Açıq kitabxana layihəsinin açılışı olub

Dünən Mirzə Fətəli Axundzadə adına Azərbaycan Milli Kitabxanasının nəzdində Açıq kitabxana layihəsinin açılış mərasimi keçirilib.

Mədəniyyət və Turizm Nazirliyi və Azərbaycan Milli Kitabxanasının birgə reallaşdırdığı Açıq kitabxana layihəsi bütün günü açıq səma altında çalışan kitabxana və sərbəst mütaliə mərkəzidir.

Tədbirdə ilk olaraq Açıq kitabxananın rəmzi açılışını bildirən qırmızı lent kəsilib.

Tədbiri giriş sözü ilə açan M. F. Axundzadə adına Azərbaycan Milli Kitabxanasının direktoru, professor Kərim Tahirov bildirib ki, Açıq kitabxana “Mən oxudum, sən də oxu!” devizi altında fəaliyyət göstərəcək: “Yəni burada istənilən şəxs evində olan, lakin istifadə etmədiyi kitabı gətirib oxumadığı başqa bir kitabla dəyişə bilər və ya gətirdiyi kitabların əvəzində yeni kitabları götürüb mütaliə üçün apara bilər”.

Direktor qeyd edib ki, Açıq kitabxanaya giriş sərbəstdir, günün istənilən vaxtı hər kəs müraciət edə bilər. K. Tahirov onu da əlavə edib ki, Açıq kitabxanada “Poeziya gecələri”, “Şeir axşamları”, yazıçı və şairlərlə, kitab müəllifləri ilə görüşlər keçiriləcək, kitab təqdimatları təşkil olunacaq: “Yaxın günlərdə burada onlayn kitab satışı da həyata keçiriləcək”.

Tədbirdə çıxış edən mədəniyyət və turizm naziri Əbülfəz Qarayev bildirib ki, dünya ölkələrində tətbiq edilən bu ideya artıq Azərbaycanda da tətbiq olunmağa başlayıb və ölkənin bir neçə regionunda Açıq kitabxanalar fəaliyyət göstərir. Nazir qeyd edib ki, yaxın gələcəkdə çimərliklərdə də Açıq kitabxanalar yaradılacaq.

Tədbirdə Azərbaycan Yazıçılar Birliyinin sədri Anar, millət vəkilləri Qənirə Paşayeva, Nizami Cəfərov, Hikmət Babaoğlu və başqaları çıxış edib.

Bizim Yol.- 2016.- 16 iyul.- S.4.