Nəsihət

Poemadan parça

Uçurumdan qaytaran,

Qovğaları yatıran,

Hikkələri batıran

Nəsihətdir, nəsihət!

Əsrlərdən süzülən,

Alınlara yazılan,

Hikmətlərə düzülən

Nəsihətdir, nəsihət!

Nəsillərə yadigar,

İşığında hikmət var,

Xəzinətək açılar…

Nəsihətdir, nəsihət!

Suyu duruldan, süzən,

fikri ələyən, düzən,

Eşqi ürəklər gəzən

Nəsihətdir, nəsihət!

Babamın söz gövhəri,

Elin ağıl cövhəri,

Unutduran qəhəri

Nəsihətdir, nəsihət!

Allahın təmbehi də,

Dağın sərin mehi də,

Çəmənlərin şehi də

Nəsihətdir, nəsihət!

Uçan quşların səsi,

Şəlalənin nəğməsi,

Ağacların pöhrəsi

Nəsihətdir, nəsihət!

Cilid-cilid kitablar,

Ürəkdə olan tablar,

Neçə daş kitabələr

Nəsihətdir, nəsihət!

"Gecə", "Gündüz" kəlməsi,

Ərşin, fərşin ilməsi,

Günəşin də gülməsi

Nəsihətdir, nəsihət!

Kəhkəşan düzüm-düzüm,

Dildə, dodaqda sözüm,

Tarixlərdəki izim

Nəsihətdir, nəsihət!

Quranın hər kəlməsi,

Peyğəmbərlər gəlməsi,

Hikmətlərin ilməsi

Nəsihətdir, nəsihət!

Qobustanda qayalar,

Üzdə olan həyalar,

Holavarlar, halaylar

Nəsihətdir, nəsihət!

Buludların avazı,

Orxonlardakı yazı,

Ömrə yazılan yazı

Nəsihətdir, nəsihət!

Göylərin gurultusu,

Vulkanın nəriltisi,

Coşan küləyin səsi

Nəsihətdir, nəsihət!

İşığa bax, ay qağa,

Gülünc gəlir uşağa,

Baxın, baxın işığa

Nəsihətdir, nəsihət!

Hər şey yerli-yerində,

Həm üzdə, həm dərində,

Ulduzun gözlərində,

Allahın sözlərində

Nəsihətdir, nəsihət!

Nəsihətdir, nəsihət!

Aprel 2010

İltifat Saleh

Ədəbiyyat qəzeti.- 2010.- 4 iyun.- S.5.