...Rəsmini sən çək

Rəssam Qafar Sarıvəlliyə

Gözəllik ovçusu olduq hərəmiz -

Mən şair, sən rəssam!.. Birdi bərəmiz.

Yazda tamaşadı İncə dərəmiz -

Vəsfini mən yazım, rəsmini sən çək.

Baharda qonaq ol bu doğma kəndə,

İncəçay hayqırıb nərə çəkəndə.

"Bənövşə nərgizə" boyun bükəndə -

Vəsfini mən yazım, rəsmini sən çək.

Bir az qorxuludu "Battaqlı bulaq",

Enib "Daşbulağ"ın qonağı olaq.

"Pirə dərəsi"nin seyrinə dalaq -

Vəsfini mən yazım, rəsmini sən çək.

"Efli qüzeyi"nin, "Kəmənd çalı"nın

Yazda toxuduğu xalça-xalının:

İncənin, Şıxlının və Borçalının

Vəsfini mən yazım, rəsmini sən çək.

Babakər dağının bir üzü İncə,

Keçib "Axçalı"dan çıxarıq dincə.

Dolaş "Gədeyli"ni, gəz ürəyincə -

Vəsfini mən yazım, rəsmini sən çək.

"Təksaqqız", "Təkarmud", "Acı", "Qoşaçal",

"Yemşənli", "Qazılı" zəmidi xal-xal.

Hardadı "Mərzəli" - məndən xəbər al,

Vəsfini mən yazım, rəsmini sən çək.

Bir Günəş üzlünün, Ay camallının,

Bir ala gözlünün, qara xallının,

Bir şirin sözlünün, xoş xəyallının

Vəsfini mən yazım, rəsmini sən çək.

Xanbağı gölündə o çalxanan qaz,

"İncəli, yaz, deyir, - qələm götür yaz!"

Sən də rəssam Qafar, cəld ol, cəld bir az -

Vəsfini mən yazım, rəsmini sən çək!

***

Bu qoca ovçuydu, bir vaxt meşədən

Dönərdi evinə xallı əliklə.

Baxıram, dünyanın işinə bax, sən, -

Qayıdır indi də bir cüt çəliklə!

Yolunu gözlərdi evdə bir maral,

Deyərdin, yer-göy də bu gözəlindir.

Göz qaynar, qaş qara, yanaqlar da al, -

Gördüyün bu qarı həmin gəlindir!

Ələddin İncəli

Ədəbiyyat qəzeti.- 2010.- 4 iyun.- S.4.