Sabit Rəhman – 100

Görkəmli ədib və dramaturq

Dekabrın 7-də M.F.Axundov adına Azərbaycan Milli Kitabxanasında ədəbiyyatımızın görkəmli nümayəndəsi, yazıçı-dramaturq Sabit Rəhmanın anadan olmasının 100 illiyinə həsr olunmuş tədbir keçirildi. Mədəniyyət və Turizm Nazirliyinin tədbirlər planına uyğun olaraq düzənlənən mərasimi sözügedən kitabxananın direktoru Kərim Tahirov açaraq dedi: "Öz xalqının milli-mənəvi dəyərlərinin inkişafına böyük əmək sərf etmiş insanların xatirəsi heç vaxt unudulmur. Ötən əsrin əllinci illərində Azərbaycan ədəbiyyatına dəyərli töhfələr vermiş Sabit Rəhman da həmişə xatırlanır. Hesab edirəm ki, bu gün onun da ruhu burada bizimlədi. Biz bu cür tədbirləri kompleks halında keçiriməyi planlaşdırmışıq…"

Mədəniyyət və turizm nazirinin müavini Ədalət Vəliyev çıxışında S.Rəhmanın oğlu, görkəmli bəstəkar Emin Sabitoğlu ilə olan yaxın münasibətindən, ailəvi dostluğundan söz açdı: "Onunla müxtəlif bölgələrimizə, eyni zamanda xarici ölkələrə birgə səfərlərimizi heç vaxt unuda bilmirəm. Düz on il əvvəl Sabit Rəhmanın anadan olmasının 90 illiyilə bağlı tədbir keçirməyi planlaşdırırdıq. Hazırlıq işi başlanmışdı. Emin Sabitoğlu da o zaman çalışdığı Türkiyədən tədbirdə iştirak etmək üçün gəlmişdi. Görüşüb məsləhətləşdik, dəvətnamənin eskizlərinə birgə baxdıq. Lakin məhz yubiley günündə Emin qəflətən dünyasını dəyişdi və bu tədbiri reallaşdıra bilmədik. Sabit Rəhmanın 80-ci ildönümü isə ötən əsrin 90-cı illərinin burulğanına düşmüşdü. Nəhayət, görkəmli yazıçının 100 illiyinin keçirilməsini qərarlaşdırdıq. Çox istərdim ki, bu tədbirlərdə Emin müəllim də iştirak edə biləydi. Həyatsa davam edir. Demək çox xoşdu ki, hər iki sənətkarın ruhu və qoyub getdikləri irs həmişə bizimlədi. Sabit Rəhmanın dramaturgiyası bir çox görkəmli aktyor nəsli yetişdirib. Elə bir teatrımız yoxdur ki, zaman-zaman Sabit Rəhmanın dramaturgiyasına müraciət etməsin. Onun mükəmməl əsərləri həmişə yaşyacaq".

Xalq yazıçısı, AYB-nin katibi Çingiz Abdullayev çıxışında vurğuladı ki, S.Rəhmanın pyesləri əsl milli pyeslərdi, həmişəyaşardı.

Sonra o, yazıçının oğlu Emin Sabitoğlu ilə aralarında olan dostluqdan, xalq yazıçısı Anarın Eminə olan qardaşlıq sevgisindən söz açdı.

Tədbirin aparıcısı, filologiya elmləri doktoru Bədirxan Əhmədov yazıçının həyat və yaradıcılığı haqqında ətraflı məlumat verərək bildirdi ki, Mədəniyyət və Turizm Nazirliyi və M.F.Axundov adına Azərbaycan Milli Kitabxanasının təşəbbüsü ilə yaxın günlərdə "Sabit Rəhman - 100: bioqrafiya" kitabı işıq üzü görüb: "Elm və təhsil" nəşriyyatı isə mənim "Sabit Rəhman: həyatı, mühiti, yaradıcılığı" monoqrafiyamı nəşr edib".

Xalq artisti Amaliya Pənahova çıxışında bildirdi ki, o, ilk dəfə səhnədə S.Rəhmanın "Yalan" əsərindəki Xumar rolunu ifa edib: "Bu ifa çox uğurlu oldu. Sonra mən "Nişanlı qız"da Zərifə, "Yalan"da Şəlalə obrazını oynadım..."

Kinoşünas Aydın Kazımov S.Rəhmanın ssenarist kimi fəaliyyətindən danışdı, "Arşın mal alan" filminin tale gizlinlərini önə çəkdi, professor Nizami Tağısoy S.Rəhmanın yaradıcılıq xüsusiyyətlərindən söz açdı.

Sonda yazıçının nəvəsi Ceyran xanım ailə üzvləri adından tədbirin keçirilməsində əməyi olanlara dərin təşəkkürünü bildirdi.

S.Əsgərli

Ədəbiyyat qəzeti.- 2010.- 10 dekabr.- S.2.