Kamal Abdulla - 60

Hörmətli Kamal müəllim!

Sizi - görkəmli alim və yazıçını 60 yaşınızın tamam olması münasibətilə təbrik edirik.

Siz 1976-cı ildə indiki Bakı Dövlət Universitetinin filologiya fakültəsini bitirib SSRİ EA Dilçilik İnstitutunun Türk dilləri şöbəsinin aspiranturasına daxil olmusunuz. Aspiranturanı başa vurub 1977-ci ildə Moskvada "Sintaktik paralelizm" ("Kitabi-Dədə Qorqud" dastanlarının dili üzrə) adlı namizədlik dissertasiyası müdafiə etmisiniz. Əmək fəaliyyətinə 1977-ci ildə AEA Nəsimi adına Dilçilik İnstitutunun Türk dillərinin müqayisəli tədqiqi şöbəsində başlamısınız. 1984-cü ilədək burada şöbə müdiri vəzifəsinə kimi yüksəlmisiniz. 1984-cü ildə "Azərbaycan dili sintaksisinin nəzəri problemləri" adlı doktorluq dissertasiyası müdafiə etmisiniz. 1984-1987-ci illərdə Xarici Dillər İnstitutunun Ümumi və Azərbaycan dilçiliyi kafedrasının müdiri, professoru olmusunuz. 1988-1990-cı illərdə Azərbaycan Mədəniyyət fondu sədrinin birinci müavini işləmiş, 1990-cı ildə Azərbaycan Mədəniyyət Fondu İdarə heyətinin sədri, eyni zamanda M.F.Axundov adına Rus dili və Ədəbiyyatı İnstitutunun Ümumi və rus dilçiliyi kafedrasının müdiri seçilmisiniz 1993-cü ildən 2000-ci ilədək yenidən Xarici Dillər İnstitutunun Ümumi və Azərbaycan dilçiliyi kafedrasının müdiri olmusunuz. 1994-1995-ci illərdə Bursa Uludağ Universitetinin Türk dili və ədəbiyyatı bölümünün professoru kimi fəaliyyət göstərmisiniz. 2000-ci ildə Bakı Slavyan Universitetinin rektoru təyin edilmisiniz.

Siz türk xalqlarının qədim epik ədəbiyyatları sahəsində diqqətəlayiq araşdırmaların müəllifisiniz. Dilçilik, ədəbiyyatşünaslıq, həmçinin qorqudşünaslığa dair sanballı tədqiqatlarınız ölkəmizdə və onun hüdudlarından kənarda nəşr olunmuş, böyük maraqla qarşılanmışdır. "Azərbaycan dili sintaksisinin nəzəri problemləri", "Azərbaycan dilində mürəkkəb sintaktik bütövlər", "Dilçiliyə səyahət və yaxud dilçi olmayanlar üçün dilçilik", "Azərbaycanca danışaq", "Müəllif - əsər-oxucu", "Əvvəl-axır yazılanlar", "Gizli Dədə Qorqud", "Sirrinçində dastan və yaxud gizli Dədə Qorqud - 2", "Mifdən yazıya gizli Dədə Qorqud" və s. elmi kitablarınız elmi-nəzəri araşdırmalarınızın geniş diapazonunu əks etdirir.

Sizin çoxşaxəli fəaliyyətinizin bir sahəsi də bədii yaradıcılıqdır. "Yarımçıq əlyazma", "Sehrbazlar dərəsi", "Unutmağa kimsə yox" romanlarınız ədəbi ictimaiyyətin böyük marağına səbəb olmuşdur. Siz dramaturgiya və poeziyaya da müraciət etmiş, dəyərli bədii nümunələr yaratmısınız. "Ruh", "Casus", "Qəribədi, deyilmi", "Kədərli seçmələr", tərcümələrinizdən ibarət "Gümüş dövrün sirləri" kitablarınız sizə böyük oxucu auditoriyası qazandırmışdır. Siz dünyanın bir çox aparıcı təhsil ocaqlarında, simpoziumlarda mühazirələr oxumuş, ölkəmizi ləyaqətlə təmsil etmisiniz. AMEA müxbir üzvü, əməkdar elm xadimi, bir çox xarici universitetlərin fəxri doktorusunuz. 2007-ci ildə Rusiya Prezidenti V.V.Putin tərəfindən "Puşkin" medalı, Çexiyanın "Karl Kramej" medalı, Polşanın "Böyük xaç" kavaler ordeni ilə təltif edilmisiniz.

Hörmətli Kamal müəllim!

Sizi bir daha yubileyiniz münasibətilə təbrik edir, sizə uzun ömür, cansağlığı, elmi-pedaqoji və ədəbi fəaliyyətinizdə yeni-yeni uğurlar diləyirik.

Azərbaycan Yazıçılar Birliyi

Ədəbiyyat qəzeti.- 2010.- 3 dekabr.- S.4.