Yazarlar savaşa hazırdır

“Kaş, İrəvana bayrağı mən sancam...”

İşğalçı Ermənistanın təxribatları nəticəsində Qarabağda atəşkəs pozuldu, döyüş əməliyyatları yenidən bərpa olundu. Azərbaycan cəmiyyətində döyüş əhval-ruhiyyəsi, Vətən torpaqları uğrunda savaşmaq əzmi yüksəkdir. Yazarlar necə, savaşa hazırdırmı? Tanınmış yazarların fikirlərini öyrəndik.

Yazıçı-publisist Əkbər Qoşalı: "Mən həqiqi hərbi xidmətimi Silahlı Qüvvələrimizin zabiti olaraq, "N" saylı hərbi hissənin Tank Əleyhinə Artilleriya Divizyonunda keçmişəm. İndi də, hansı sahədə ehtiyac olarsa, orda gücümüzü, ürəyimizi qoymalıyıq. Tale elə gətirib, mülki həyatda, demək olar, çoxfunksiyalı işlərlə uğraşmışıq. Mən 1-ci ali təhsilimi "elektronika mühəndisliyi", 2-ci ali təhsilimi isə "inzibati idarəetmə" üzrə almışam; qabaqlar Gənclər-İdman Nazirliyində İctimai-siyasi şöbədə çalışmış, hazırda da Azərbaycanda Atatürk Mərkəzində İctimai-siyasi şöbə müdiriyəm; habelə, ictimai fikir məni yazıçı-publisist olaraq, türkologiya sahəsində araşdımaçı olaraq tanıyır, - bax, bu səbəblərdən, orduda hansı ixtisasımız, hansı qabiliyyətimiz, işimiz daha yararlı bilinərsə, o da qəbulumuzdur. Atatürkün dünyaca ünlü sözü ilə desək, "Söhbətin mövzusu Vətənsə, gerisi təfərrüatdır"..!

YYSQ sədri, kitabxana.net - Milli Virtual-Elektron Kitabxananın rəhbəri, yazıçı-kulturoloq Aydın Xan Əbilov: "Azərbaycanın iqtisadi-siyasi, elmi-hərbi, texniki-texnoloji imkanları o səviyyəyə qalxıb ki, mürəkkəb peşəkar ordu quruculuğunun yeni mərhələsinə qədəm qoyub və son günlərdəki istər savaş meydanında, istərsə də beynəlxalq geosiyasi məkanlardakı qələbələrimiz, davamlı uğurlarımız öz real bəhrəsini nümayiş etdirdi. O mənada nəinki yazarlarımız, eləcə də digər sahələrin adamlarının da böyük vətən müharibəsi başlanacağı təqdirdə ön cəhbəyə yollanmasına ehtiyac yoxdur. Bir analitik kimi bizim milli ordumuzdakı peşəkar hərbçilər - əsgər, gizir, zabit və generalların bacarıqlarına, hərbi bilik qabiliyyətlərinə bələdəm deyə, inanıram ki, Ali Baş Komandan - Prezident İlham Əliyevin bircə əmri ilə qısa müddətdə nəinki Dağlıq Qarabağ və onun ətrafında işğal olunmuş torpaqları, həmçinin Qərbi Azərbaycan - İrəvan, Göyçə mahalını da geri qaytarmaq iqtidarında olan orduya sahibik. Düşüncəmə görə, yazıçı və intellektuallarımız yalnız ideoloji-psixoloji, mənəvi-estetik sahələrdə ordumuza xidmət göstərə bilərlər. Vaxtilə Şah Xətai babamız döyüşə gedən zaman xalqın düşünən beyinləri, danışan dilləri, yazan əlləri gələcək nəsillərin inkişafı naminə şair və aşıqları gizlədirdi ki, onlara əllər toxunmasın.

Qaldı qoyulan məsələnin birbaşa mənasında cavabına, əgər lazım gəlsə özümü kəşfiyyatçı və ya siyasi məsələlər üzrə cavabdeh bir hərbçi kimi görürəm, ehtiyac duyulsa, günü bu gün döyüş meydanına yollanmağa hazıram: təki Vətən uğrunda vuruşaraq qəhrəmanlıq mərtəbəsinə ucalım, adımı şərəfli tarixə həkk edə bilim..."

Yazıçı Rövşən Yerfi: "Əlbəttə, özünü bu xalqın, dövlətin vətəndaşı hiss edən hər bir kəs hər an düşmənlə mübarizəyə hazır olmalıdır, tərəddüd keçirməməlidir. Hərbi heyət məsələsinə gəldikdə isə hər kəs bacardığı işlə xidmət edib mübarizəyə fayda verməlidir. Əgər mən Sovet Ordusunda hərbi inşaatçı olmuşamsa aviasiyaya necə iddia edə bilərəm?. Belə çətin günlərdə özünü yazıçı hesab edən adamın məsuliyyəti başqalarından daha artıq olmalıdır. Bu gün yazıçı ona həvalə olunmuş əməli xidmətdən əlavə, ətrafındakı insanlarda qələbə əzminin artmasına, ruh yüksəlişinə də qabiliyyətinin çatdığı qədər kömək etməlidir. Yox, qabiliyyəti çatmırsa, ən azından susmalıdı"

Şair Xanəmir Telmanoğlu: "Gecələr üzü İrəvana yatdığım bu zaman kəsimində Rəbbim elə imkan yaratsın ki, torpaqlarımız uğrunda gedən gerçək savaşda son nəfəsimə qədər döyüşüm, sonra şəhid olum. Gavurun torunda balıq misalı partlaşan torpağımız uğrunda şəhid olmaq mənim ən böyük xəstəliyimdir. Həmişə ürəyimdən bir duyğu keçib, kaş, İrəvana bayrağı mən sancam… Məmnuniyyətlə, kəşfiyyatçı kimi istənilən tapşırığı yerinə yetirməyə hazıram".

Güneyli yazıçı Sayman Aruz: "Mən hər şeydən öncə azərbaycanlıyam. Ona görə də Vətən uğrunda hər an döyüşməyə hazıram. Mənim həyatımdan heç zaman müharibə əskik olmayıb və bütün ömrüm istər tüfəng və mərmi, istərsə də soyuq müharibə ilə keçib. Qismət olur Vətən uğrunda Müharibəyə gedərəmsə, harada lazım görülsə, orada da xidmət edərəm, ancaq həmişə kəşfiyyatçı olmaq istəmişəm".

Yazıçı Kənan Hacı: Son günlər mən xalqımızla qürur duydum. Mən özüm Silahlı Qüvvələrin ehtiyatda olan əsgəriyəm. Ali Baş Komandanımızın əmrini gözləyirəm. Ön cəbhədə döyüşməyə hazıram! Qətiyyən ruhdan düşmək olmaz. Son iki-üç gün ərzində ordumuz bir neçə yüksəkliyi işğaldan azad etdi. Bu, qələbədir. Ermənilər ordumuzun gücünü gördü. Onlar anladılar ki, o torpaqlarda heç vaxt rahat yaşaya bilməyəcəklər".

Yazıçı Cəlil Cavanşir: " Bu barədə artıq fikir bildirmişəm, amma təkrar edirəm: Mən hər zaman müharibəyə hazıram. Müharibəyə nifrət etsəm də, Azərbaycanın haqq savaşında sıravi əsgər olmaq mənim üçün fəxrdir. Hara göndərsələr, hansı qoşun növündə məsləhət bilsələr xidmət edərəm. Amma aviasiya və ya kəşfiyyat peşəkar, ixtisaslaşmış sahədir. Texniki sahə də həmçinin. Elə sıravi Hacıyev kimi xidmət edə bilərəm".

Şair Aqşin Yenisey: "Son döyüşlər onu göstərdi ki, Azərbaycanda nəinki kişilər, qadınlar da döyüşməyə, ölkənin təhqir olunmuş qürurunu özünə qaytarmağa hazırdırlar. Konkret mənə gəlincə, ehtiyatda olan zabitəm, əgər ehtiyac olsa, hazıram. Hərbi ixtisasım isə zenit-raket tağımının idarə olunmasıdır. Aşağı-yuxarı şairliklə üst-üstə düşən bir sahədir".

Şair Emin Piri: "Hazır olmağın bir yolu var. O da könüllü olaraq komissarlıqlara müraciət etməkdir. Mən də artıq bunu etmişəm. Ən yaxşısını isə dövlətimiz bilər. Nəyi uyğun bilsə o sahədə də əmri yerinə yetirməliyik. Bunun başqa izahı yoxdur".

Şair Fərid Hüseyn: "Müharibə vaxtı seçim bizim olmur, ancaq təcrübəm olan sahədə fəaliyyət göstərərdim ki, işləri yarıdım. Döyüşə isə həmişə hazırıq".

Yazıçı Dilqəm Əhməd: "Ordumuzun son iki gündəki qələbəsi göstərdi ki, ordumuz döyüşə hazırdır, xalqımız da bu prosesə dəstək vermək üçün əmr gözləyir. Bakıdan və rayonlarımızdan cəbhə bölgəsinə yola düşən könüllülərimiz göstərdi ki, xalqımız səfərbərliyə hazırdır, ehtiyac olarsa, döyüşməkdən çəkinməyəcək. Yazarların isə borcudur ki, sülh və ədalət naminə mesajlar versin. Hazırda yeganə ədalət Azərbaycan torpaqlarının işğaldan azad edilməsidir ki, yazıçılarımız bu istiqamətdə fikirlər söyləməlidir. Birbaşa cəbhə bölgəsində iştiraka gəldikdə isə, hərbi xidmətdə olan hər bir kəs kimi biz də ən azından avtomatdan necə atəş açmağı bilirik və ehtiyac olduqda hamı kimi yola düşəcəyik".

Leyla Namazova

Bizim Yol.- 2016.- 12 aprel.- S.15.