"Atılan toplara diksinməyiriz"

Ölməz poeziyası ilə bədii təfəkkür tariximizin yeni mərhələsini yaradan görkəmli şair, mütəfəkkir söz ustası Mirzə Ələkbər Sabirin adı və ruhu ilə bağlı hər il keçirilən ənənəvi söz bayramı bu il də may ayının 30-da sənətkarın Bakıdakı heykəli önündən başladı. AYB-nin sədri Anar müəllim başda olmaqla bir qrup yazıçı - Fikrət Qoca, Sabir Rüstəmxanlı, Azər Mustafazadə, Əjdər Ol, Vaqif Bəhmənli, Nazim İbrahimov, Yusif Həsənbəy, Ədalət Əsgəroğlu, Ağacəfər Həsənli, Bahadur Fərmanoğlu, Sabir Sarvan, Əsəd Cahangir, gənc yazarlardan Qismət, Rəbiqə, tədqiqatçı İlham Abbasov və b. böyük şairin heykəli önünə tər güllər qoymaqla onun xatirəsini yad etdi. Sonra heyət Şamaxıya - Sabirin yurduna yol aldı. Öncə onun məzarı ziyarət olundu. Yenə də tər çiçəklərlə görkəmli şairin xatirəsi yazıçılar tərəfindən yad edildi. Orada şeirlər oxundu, Sabir haqqında fikirlər səsləndi. Şair, son beş ildə bu tədbirin təşkilatçılığına rəhbərlik edən Əjdər Ol M.Ə.Sabirin abidəsi önündə çıxış edərək onun yaradıcılığına çağdaş prizmadan təhlili münasibətini bildirdi, Sabir şeirlərinin bütün zamanlar üçün aktuallığını vurğuladı.

Ziyarətdən sonra Sabir Poeziya günlərinin iştirakçıları tədbirin davamını keçirmək üçün Ağsu şəhərinə yollandı. Son illərdə daha da gözəlləşən Ağsu şəhərində Sabirin ruhu ilə bağlı söz bayramının keçirilməsinə rayon İcra Hakimiyyəti və ictimaiyyətin nümayəndələri tərəfindən böyük hazırlıq işləri görülmüşdü. İştirakçılar öncə Şəhidlər xiyabanını, ümummilli lider Heydər Əliyevin abidəsini və adını daşıyan muzeyi ziyarət etdikdən sonra söz bayramının keçirildiyi yerə toplaşaraq M.Ə.Sabir haqqında fikirlərini, şeirlərini tamaşaçıların diqqətinə çatdırdılar. Öncə Ağsu rayon İcra Hakimiyyətinin başçısı Ənvər Seyidəliyev yığcam çıxışı ilə tədbiri açıb qonaqları salamladı. Sonra söz AYB-nin sədri, xalq yazıçısı Anara verildi. Ənənəvi olaraq hər il keçirilən bu tədbirin milli-mənəvi və əxlaqi tərəfindən danışan xalq yazıçısı bunu ölməz Sabirin ruhuna kiçik də olsa, bir ehtiram kimi dəyərləndirdi. Sabir Poeziya günlərinin yaradıcıları, xalq şairləri - Rəsul Rza, Cabir Novruz, Qabil və professor Abbas Zamanov xatırlandı. Son illərdə bu tədbirin təşkilati işlərinə rəhbərlik edən şair Fikrət Sadıq və Əjdər Olun da əməyi xüsusi vurğulandı.

AYB-nin birinci katibi, xalq şairi Fikrət Qoca çıxış edərək Sabir irsinin əbədiyyətə qovuşan dəyərindən danışdı, onu da xatırlatdı ki, gələn ildən başlayaraq Rəsul Rza poeziya günlərinin keçirilməsini də qərara almışıq. Belə söz bayramları ulu ustadlarımızın ruhuna ehtiramın bir nümunəsidir.

Tədbirdə iştirak edən yazarlar M.Ə.Sabirlə bərabər S.Ə.Şirvani, R.Rza kimi şairlərimizin də şeirlərindən nümunələr söylədilər, özlərinin yeni şeirlərini oxudular. Ağsu məktəblilərinin Sabir şeirləri əsasında hazırladıqları kompozisiya və əməkdar artist, qiraət ustası Ağalar Bayramovun böyük şairdən əzbər söylədiyi nümunələr söz bayramı iştirakçılarının hərarətli alqışları ilə qarşılandı.

Ağsudan qayıdan heyət Şamaxıda M.Ə.Sabirin ev muzeyində də olub ictimaiyyətin və muzeyin nümayəndələri ilə də görüş keçirdi.

Tədbirin davamı növbəti gün - mayın 31-də M.F.Axundov adına Milli Kitabxanada keçirildi. Q.Nəcəfzadə, O.Rza, F.Hüseyn, E.Səmədoğlu, Y.Həsənbəy, Qismət, S.Şəkərli, R.Dağlı, Q.İmanlı, S.Məmmədli, S.Talıblı, C.Zeynallı yeni şeirlərini oxudular, Sabir haqqında düşüncələrini ictimaiyyətin nümayəndələri ilə paylaşdılar…

Bunu da vurğulamağa dəyər ki, Sabir Poeziya günləri Azərbaycan Respublikası Mədəniyyət və Turizm Nazirliyinin Azərbaycan Yazıçılar Birliyi ilə birgə təşkilatçılığının nəticəsi olaraq yeni formatda, daha təkmil formada yadda qaldı. M.Ə.Sabirin əksi həkk olunmuş dəftər və qələm, Sabir Poeziya günlərinə həsr olunmuş tematik buklet də həmin günlərin unudulmazlığına simvolik yardımçı oldu.

İyunun 1-də, bu tədbirdən cəmi bir gün sonra Respublika Prezidenti cənab İlham Əliyevin "Mirzə Ələkbər Sabirin 150 illik yubileyinin keçirilməsi haqqında" verdiyi sərəncam dahi şairin ruhuna ən böyük ehtiram kimi xalqımızı sevindirdi. Çünki Sabir həqiqi mənada xalqın və millətin şairidir. 2012-ci ildə 150 illik yubileyinin keçirilməsi nəzərdə tutulan M.Ə.Sabir zaman keçdikcə bizdən uzaqlaşmır, əksinə, bizə daha da yaxınlaşır - ölməz şeirləri və gündəmdən düşməyən mövzuları ilə…

C.Adil

Ədəbiyyat qəzeti.- 2010.- 11 iyun.- S.1, 2.