Vətən uğrunda canından keçən iki İlyas — bir ad, iki qəhrəmanlıq hekayəsi

Şahvələdov İlyas Nəriman oğlu 1975-ci ildə Laçın rayonunun Qorçu kəndində anadan olmuşdur. Gənclik çağlarında Vətənə sevgi ilə böyüyən İlyas, 1994-cü ildə Ağdərə döyüşlərində qəhrəmancasına şəhid olmuşdur. Şəhidliyindən bir ay sonra Bərdə Şəhidlər Xiyabanında dəfn edilmişdir.

Ailəsi onun xatirəsini daim yaşatmaq üçün əmisinin adını yeni doğulan oğluna verir. Beləliklə, Şahvələdov İlyas Etibar oğlu 6 avqust 1996-cı ildə Bərdə rayonunun Qaratəpə kəndində dünyaya gəlir. Balaca İlyas ilk təhsilini Qaratəpə kənd məktəbində alır və məktəbi uğurla bitirdikdən sonra 2015-ci ildə hərbi xidmətə yollanır.

O, 2016-cı ilin Aprel döyüşlərində iştirak edərək qəhrəmanlıq göstərmişdir. Əsgərlikdən tərxis olunduqdan sonra, vətən sevgisi onu yenidən hərbi xidmətə qaytarır. 2019-cu ildə çavuş kimi xidmətə başlayan İlyas, 2020-ci ilin Vətən müharibəsində ön cəbhədə vuruşur.

9 oktyabr 2020-ci ildə Füzuli rayonunun Qaraxanbəyli kəndində gedən döyüşlərdə qəhrəmancasına şəhid olur. O da əmisinin dəfn olunduğu Bərdə Şəhidlər Xiyabanında torpağa tapşırılır — bir xiyabanda, bir ad altında iki şəhid…

Şəhid İlyas nişanlı idi. Onun arzuları, qurmaq istədiyi ailəsi, yaşamaq istədiyi bir ömür vardı. Amma o, bütün bunları Vətən uğrunda fəda etdi. O da əmisinin yolu ilə gedərək adı ilə yanaşı, ruhunu və qeyrətini də yaşatdı.

İki İlyas — biri Laçından, biri Bərdədən — Azərbaycan torpağının azadlığı üçün şəhid oldular. Adları yaşadıqca, ruhları da yaşayacaqır.

Onu da qeyd edək ki, hal-hazırda bu ailədən əmisini və qardaşının yolunu davam etdirən igid – Şahvələdov Nəriman Etibar oğlunu da qeyd edək.

Vətənə xidmət ailənin ruhuna hopmuşdu. Şahvələdov Nəriman Etibar oğlu, 2021-ci ildən 2024-cü ilə qədər Azərbaycan Ordusunda xidmət etmişdir. Xidmət dövründə o, antiterror əməliyyatlarında iştirak etmiş, təhlükəli və məsuliyyətli tapşırıqları yerinə yetirərək dövlətə və xalqa sədaqətlə qulluq etmişdir.

Qardaş və əmisinin yolunu davam etdirən Nəriman, onların göstərdiyi şücaəti öz həyatında da əks etdirməyə çalışmış və hər zaman Vətənə layiqli bir övlad olmuşdur.

O da sübut etdi ki, bu ailənin hər bir övladı Vətən üçün canla-başla xidmət etməyə hazırdır.

Səbinə Nazimqızı

Cümhuriyət .- 2025.- 6-13 iyun(№20).-S.14.