Tofiq Kazımov haqqında

…Teatrın, ilk növbədə, quruluşçu rejissor Tofiq Kazımovun xidməti ondadır ki, "Ölülər"in müasirliyini çox yaxşı duymuş, keçmişdən, bu günlə müqayisə səviyyəsindən çox uzaq görünən bir keçmişdən bəhs edən əsərin hadisələrində və obrazlarında müasir fikir, eyni zamanda müasir sənət dili üçün səciyyəvi olan keyfiyyətlər görə bilmişdir.

Cəfər Cəfərov

"… Əgər müəllifə görə Şeyx Nəsrullah islam ruhani dünyasının həqiqi nümayəndəsidirsə, ancaq tamaşada o, yalnız mötəbər ruhani paltarı geyinmiş professional fırıldaqçı, cüvəllağı kimi nəzərə çarpır. Dramaturq müsəlman şeyxinin fırıldaqçılığını ifşa edir. Rejissor isə tamam başqa bir şeyi - bu dəfəlik müsəlman şeyxinin paltarını geyinmiş bir fırıldaqçının növəti sərgüzəştini açıb göstərir…"

Mehdi Məmmədov

Bilirsiz, Tofiq müharibədən sonra Moskvaya oxumağa gedəndə onun düşüncəsi təmiz ağ vərəq kimi idi. Bəxti onda gətirdi ki, bu vərəqə gör kimlərin adları yazıldı: Popov, Knebel, Şostakoviç... Sonralar Moskvada onun tələbə yoldaşları ilə görüşəndə deyirdilər ki, siz o vaxtkı Tofiqi görməmisiniz. Od parçası idi. İdeyalar onun başından fəvvarə kimi fışqırırdı. Hamını öz arxasınca aparırdı.

Rəna Əfəndizadə

T.Kazımovun həyat yoldaşı

…İskəndər rolunun mahiyyətini mənə üç cümlə ilə açdı. Dedi: "İskəndər nə o qədər güclüdür ki, qəbiristanlıqdan çıxsın, nə də ki, o qədər zəif deyil ki, qəbiristanda yaşamağa razı olsun. Bizik də! Bu gün hər düşünən adam İskəndərdir. Özü də bil - İskəndər əyyaş deyil, içki düşkünü deyil, əlindəki araq şüşəsi etiraz rəmzidir".

Həsənağa Turabov

Ədəbiyyat qəzeti.- 2010.- 3 dekabr.- S.2.