YARAT müasir incəsənətlə bağlı mühazirələr, seminarlar və master-klasslar keçirməklə, xüsusi təhsil proqramını, tətbiq edəcəkdir, həm də ressam-rezedensiyaları keciriləcək”.

“YARAT”-ın incəsənət-təhsil layihələri...

“YARAT” müasir incəsənət təşkilatı peşəkar sənətkarlar, həvəskarlar, uşaqlar və incəsənətin tədrisi ilə məşğul olanlar, qısaca desək, hər kəs üçün nəzərdə tutulan təhsil proqramları həyata keçirir. Təşkilat yerli və beynəlxalq rəssamlar cəmiyyətləri, o cümlədən, fondlar, incəsənət məktəbləri və muzeylər arasında dialoqun qurulması və təcrübə mübadiləsinin aparılması sahəsində xidmət göstərir; “YARAT” mühazirələr, seminarlar, məşğələlər, habelə xaricdə tərəfdaş təşkilatlarla birlikdə stipendiya proqramları təşkil etməklə məşğuldur.

Azərbaycan dilindən “tərəqqi” kimi tərcümə olunan və “YARAT”-ın gənc rəssamlar üçün nəzərdə tutulan ARTIM layihəsinin əsas məqsədi ölkənin gənc nəslinin istedadlı nümayəndələrini incəsənət sahəsində karyera qurmağa təşviq etmək, habelə gənc rəssamlara peşəkar səhnədə öz əsərlərini nümayiş etdirmək üçün müvafiq şərait yaratmaq olub.

“YARAT”-ın təhsil layihələri təşkilatın əsas fəaliyyətlərini təşkil edir, və onların icra müddəti ilbəil uzadılır. 2013-cü il ərzində həyata keçiriləcək təhsil təşəbbüslərinin sayı 2012-ci illə müqayisədə üç dəfə artmalıdır, və bu təşəbbüslərdə xarici rəssamların daha geniş təmsil olunması nəzərdə tutulur.

Kursda tələbələri incəsənətin tarixi tanış edəcəklər

“YARAT” Müasir İncəsənət Məkanının təşkilatçılığı ilə iyunun 1-dən 30-dək həftədə 3 dəfə olmaqla Teymur Daiminin rəhbərliyi altında kurs təşkil olunacaq. Bu barədə təşkilatdan məlumat verildi. Məlumata görə, Teymur Daimi həm multimedia rəssamı, film yaradıcısı, filosof alim, incəsənət və kino tənqidçisi, incəsənət üzrə məsləhətçi, müəllim, həm də publisist və şairdir. Onun peşəkar maraq dairəsi təsviri incəsənət, kinematoqrafiya, eksperimental kino, qavrayış nəzəriyyəsi, incəsənət barədə yazı, pedaqoji təcrübə, neyropsixologiya, tətbiqi psixologiya, antropoloji təcrübələri özündə birləşdirən müxtəlif sahəli fəaliyyəti əhatə edir.

Kursun məqsədi tələbələrə müxtəlif analitik texnikaları təqdim etmək, onların yazı qabiliyyətlərini dəyişmək və nəticədə onları müasir incəsənət və mədəniyyət istiqamətində tənqidi və analitik mətnlə peşəkar işləmək üçün hazırlamaqdır. Kurs nəzəri və praktik hissədən ibarət olacaq. Nəzəri hissə tələbələri incəsənət tarixi, xüsusilə müasir incəsənət tarixi ilə tanış edəcək, onlara yaradıcı yazının və tənqidi analizin əsaslarının tətbiqini öyrənməkdə kömək edəcəkdir. Praktik hissə tələbələrə onların öz yazıları üzərində daim işləmək üsulunu aşılayacaqdır. Kursun sonuna yaxın hər tələbə müstəqil şəkildə analitik mətn yazmağı bacarmalıdır.

Tələbələr kurs çərçivəsində muzey, qalereya, rəssam studiyaları və incəsənətlə bağlı digər məkanları ziyarət edəcəklər.

Kursun hədəf qrupu sözün sehri, incəsənət və mədəniyyətin fəlsəfəsinə dərin marağı olan və mədəniyyət analitiki, incəsənət publisisti peşəsinə sahib olmağı arzulayan və yaxud özünün intellektual fəaliyyətini daha məhsuldar etmək istəyən humanitar sahənin tələbələri və ya gənc peşəkarlardır. Yaxşı yazı qabiliyyəti vacib şərtdir. İyun ayında 4 həftə ərzində keçiriləcək kursda hər dərsin müddəti 3-5 saatdır (dəyişə bilər). İlk 3 həftə nəzəri-praktiki hissəyə, sonuncu həftə isə tam müstəqil fəaliyyətə həsr ediləcək. Tələbələr kursun rəhbəri ilə gündəlik ünsiyyətdə olaraq başlıca analitik mətnləri yazmaq üzrə istiqamətləndiriləcəklər. Sonda tələbələrin müəllifi olduqları müasir incəsənətə həsr edilən işlərin məqalə toplusu və yaxud elektron mediada nəşri, o cümlədən tələbələrin ən yaxşı və uğurlu yazılarının ən nüfuzlu jurnallarda dərc edilməsi təklif olunacaqdır.

Rəssamlar…

“YARAT”ın dəstəyi ilə rəssamlar Aida Mahmudovanın, Leyla Əliyevanın, Hüseyn Haqverdiyevin, Məmməd Mustafayevin, Ramal Kazımovun və başqalarının sərgiləri təşkil olunub.

Sərgisi təşkil olunanalardan olan Ramal Kazımovla yaradıcılığı-rəssamlıq fəaliyyəti ilə bağlı həmsöhbət olduq. Söhbətimizi təqdim etməmişdən öncə, müsahibiz haqqında qısa məlumat verək. Ramal Kazimov 1987-ci ildə Gəncə şəhərində anadan olub. Azərbaycan Dövlət Rəssamlıq Akademiyasında rəngkarlıq ixtisası üzrə ali təhsil alıb. Ramal Kazımovun iştirak etdiyi sərgilər: 2006-cı ildə Şimali Kipr Türk Respublikasının Yaxın Şərq Universitetinin təşkil etdiyi sərgidə, 2007-ci ildə İsrail Dövlətinin qurulmasının 60-cı ildönümünə həsr olunan sərgidə, 2011-ci ildə "Ön Söz", "YARAT! Müasir İncəsənət Məkanı" tərəfindən təşkil olunan sərgidə, 2011-ci ildə "Almaniya Azərbaycan rəssamlarının gözü ilə" sərgisində və 2012-ci ildə "Birləşən Körpülər", "YARAT! Müasir İncəsənət Məkanı" tərəfindən təşkil olunan sərgidə iştirak edib.

““YARAT” Müasir İncəsənət Məkanı müasir Azərbaycan incəsənətini tam və maraqlı şəkildə təqdim etmək, habelə bakılıları dünya incəsənətində peyda olan yeni cərəyanlar və adlarla tanış etmək məqsədini qoyur. "Yay" qalereyası rəssamların yaradıcılıq sınaqları üçün daimi meydançasıdır. “YARAT”ın dəstəyi ilə 2012-ci ildə açılmış "Yay" qalereyasında mənim fərdi sərgim açıldı.

İncəsənət xadimlərinin, rəssamların, tənqidçilərin mənim sənət yolum haqında fikiri belədir ki, əsərlərimdə ekspressionist rəssamların təsiri duyulur. Mən insanı çəkirəm. Əsərlərimdə bəzi personajlar "qorxu", "xəcalət" və "həyəcan" məfhumlarının vizual əksinə bənzəyirlər”, deyə rəssam Ramal Kazımov bildirdi.

««YARAT”ın dəstəyi nəticəsində mənim fərdi sərgim təşkil olunub”

Rəssamın sözlərinə görə, istedadlı gənc rəssamlara “YARAT” dəstək olur: “Dəstək nəticəsində Azərbaycan rəssamlarının əsərləri tanınır, təbliğ olunur. Hətta sözügedən təşkilat rəssamların xarici ölkələrə keçirilən sərgidə iştirak etməsi üçün maddi dəstək də olur. Təşkilatçılığı da “YARAT” öz üzərinə götürür. Bu təşkilat istedadlı Azərbaycan rəssamlarının ölkə daxilində və xaricində təhsil alması üçün kömək olurlar. Sirr deyil ki, rəsm üçün materiallar bahadır. Rəsm materiallarının alınması üçün müraciət edəndə “YARAT” müraciət edən rəssama maliyyə yardımı ayırır.

Müasir incəsənətdən məlumatlı olmaq üçün dinləmələr keçirilir. Mən özüm də həmin dinləmələrdə iştirak etmişəm. Xarici rəssamlarla görüşlər olub, o görüşlərdə iştirakçı olmuşam. Bildirim ki, “YARAT”ın dəstəyi nəticəsində mənim fərdi sərgim təşkil olunub. Mən çox razı qalmışam. Heykəltaraşlıq fəliyyətim də var. Bu fəaliyyətimi gerçəkləşdirmək keçirmək üçün də təşkilat mənə dəstək oldu. Heykəllər yaratdım və bu heykəllər Fransaya da aparıldı. “YARAT” doğma evimiz olub. Bizə hər çür şərait və imkanlar yaradılıb, heç bir mane, müdaxilə olmur. Sərbəst yaradıcılığımızla məşğul oluruq. Bizi yaxşı anlayırlar. Bu da məni şad edir”.

Ramid İbrahimov

Bizim yol.-2014.-1 may.-S.13.