Sabir poeziya günləri

Bu günlərdə böyük şərqşünas, unudulmaz müəllimimiz Əkrəm Cəfərin oğlu Sokrat mənə atasının zəngin arxivindəki materiallar içərisində öz tələbəsinin də bədii-elmi yazılarından bəzilərini mətbuat səhifələrindən kəsib saxladığını dedi. Əkrəm müəllimin çox qiymətli qeydlərini görən Sokrat irili-xırdalı bir qovluq materialı atasına layiq səxavətlə mənə hədiyyə etdi. İndiyə qədər gördüyüm hədiyyələrin hamısından fərqli bir hədiyyə idi.

Bir neçə gün əvvəl AZTV-də Əkrəm müəllimin 105 illiyinə həsr olunmuş geniş verilişdə, həmçinin İctimai radionun bir saatlıq "Poeziya"sındakı çıxışımda ustadın məni heyrətə salan bu diqqətinə minnətdarlığımı bildirmişəm.

Qovluqdakı yazıların arasında möhtərəm müəllimimin qəzetdən kəsib saxladığı bir şerim - dahi Sabirə həsr etdiyim "Ölüm qorxurdu" da var.

Dövlətimizin başçısının bu günlərdə imzaladığı məlum Sərəncama əsasən Mirzə Ələkbər Sabirin 150 illik yubileyinə geniş hazırlıq başlamışdır.

Belə əlamətdar bir vaxtda əziz Əkrəm müəllimin neçə illər qoruyub saxladığı "Ölüm qorxurdu" şerimi və ona əlavə olaraq həmin mövzuda yazmış olduğum digər bir şeri - "Dəydikcə köksünə tənələr seli"ni Sabirsevərlərə təqdim etməyi mümkün hesab elədim.

Ayaz VƏFALI

Ədəbiyyat qəzeti.- 2010.- 11 iyun.- S.2.