Dilə ibadət

Sənsən ucalığım,

sənsən qürurum

Mənim ayrılığım,

görüşüm də sən.

Gecədən süzülən

ağappaq nurum,

Gündüzdən boylanan

günəşim də sən,

Ay ana dilim!

Göylər layla desin,

dağa baş qoyum.

Mənim intizarım,

nigaranımsan.

Həsrət səhrasında

bir içim suyum.

Sevgi qitəsində

gur ümmanımsan,

Ay ana dilim!

Səndən uzaqlarda

biz qaldıq yetim,

Ancaq səslənirdin

yuxularda sən.

Bəlkə müvəqqəti məğlubiyyətim, -

Amma ki, əbədi bir təntənəmsən,

Ay ana dilim!

Yaralar təzədir,

yaralar dərin,

Can qoyduq, tər tökdük

elimiz üçün.

Dilini kəsdilər

dil deyənlərin.

Dil deyib ağladıq

dilimiz üçün,

Ay ana dilim!

Xoşdur hər çəmənin,

çölün öz gülü,

Çəmənlər gül açsın

baharla, yazla.

Gəlin yaxşı bilək

biz iki dili,

Ancaq ikidilli

olmayaq əsla,

Ay ana dilim!

Durur arzularım

hələ gözümdə,

Neçə deyilməmiş

söz də qalıbdır.

Uca bayrağımsan,

dünya üzündə,

Səndə güllələrdən

iz də qalıbdır.

Sənə nankorluqdan

min qəlpə dəyib,

Dilə dəyən yara

hər qəlbə dəyib, -

Ay ana dilim!

Dil özü -

ən böyük

möcüzədirsə,

O alıb gücünü

doğma xalqından.

Dostlar öz dilinə biganədirsə,

nə umaq yadların

soyuqluğundan,

Ay ana dilim?!

Əzizdir öz yurdum,

torpağım mənim,

Mən ki, vətən deyən təriqətdəyəm.

Ucal, ey müqəddəs

bayrağım mənim,

Önündə əbədi ibadətdəyəm,

Məni bu səcdədən ölüm ayırar,

Sonra diz çökəcək

övladlarım var,

Ay ana dilim!

Nəvələrimə

Bir övlad muradsa,

Biri qanaddır,

Uludur eşqiylə, etibarıyla.

Məncə, hər ailə bir kainatdır -

Öz Ayı, Günəşi, ulduzlarıyla.

Dünyada sizsiniz

Dövlətim-varım,

Şirin bir nəğmədir doğma səsiniz.

Bağıran Elgünüm, susan Yanarım,

Siz mənə Tanrıdan hədiyyəsiniz.

Vüsalım - ürəkdən o yana-yana

Çatdırdı hamını haqqın yoluna.

Sonalar gölündən

Su içib Sona,

Nigar - əsrlərdən bizə yadigar.

Ən kiçik Gülarə - hamıya ana,

Onun gözlərində nəslin nuru var.

Bir oğul nəvəmsə

Məndən uzaqdır,

Adın dəyişiblər, canı sağ olsun!

Adını o özü qazanacaqdır,

Onda deyəcəyəm, üzün ağ oslun!

Mənim çinar boylu nəvələrim, siz

Mənim arxamsınız, dirəyimsiniz.

Mənim arzu dolu ürəyimsiniz.

Bir gün yatmaq üçün

Haqq dünyasında

Sizin çiyninizdə gedəcəyəm mən.

Gedəcəyəm… fəqət əsrin yazında

Bir yaşıl çinar tək bitəcəyəm mən!

Nəbi Xəzri

Ədəbiyyat qəzeti.- 2010.- 4 iyun.- S.3.