Azərbaycan maarifçiliyinin görkəmli siması

Əli bəy Hüseynzadənin həyat və yaradıcılığını əks etirən sərgi təşkil edilib

Azərbaycan Milli Elmlər Akademiyasının (AMEA) Mərkəzi Elmi Kitabxanasında Əli bəy Hüseynzadənin həyat və yaradıcılığını əks etirən sərgi təşkil edilib. Bu barədə “Bizim Yol”a Mərkəzi Elmi Kitabxananın mətbuat xidmətindən məlumat verilib.

Məlumatda bildirilir: “Məlum olduğu kimi, Prezident İlham Əliyev “Əli bəy Hüseynzadənin 150 illik yubileyinin keçirilməsi haqqında” Sərəncam imzalayıb. Bununla əlaqədar olaraq AMEA Mərkəzi Elmi Kitabxanasında ədibin yubileyinə həsr olunmuş sərgi təşkil olunub. Sərgidə Ə.Hüseynzadənin həyat və yaradıcılığını əks etdirən kitablar nümayiş olunub. Müxtəlif bölmələr üzrə “Türklər kimdir, kimlərdən ibarətdir”, iki cilddən ibarət “Seçilmiş əsərlər”i, “Qərbin iki dastanında Türk”, “Siyasəti-fürüsat”, “Qırmızı qaranlıqlar içində yaşıl işıqlar”, həmçinin nəşrində ədibin böyük əməyi olduğu “Füyuzat” jurnalı və s. sərgilənib”.

Məlumata görə, sərgidə nümayiş olunan 150-yə yaxın ədəbiyyat Azərbaycan, rus, türk və Qərbi Avropa dillərində təqdim olunub. Sərgidə həmçinin foto və videomateriallar da öz əksini tapıb.

Məlumatda bildirilir ki, Əli bəy Hüseynzadə (24 fevral 1864-17 mart 1940) Azərbaycan ədibi, filosof və ədəbiyyat tənqidçisi, XX əsr Azərbaycan-türk ictimai fikrinin ən görkəmli nümayəndələrindən biridir. Uzun müddət alim, həkim, rəssam, şair, tənqidçi, tərcüməçi, müəllim, jurnalist kimi fəaliyyət göstərib, bu sahələrin hər birində özünəməxsus iz qoyub. XX əsr Azərbaycan mətbuatı və publisistikası sahəsində müstəsna xidmətləri var.

Azərbaycan Xalq Cümhuriyyəti dövründə dövlət bayrağında üç rənglə (mavi, qırmızı, yaşıl) simvollaşan Azərbaycan vətəndaşının ideya-mənəvi dəyərləri Əli bəy Hüseynzadənin həmin tezisi və füyuzatçıların tarixi xidmətləri ilə bağlıdır. Ə.Hüseynzadə, həmçinin Sankt-Peterburq İmperator Rəssamlıq Akademiyasında təhsil alıb və bir sıra portret və mənzərələrin müəllifidir. Onun rəsmləri Bakı muzeylərində, İstanbul və Parisdə şəxsi kolleksiyalarda saxlanılır.

Qeyd edək ki, 21 yanvar 2014-cü il tarixdə Azərbaycan Respublikasının Prezidenti İlham Əliyev “Əli bəy Hüseynzadənin 150 illik yubileyinin keçirilməsi haqqında” sərəncam imzalayıb. Sərəncamda bildirilir: “2014-cü ilin fevral ayında Azərbaycan ictimai fikrinin görkəmli nümayəndəsi, tanınmış maarifçi və yazıçı-publisist Əli bəy Hüseynzadənin anadan olmasının 150 illiyi tamam olur. Türk xalqlarının mədəni inteqrasiyasının məfkurə kimi təşəkkül tapmasında mühüm rol oynayan, müasir cəmiyyət quruculuğunda demokratik prinsiplərin ənənəvi dəyərlər zəminində bərqərar olmasının vacibliyini irəli sürən və müstəqil milli dövlətçiliyin nəzəri əsaslarının işlənib hazırlanmasında yaxından iştirak edən, eləcə də çoxşaxəli fəaliyyəti boyunca yaratdığı zəngin fəlsəfi-publisistik, ədəbi-elmi irsi sayəsində Azərbaycan maarifçiliyi tarixinə qiymətli töhfələr verən görkəmli ictimai xadimdir”.

Sərəncamdan irəli gələrək Mədəniyyət və Turizm Nazirliyi, Təhsil Nazirliyi və Azərbaycan Milli Elmlər Akademiyası ilə birlikdə, Azərbaycan Yazıçılar Birliyinin təklifləri nəzərə alınmaqla, Əli bəy Hüseynzadənin 150 illik yubileyinə həsr olunmuş tədbirlər planını hazırlayıb həyata keçirilməsi tapşırılıb.

Ramid İbrahimov

Bizim yol.-2014.-21 may.-S.13.