Teymur Əhmədov

Ədəbiyyatşünaslıq sahəsində çiyin-çiyinə çalışdığımız qırx beş il ərzində həmişə mənim diqqət mərkəzimdə olmuşdur. Mən dostumun monoqrafiya, məqalələri və tərtib etdiyi kitabları ardıcıl surətdə oxumuşam. Onlardan ali məktəb auditoriyalarında "XX əsr Azərbaycan ədəbiyyatı tarixi" və "Azərbaycan ədəbi tənqidinin tarixi" fənləri üzrə oxuduğum mühazirələrdə və elmi-tədqiqat işlərində bol-bol bəhrələnmişəm.

Hər iki tədris kursu üzrə seminar məşğələlərində alimin N.Nərimanov haqqında monoqrafiyalarını və digər əsərlərini tələbələrimə məcburi ədəbiyyat olaraq oxutmuşam. "Nəriman Nərimanovun dramaturgiyası", "Nəriman Nərimanovun yaradıcılıq yolu", "Nəriman Nərimanov" monoqrafiyaları mənim və tələbələrimin masaüstü kitablarıdır. Onların Azərbaycan Dövlət Pedaqoji Universitetinin kitabxanasındakı oxunmaqdan köhnəlmiş, sökülmüş, cırılmış nüsxələri buna şahiddir.

Teymur böyük həyat təcrübəsinə, geniş intellektə və zəngin mənəviyyata malik bir insan, ziyalı və vətəndaşdır. Bu qəbildən olan bütün şəxsiyyətlər kimi o da təvazökar, son dərəcə sadə və səmimidir.

Teymur dostluqda səmimi və etibarlıdır. Çoxsaylı faktlardan mən onun Mirzə İbrahimovla və Vəli Məmmədovla münasibətlərini misal gətirmək istəyirəm. Teymur namizədlik və doktorluq dissertasiyalarını akademik Mirzə İbrahimovun rəhbərliyi altında yerinə yetirmişdi. Teymurun Mirzə İbrahimovla münasibəti sadəcə, necə deyərlər, "ustad-şagird" əlaqələri dairəsində məhdudlaşmırdı. O, bu çərçivəni aşıb səmimi dostluğa çevrilmişdi. Mirzə İbrahimov Nizami adına Ədəbiyyat İnstitutunda rəhbərlik etdiyi "Cənubi Azərbaycan ədəbiyyatı" şöbəsinin bütün işlərini Teymura etibar etmiş, onun simasında özünə sədaqətli varis hazırlamışdı. Teymur Mirzə müəllimi sevir, onun şəxsiyyətinə sözün sağlam mənasında pərəstiş edirdi. Şəxsən məndə belə bir təəssürat vardır ki, Teymurun əhatə olunduğu, hörmət bəslədiyi və etimad göstərdiyi adamlar arasında Mirzə İbrahimov birinci yerdə dayanır. Bu gün o, rəhbərinə böyük məhəbbətinin ifadəsi olaraq onun irsinin təbliğinə xüsusi səy göstərir.

Xeyrulla MƏMMƏDOV

Ədəbiyyat qəzeti.- 2010.- 24 dekabr.- S.4.