40 illik şərəfli müəllim ömrü

İnsanların səadəti naminə təmiz, ülvi hisslərlə yaşamağı bacaran, əzəldən ali məqsədi Vətəninə, millətinə fayda vermək olan və gözəl əməlləri sayəsində bütün Masallı rayonunda tanınan, sevilən Mehman Məmmədovdan danışmaq istəyirəm.

Bəri başdan deyim ki, öz sadəliyi, insani keyfiyyətləri ilə təmiz nüfuz sahibi olan, yurduna bağlı əsl vətənpərvər ziyalı indi 40 ildir gənc nəslin bir şəxsiyyət kimi yetişməsində öz bilik və bacarığını əsirgəmir. Ən əsası çalışdığı işdə müəllim peşəsinə sədaqətini, doğma Azərbaycana məhəbbətini bir an belə unutmayıb. İllərdir Mehman müəllimin nəcib həyat amalı, xeyirxah məqsədləri bizdən ötrü məhəbbət soraqlı, sədaqət ünvanlı günlərə yol açır.

Hər bir vətən övladının kamil, xoşbəxt yaşaması naminə xoş əməllərə dönüb ürəklərə yağması özünəməxsus mənəviyyat fəlsəfəsindən irəli gəlir.Mehman müəllim öz işini ürəklə görməklə bərabər, imkan tapan kimi hamıya yaxşılıq edir, özü də elə ayların, illərin səfində yaxşılıq gözündə ucalır.Bütün bu bəşəri, ülvi dəyərlərlə zaman-zaman doğma yurda, insanlara sevgi nümunəsi olan səmərəli, şərəfli bir həyat yolu yaşayır.Daxili aləmi gözəldir, cəmiyyətdə gördükləri də buna bənzəyir.Bir də canında, qanında el məhəbbətini gəzdirən nurlu şəxsiyyət şərdən-xətadan uzaq sevdalı dünyası vardır.Kim ki, haqq naminə bu dünyanın təmənnasız hərarətinə tapınır xoşbəxtlik özü gəlir onu tapır.

Əslən, qəlbən, ruhən müəllim olan Mehman Məmmədov ilk əmək fəaliyyətinə doğulub boya-başa çatdığı Masallı rayonu, Ərkivan kəndindəki Həsənəkücə səkkizillik məktəbində başlayır.Belə ki, Azərbaycan Pedaqoji Xarici Dillər İnstitutunun fransız və ingilis dil ixtisası üzrə tam kursunu bitirib bu təhsil ocağında ixtisası üzrə müəllimi işləyir.Əlinə jurnal götürüb şagirdlərin qarşısına çıxanı yüksək zəkası, istedadı, əxlaqi dəyərləri Mehman müəllimə ən etibarlı yardımçı durur. O, gündən bəri sevib-seçdiyi sənətin hörmət-izzətini sağlam əqidəsi, saf düşüncəsi ilə uca tutmağa çalışır. Varlığından, şüur və təfəkküründən süzülüb gələnlər insanları saflığa, təmizliyə aparır.Gözünün nurunu, qəlbinin hərarətini sinif otaqlarında şam kimi əridən gənc müəllim çox keçmir ki, cəmiyyətdə hamının sevimlisinə çevrilir.Azərbaycanın işıqlı gələcəyinə, elə üstündə gəzdiyi torpağın taleyinə yönələn ilk uğurlarına ürəkdən sevinir, bütün eşqini, məhəbbətini uşaq yaşlarında müqəddəsliyinə vurulan müəllim peşəsinə verir. Müəllim adını, şərəfini hər şeydən uca tutmaqla xalqının mədəni, mənəvi dünyasına yadda qalan naxışlar vurur...

Mehman müəllimin çalışdığı təhsil ocağı son illər şəhid Əlvan Bağırov adına Ərkivan qəsəbə 4 saylı tam orta məktəb adlanır.

Məktəbin direktor Məmmədağa Sadıqov deyir:

“Mehman Məmmədov sənətini ürəkdən sevən, ona dəyər verən, daim öyrənən və öyrətməyi bacaran təcrübəli pedaqoqdur. İnsanlığın zinəti sayılan saf, ülvi dəyərləri parlaq xarakterində cəmləyən bu vətən sevdalı Azərbaycan ziyalısı özünü biləndən elə həyat yolunu xoş arzular üzrə qurmuşdur.Üzərinə düşən vəzifənin məsuliyyətini çox yaxşı bilir, ingilis dili dərslərini sevə-sevə tədris edir.Şagirdlərinə sonsuz sevgi göstərdiyi üçün onlar da öz müəllimini böyük məhəbbətlə sevirlər.Valideynlər biliyinə, bacarığına yaxşı inanır, uşaqlarına bir qayda olaraq onun dərs keçməsini istəyirlər.Mehman müəllimdə olan sadəlik və qayğıkeşlik ilk baxışdan adamı özünə məftun edir.Onunla söhbət etməkdən mənəvi zövq alırsan, ondan xoş gələcəyə doğru öyrənirsən.Yüksək pedaqoji bacarığı, ünsiyyət mədəniyyəti onu müəllim, şagirdlərin gözündə ucaldır.Hazırda o, məktəbimizin 10-cu “t” sinif rəhbəridir.Burada 31 uşaq oxuyur, onların əksəriyyəti “əla” qiymət alır.Mehman müəllimin şagirdləri savadlı olmaqla bərabər, həm də vətənpərvər boy atırlar.Ümumiyyətlə, Mehman müəllimin fəaliyyəti, qazandığı uğurları təkcə məktəbimizdə deyil, rayonda nümunə, örnək sayıla bilər”.

Keçmiş şagirdi, hal-hazırda rayonun Dəmirçi kənd məktəbin müəllimi Tünzalə Qardaşova da Mehman müəllim haqqında ürəkdolusu danışır:

“Öz işini kamil bilən gözəl pedaqoq, yaxşı insan olduğuna görə Mehman Məmmədov qədər rayonumuzda təhsil sahəsində hörmət, nüfuz qazanan ikinci bir adam yoxdur. Uzun illərdir müəllim peşəsini ləyaqətlə daşıyır.Əsl ziyalıya xas yüksək mənəvi-əxlaqi keyfiyyətləri, dərin zəkası, geniş dünyagörüşü həmişə ona el-oba sevgisini gətirir.Mənim gözümdə Mehman müəllim ürəkdən bağlandığı millətin sabahına sözün əsl mənasında ümid çırağı, sönməz məşəldir.Xoşbəxtliyini məktəb divarları arasında görməklə dəyərli ziyalı ömrünü yaşayır.Mehman təcrübəli ingilis dili müəllimdir.Bütün biliklərini şagirdlərinə verə bilir.Buda onu şagirdlərinə həssas münasibətdən, eləcə möhkəm bilik əldə etməkdən ötrü onların qəlbinə, yaddaşına yol tapmaq bacarığından irəli gəlir.Mehman Məmmədov çox savadlı və məsuliyyətli müəllimdir.Həmişə öz üzərində işləyir, odur ki, fikri, düşüncəsi günəş qədər parlaqdır.Pedaqoji işdə təzə olanlar bunu nəzərə alaraq biliklərini artırmaqdan ötrü daha çox ona müraciət edir, o, da hər bir gəncin sorğusuna təmkinlə cavab verir, öyrədir, doğru yol göstərir.Onu da deyim ki, Mehman öz yetirmələri ilə həmişə fəxr edir.Çünki onlar seçdiyi sənətlərə sədaqətli olmaqla kami vətəndaş kimi cəmiyyətin inkişafında fəallıq göstərirlər.Şagirdlərdən Fərqiyyə Qardaşova, Sevana Gülverdiyeva, Vüsalə Məmmədova onunla bir kollektivdə çalışırlar.Namiq Yəhyayev Fransa Səfirliyində işləyir. Daha bir şagirdi Rüstəm Həşımov Amerika ştatlarının birində “FB”-də tanınmış kompüter mühəndisdir...”

Müəllim həmkarı Nurəddin Məlikovun da M. Məmmədov barədə deməyə sözü vardır. Onu da dinləyək:

“Xoş təbiəti, nəcib, mehriban xisləti dünyada ən müqəddəs peşə sayılan müəllimliyi ona gözəl yaraşdırır. Elə ziyalılıq da bu alicənab insanın daxili aləmində, mənəviyyatındadır.Məhz buna görə də Mehman müəllimin tərbiyə verməyə mənəvi hüququ böyükdür. Könül verdiyi müəllimlik ondan ötrü hər şeydən yüksəklikdə dayanır, ömrünü gənc nəslin təlim-tərbiyəsinə həsr etməyi ən şərəfli iş bilir və onların Azərbaycanımızın gələcək həyatında layiqli mövqe sahibi olması üçün səy göstərir. Bu təmiz istəklə müəllim işlədiyi illərin səfində xalqının yoluna səpdiyi ziya nuru sayəsində yaşadığı dünyada öz layiqli yerini tutmuşdur.Fəqət, Mehman Məmmədovun dərin savadından, yaxşı ziyalı kimi yüksək etik mədəni davranışdan, bəşər övladına tac olan humanist keyfiyyətlərdən götürməyə dəyər”.

Daha bir ürək sözü. Dəmirçi kənd məktəbin müəllimi, şair-publisist Asif Abbaszadə:

“Mehman Məmmədov rayonumuzun nüfuzlu müəllimidir. Daim hörməti, ehtiramı yüksək saxlanır.Öz sənətini hərarətlə sevir, başqalarına da belə olmağı arzulayır.Qibtə olunacaq yaradıcı təfəkkür sahibi olduğu üçün uğurları böyükdür. Mehman müəllim 2003-cü ildə Amerika Dövlət Departamenti və Amerika Beynəlxalq Təhsil Şurasının birgə təşkil etdiyi “Təhsil üzrə yüksək mükafatlar Proqramı” nın birinci və ikinci mərhələsinin qalibi olmuş, sertifikat, mükafatlar almışdır. Daha sonra, yəni 2004-2005-ci illərdə həmin müsabiqənin birinci mərhələsinin qalibi adını qazanır. Bunlardan əlavə 2003-çü ildə Amerikanın Sülh Korpusunun Könüllü müəllimlərin hər hansı məktəbdə işləməsi üçün rayonda ingilis dili müəllimlərin arasında aparılan sorğuda M. Məmmədovun cavabları birinci yerə layiq görüldüyü üçün könüllü müəllim Ceyk Cons iki il (2003-2005) Masallının Həsənəkücə məktəbində ingilis- dili müəllimi işləyir. Mehman müəllimin belə ürək açan uğurları çoxdur. Qaldı ki, bu dəyərli ziyalının dünyadan yeganə umacağı millət, dövlət yolunda vicdanla çalışıb el məhəbbətini qazanmaqdır...”

Yorulmadan doğma vətəninin tərəqqisi naminə çalışan, fəaliyyətində müstəqil Azərbaycanımıza dəyərli töhfə verən, yaşatmaq eşqi ilə cəmiyyətin gözündə ucalan, qəlblərdə isti yuva quran Mehman Məmmədovun həm də gözəl ailəsi vardır.Mənəvi təmələ, xoş niyyət və arzulara tapınmış, əsl azərbaycanlı adət-ənənələri üzərində qərar tutmuş ailə rayonda nümunə göstərilir.Həyat yoldaşı Esmira ana doğma el-obada yaxşı insanlığı sayəsində hörmət qazanmış qəlbi nurlu əsl Azərbaycan xanımıdır.Onun gözəl, nəcib əməllərində insanların arasında səmimiyyət, mehribanlıq yaratmağa bir müqəddəslik yaşayır. Elnur, Elnurə, Kənan bu halal ailə ocağının övladlarıdır. Onlarda daxili aləmində ilahi saflıq, yüksək mənəvi dəyərlərə tabe olan əxlaq yaşayır.Böyükləri kimi el-obaya, dövlətinə, xalqına sədaqətli olmaqla mənalı ömür yaşayırlar.Elnur Kooperasiya Universiteti bitirib.Elnurə Azərbaycan Müəllimlər İnstitutunun məzunudur, ailə qurduqdan sonra Rusiyada yaşayır. Kənan isə Dağıstan Təhsil və Mədəniyyət Akademiyasının Bədən tərbiyəsi ixtisası üzrə ali təhsil alıb. Həyata əzəmət, ülviyyət gətirən əməllərlə ucalmaq onların əsas amalıdır.

Zəfər Orucoğlu, Azərbaycan Jurnalistlər Birliyinin üzvü

Cümhuriyyət.- 2020.- 16 iyul.- S.13.