Lənkəran
Bu günlərdə Azərbaycan
Respublikasının Prezidenti İlham Əliyevin xalq şairi
R.Rzanın anadan olmasının 100 illiyinin keçirilməsi
ilə bağlı verdiyi sərəncam çoxsaylı tədbirlərlə
yadda qalmışdır. Azərbaycan Yazıçılar
Birliyi Lənkəran bölməsinin təşəbbüsü
və təşkilatçılığı ilə Lənkəran
mərkəzləşdirilmiş kitabxana sistemində
keçirilən tədbiri mədəniyyət şöbəsinin
əməkdaşı Cəfər fətullayev açdı. Sonra
mərkəzi kitabxananın direktoru Sidiqə Rzayeva Prezident fərmanı
ilə bağlı mərkəzləşdirilmiş kitabxana sistemində
keçiriləcək tədbirlər planı haqqında məlumat
verərək bildirdi ki, yubileylə bağlı rayonun əksər
kitabxanalarında tədbirlər keçirilmiş, R.Rzanın
kitab və fotolarından sərgilər təşkil
etmişdir.
Lənkəran Dövlət
Universitetinin dil və ədəbiyyat kafedrasının dosenti
filologiya elmləri namizədi Yədulla Ağazadə Rəsul
Rzanın həyat və yaradıcılığı
haqqında ətraflı çıxış etdi. Onun novator
bir şair kimi Azərbaycan ədəbiyyatında önəmli
bir yeri olduğunu göstərdi. Sonra AYB Lənkəran
bölməsinin sədri, şair İltifat Saleh R.Rza ədəbi
məktəbindən söz açdı, şair haqqında
xatirələrini söylədi. R.Rza məğrurluğundan,
mərdliyindən və gənc yazarlara qayğısından
danışdı. Yazıçı-publisist Hafiz Mirzə və
şair Ağamir Cavad öz çıxışlarında
R.Rza yaradıcılığının müxtəlif məqamlarına
toxundular, onun mövzu genişliyindən, sənətkarlıq
xüsusiyyətlərindən danışdılar. Ağamir
Cavad şairə həsr etdiyi essesini oxudu. Sonra söz bədii
qiraətçilərə verildi. Mədəniyyət
şöbəsinin əməkdaşı Habil Axundov və məktəblilər
şairin şeirlərindən hazırlanmış ədəbi-bədii
kompazisiya ilə çıxış etdilər.
***
R.Rzanın 100 illiyi ilə
bağlı növbəti tədbir Lənkəran Dövlət
Universitetində oldu. AYB Lənkəran bölməsi, AMEA Lənkəran
regional elmi mərkəzi və LDU-nun birgə təşəbbüsü
ilə keçirilən tədbiri LDU-nun rektoru professor Asəf
İsgəndərov açaraq R.Rza
yaradıcılığının milli və bəşəri
xüsusiyyətlərindən danışdı. Ədəbiyyat
kafedrasının dosenti, f.e.n. Mirhüseyn Abbas şairin həyat
və yaradıcılığı haqqında ətraflı məruzə
ilə çıxış etdi. Onun bütün
ölçü və janrlarda qələmini
sınadığını xüsusilə vurğuladı.
Şeir və poemalarının təhlilinə yer
ayırdı. Sonra dil və ədəbiyyat kafedrasının
dosenti, f.e.n. şair Mirhaşım Talışlı, AYB Lənkəran
bölməsinin sədri şair İltifat Saleh, dil və ədəbiyyat
kafedrasının dosenti, f.e.n. Yədulla Ağazadə, xarici
dillər kafedrasının müəllimi, f.e.n. Səfər
Şirinov və başqaları çıxış edərək
R.Rzanın yaradıcılığının müxtəlif
məqamlarına toxundular, onun yaradıcılıq yoluna
işıq salıb, ictimai-siyasi lirikasından, tərcüməçilik
fəaliyyətindən söz açdılar. Yeni bir ədəbi
məktəb yaratmasından, istedadlı gənclərə
qayğısından, cəmiyyəti çirkablayan mikroblara
qarşı kəskin mövqeyindən danışdılar. Tədbir
tələbələrin hazırladığı ədəbi-bədii
kompazisiya ilə başa çatdı.
***
R.Rzanın anadan
olmasının 100 illiyi ilə bağlı Lənkəran Təhsil
şöbəsi ilə birgə Lənkəran şəhər
uşaq yaradıcılıq mərkəzində, şəhər
1 saylı, Liman şəhər 1 saylı, Tükəvilə,
Veravul Digah və s. kənd orta məktəblərində də
tədbirlər keçirdilər. Lənkəran Cənub
televiziya şirkəti AYB Lənkəran bölməsi ilə
birgə şairin yubileyi ilə əlaqədar veriliş
hazırlamışdı. Yubileylə bağlı
çoxsaylı tədbirlər davam etdirilir.
Şəhla Xəlilova
Ədəbiyyat qəzeti.- 2010.- 11 iyun.- S.3.