Günün sözü

Yəhudi səsi

Neçə gündü mən öz ürəyimin içində bir yəhudi səsi eşidirəm. Gündüz rahatlığım, gecə yuxum ərşə çəkilib. O, hıçqıra-hıçqıra ey mənim əzabkeş, qədim xalqım, - deyir, - mən faşizmin konslagerlərində, Osvensiumda yanan bir yəhudi ruhuyam. Faşizmdən bizim çəkdiyimizi heç bir millət çəkməyib. Heç bir ölkənin xalqı bizim qədər əzab görməyib. Dünyanın ən ağıllı milləti deyiblər bizə. Özümüz də buna inanmışıq. Bəs nə tez unutdunuz o günləri… Axı ağıllı adamın yaddaşı möhkəm olmalıdı… Siz illərdən bəri faşizmin qəddarlığını qoruyub-saxlamısınız? Utanıram, xəcalət çəkirəm. Siz dünyaya gücünüzü göstərmək istəyirsiniz? Bu görməmişlikdir. Bir zaman sizə işgəncə verən faşizmdən canınızda qalan qəddarlığı indi köməyə ehtiyacı olanlara qarşı nümayiş etdirirsiniz. Qaz peçində mənim o zaman cismim yanmışdı, indi siz mənim ruhumu həmin peçə yenidən atdınız, məni özümünkülər yenidən yandırdı.

Biz əzabkeş xalqıq və əzabın nə olduğunu yaxşı bilirik. Sizin bu hərəkətiniz bizim bu millətə yaraşan deyil - əzab çəkən, köməyə ehtiyacı olan bir xalq üçün neytral sularda üzən, humanitar yardım daşıyan gəmi karvanlarına, əli yalın insanlara hücum etmək, insan öldürmək, yardıma gedən insanları öldürmək… Axı bizi dünyadakı yaxşı insanların mərhəməti millət kimi qoruyub saxladı, bizi dövlət etdi. Yardıma ehtiyacı olan sənin qatı düşmənin də olsa, sən belə etməməliydin. Sənə yanaşan həmin gəmi karvanına sənin də bir yardım gəmisiylə qoşulmağın olardı.

Ey mənim qədim, əzabkeş, ağıllı xalqımın bu əmri verən səlahiyyətliləri! Siz bu hərəkətlərinizlə soyqırım qurbanlarınızı yenidən yandırdınız, güllələdiniz, diri-diri torpağa basdırdınız. Cəhənnəm odundan da ağır dünyada bir od var - vicdan odu. Biz bu günlər həmin od içində yanırıq. Qəlbinizdə faşizmin qoyduğu qəddarlıq izini ən duzlu dənizin suyu ilə yuyun. Üzr istəməyi bacarın. Üzr istəməyi bacarmaq güclülük əlamətidir. Allahın və insanların qarşısında üzr istəyin. İnsanlar özü bilər, amma Allah böyükdür, rəhmlidir, bəlkə bu dəfə keçər.

Fikrət Qoca

Ədəbiyyat qəzeti.- 2010.- 4 iyun.- S.3.