"Anar. Ömür yolu. Yaradıcılığı"

İndicə seyr etdiyim filmin - Azərbaycan musiqi mədəniyyətinin fəxri Üzeyir Hacıbəyova həsr olunmuş bədii televiziya filminin təsiri altında əziz Anar, sizi böyük uğurunuza görə təbrik etməyə tələsirəm. Böyük bəstəkarın xatirəsinə layiq olan gözəl sənət əsəri yaratmısınız.Bərk-bərk əlinizi sıxır, çoxcəhətli fəaliyyətinizdə yeni nailiyyətlər arzulayıram.

Əziz Şərif

17 noyabr 1985 - Moskva

Əziz və hörmətli Anar!

Sənin müdriklik yaşın mübarək olsun!

Ağıl və təmkin, səbir və dəyanət yollarıyla addımlayıb gəlib çatdın bu müqəddəs sərhədə. Elə bir sərhəddə ki, ondan o yana ömrün ikinci dövrü -- daha məsuliyyətli, daha yanğılı bir dövrü başlanır.İnsan nələr etdiyini, nələr edə bilmədiyini daha yaxşı görür, duyur.

Sən ömrünün birinci yarım əsrliyində doğma xalqımıza ləyaqətlə xidmət etdin.Mən inanıram ki,bundan sonra da belə olacaqdır.

Qartal iki qanadıyla uçar.

Sənin qanadların möhkəmdir. Uç, ucalara uç,əziz dost!

Qoy səni ata-ana xeyir-duası hifz eləsin!

Ot kökü üstə bitər.

Sənin köklərin müqəddəs torpağımızın dərinliklərindədir.

Qoy səni ulu Dədə Qorqudun xeyir-duası saxlasın.

Qoy cansağlığı və xoşbəxtlik bu yollarda sənin yol yoldaşın olsun!

Nəbi Xəzri

15 mart 1988

Vətənimizin qeyrətli və qüdrətli oğlu Anar, əlli yaşın mübarək olsun.Ədəbiyyatın çətin yollarında sənə daha böyük uğurlar arzulayıram, səni bağrıma basıb öpürəm.

Bəxtiyar Vahabzadə

Hörmətli, əvəzsiz qardaşımız Anar!

Bir qələm sahibi kimi ömrün 50 yaş adlanan zirvəsinə gətirib çıxardığınız ədəbi sərvətlə həm siz özünüz və həm də mənsub olduğunuz xalq fəxr edə bilər. Sizin publisist yazılarınız, nəsr və səhnə əsərlərinizin səsi-sədası çoxdan respublikanın sərhədlərini aşıb keçmişdir. Xalqın müqəddəs ideallarının, milli ləyaqətinin, tükənməz ata-baba irsinin elçisi olmaq hər yaşıçı üçün ən yüksək şərəfdir.Siz bu məhəbbəti Arazın o tayında yaşayan milyonlarla cənublu oxucularınız arasında da qazanmısınız. İnqilabın yüksəliş illərində də,bu gün də onlar sizin əsərlərinizi həvəslə nəşr edir,ehtirasla oxuyurlar.Bu əziz gündə üzümüzü sizə tutur,cənublu qardaş və bacılarınız adından 50 yaşınızı təbrik edir, nəcib və gərəkli işinizdə sizə yeni uğurlar arzulayırıq.

Balaş Azəroğlu, Əli Tudə,

Mədinə Gülgün, Hökümə Billuri, Söhrab Tahir, Afiyət Əmrahi, Sadıqzadə

Əzizim Anar!

Xalqımız sənin çoxcəhətli yaradıcılığına, duyğularına yüksək qiymət verir.Bunu sən qazanmısan! İndi daşıdığın çox mühüm vəzifə - ədəbiyyatımıza, mənəviyyatımıza rəhbərlik eləmək sənin üzərinə tarixi vəzifələr qoyur. Mənəviyyatın bütövlükdə tərəqqisinə can yandırmaqdan çox asılıdır. Ümid eləməyə çoxlu əsas var ki, sən bu həlledici sahədə də yüksək nailiyyətlərə çatacaqsan…Məhəbbətlə, səmimi qəlblə cansağlığı, yaradıcılığının yeni-yeni zirvələrini diləyirm. Sənin başçılığınla hamının göz qoyduğu,xalqımızın böyük-böyük ümidlər bəslədiyi təşkilatımız qüdrətli bir əlin sağlam barmaqları kimi birləşsin, amalımız, xalqımız, irəliləyişimiz yolunda hünər göstərsin. Bizə hər mətləbdən birlik irəlidir, birlik vacibdir.

Öpürəm, təbrik edirəm.

Bayram Bayramov

14. 03. 88

Hörmətli Anar, səni ürəkdən təbrik edirəm. Sənin qələmin,vətəndaş qeyrətin var olsun. Vətən sənə oğul deyir.

Məmməd Araz

Hörmətli Anar!

Mənə verilən mükafat məsələsinə özüm qəsdən bir qədər sonra,ayıq düşüncə ilə və soyuq başla münasibət bildirmək istəyirəm. Bu, əvvəllər olduğu kimi,verilməyə də bilərdi, ədəbiyyat elə bir şey itirməzdi. Ancaq mənim üçün sizin tərəfinizdən olan qayğı,təkid və prinsipiallıq qiymətlidir. Bu münasibət mənim boynuma ciddi məsulliyyət qoyur,məni bacardıqca daha çox işləməyə,zaman qarşısında,sənət qarşında, xalq qarşısında,öz qarşımda hesabat verməıyə, doğru sözün qulu olmağa çağırır.

Sizə və mənə səs vermiş bütün sənət yoldaşlarıma təşəkkür.

Hörmətlə,

Məmməd Araz

26 may 1988

(Anarın şərhi: Daha əvvəlki illərdə Məmməd Araz Respublikanın Dövlət mükafatına təqdim olunmuş və bu mükafatı almamışdı. Mən bunu gözəl şairmizə qarşı böyük ədalətsizlik sayırdım.Yazıçılar Təşkilatının rəhbəri seçilən kimi elə həmin il Məmməd Araza yenidən bu mükafatı təqdim etdim və başqa iddiaçılara "bu il biz yalnız Məmməd Arazı təqdim edirik və yalnız onu dəstəkləyəcəyik" - dedim.Mükafatlar Komitəsində də şairin namizədliyini müdafiə etdim və o, layiq olduğu mükafatı aldı. Məmməd Arazın mənə məktubu isə alicənab və təvazökar insanın nəcib hərəkətidir).

Anar, salam!

Əsərini oxudum.Sevindim. Lap çox sevindim. Ən yaxşı cəhəti budur ki, əsərdə mənfi tip yoxdur. Nə mənfi, nə müsbət. Hamısı adamdı. Yaxşı adamdı. Düşünəndi. Ağıllı adamlardı. Cildanın,Karmenin dili,Zaurun məktubu və i.a. hamısı yaxşıdır. Təhminə, Neymət… Adam bilmir onların hansı bizə daha çox oxşayır. Amma Neymətin ikinci zənginə inanmadım. Allah eləsin ki,neymətlər mütilik torundan açıla bilsinlər.Mən onunçün inana bilmədim ki, birinci zəngi çox inandırıcı vermisən.

Qardaş, hər halda böyük müvəffəqiyyətdir, qələbədir. Əsl qələbə. Amma hərdən-birdən şairlik edirsən (bənzətmələrdən: Məmməd Nəsir qapıdan elə bil ki,üzür istəyirdi və i.a.).

Bu başıpozuq məktubuma görə bağışla. Əsər haqqında məqalə yazıram.Bəlkə də yazıb özümlə apardım,bəlkə də göndərdim. Qalıb bir az da işləmək,dincəlmək istəyirəm. Heç nə işləməmişəm.

Amma onu da deyim ki,əsər haqqında pis rəylər söylənəcək, səni qorxutmasın. Mən uzaqdayam. Bəlkə orada vəziyyət elə deyil. Allah eləsin.Amma Bakıdakı hampaların zövqünə bələdəm.Bilirəm, bu yekə şey o dar boğazlardan bütünlüklə keçməz, boğazlarını cıracaq, incidəcək. Küsəcəklər. Amma əla əsərdir. Deyəsən səni çox təriflədim. O da lazımdır. Lap yaxşı eləyib tərifləyirəm.

Sağ ol. Məndən hamıya salam.

Fikrət Qoca

Qardaşım Anar! Məktubunu aldım. Həm sevindim, həm kədərləndim. Məktubun çox yaxşı,ağıllı məktub idi. Amma sənin ruhun xoşuma gəlmədi. Darıxırsan. Axı niyə? Nə olub? Bir az etinasız ola bilmək müvəffəqiyyətin başlanğıcıdır. Bütün bu hadisələr hamısı bizi əsəbiləşdirmək, bədbinləşdirmək üçündür. Biz onların niyyətini gözündə qoymalıyıq. Gülməliyik. Bacarmasaq da,çətin də olsa gülməliyik. Bunun əhəmiyyəti çoxdur. Biz elə bir dövrdə yaşayırıq ki, talantımız varsa,o talantın yanında böyük aktyorluq istedadımız da olmalıdır. Gülməyi bacarmalıyıq.Lap ürəyimiz ağrıyanda da gülə bilməliyik (Bunlar mənim də edə bilmədiyim şeylərdir, sənə deyə-deyə özüm üçün də təkrar edirəm).Yazırsan ki, son vaxtlar yeni heç bir yazın yoxdur. Bu çox təbiidir,hələ səndə düşdüyün yeni şəraitə vərdiş etmək prosesi gedir.Stolun da,stulun da təzədir.Hələ yaxşı isnişməmisən. Hamısı ondan irəli gəlir və mən inanıram ki, bu sənin yeni yazıların üçün hazırlıq dövrü olacaq.

Dərnəyimiz davam edir.Mənim kitabçamın redaktoru Rəsul müəllimdir.Burada elə bir əsaslı yenilik yoxdur. Hürənlər də sənin qanını qaraltmasın. Onlar da lazımdır.Həyətə təzə adamın gəldiyini birinci onlar xəbər verir.Susmaq və sükutla qarşılanmaq daha dəhşətli olardı.Darıxma.Bir 5-10 ildən sonranı təsəvvürünə gətir: Mütləq biz qalib gələcəyik.Bu günlər gülməli görünəcək. Biz Rəsul müəllimdən birinci növbədə nikbinliyi,sarsılmaz ruh yüksəkliyini öyrənməliyik. Düşmənə ən ağır zərbə onu saymazlıqdır. Ona etinasızlıqdır. Deyəsən ağıllı bir şey deməyəcəm.Odur ki,məktubu bitirməyim ağıllı görünər. Sənə və Zemfira bacıma çoxlu salamlar.

Məktubunu gözləyəcəm.

Fikrət Qoca

29 noyabr 63

Hörmətli Anar!

SSRİ xalq deputatı seçilməyin münasibətilə səni ürəklən təbrik edərəm,qarşındakı məsul ictimai fəaliyyətində sənə böyük uğurlar arzulayıram.

Bildiyin kimi,bir neçə ziyalımıza,o cümlədən sənə mən milli ümid nəzəri ilə baxıram. Gerilikdən çıxmalıyıq,hələ də davam edən həyasız və alçaq hücumlardan xalqımızı qorumağı bacarmalıyııq.Tariximizin indiki ağır dövründə bu cərgədə gedənlərdən xalq çox şey gözləyir. Bu yolda sənin yükün daha ağırdır. Odur ki,sənə möhkəm cansağlığı arzu edirəm.Daha güclü,daha zorlu olasan! Zemfira xanımı hər iki xoş hadisə ilə - fəxri ad alması və sənin "böyük deputat" olmağın münasibətilə təbrik edirəm. Həmişə xoşbəxt olun!

Rəsulun,Nigar xanımın ruhları şad olsun.

Sənin

Teymur Əliyevin

28 mart 1989

Əzizim Anar, səni SSRİ xalq deputatı seçilməyin münasibətilə təbrik edirəm. İnanıram ki,sən ən uca kürsülərdən xalqımızın qanuni haqqını, ədəbiyyatımızın şərəfini ləyaqətlə tələb və müdafiə edəcəksən.

Hörmətlə,

Tofiq Bayram

Əzizim Anar, səni, millətimizin ləyaqətli, istedadlı, hünərli övladını ömrünün, yaradıcılığının yetkin, bəhrəli çağında təbrik edirəm,cansağlığı, ailə xoşbəxtliyi, arzulayıram.Xalqımızın milli şərəfinin,mənliyinin qorunması yolunda sənə uğurlar. Ümid yeri olasan. Öpürəm.

Qasım Qasımzadə

Millətimizin,torpağımızın və ədəbiyyatımızın naminə Allah sizi hər cür bəladan hifz etsin.

Qulu Xəlilli

Azərbaycanın başı üstündə Domokl qılıncı asıldığı zəmanədə əlli yaşı tamam olan əziz, sevimli Anarımız, qüdrətli yaşıçımız,yalnız sizin kimi qadir sənətçilərin böyük sözü bu qanlı qılıncı sındıra bilər. Sizə yepyeni bir bahar çələngi dilərəm.

Xəlil Rza

Anara, əsərlərində yalan, ürəyində çirk, idrakında bədəməl olmayan ləyaqətli ziyalımıza. Ömrün kamillik dövrünə qədəm qoymağın münasibətilə səni təbrik eləyirəm. Müdrik cəsarət, cəsarətli müdriklik arzulayıram sənə ömrün təzə yoxuşunda.

Asif Əfəndiyev

Qara saçlı ağsaqqalımızı,böyük el şairimizin istəkli balasını,görkəmli yazıçımızı,qeyrətli ziyalı el oğlumuzu, doğma qələm dostumuzu, əzizim Anarı 50 yaşı münasibətilə təbrik etməkdə şadam. Baba dağın bahar yelindən, Göyçay çayının daşan selindən sizə salamlar yetirirəm. Qələminiz daha ecazkar,canınız daim sağ, kefiniz həmişə çağ olsun. Daha yüksək zirvələrə qardaşım.

Hörmətlə,

Musa Yaqub

Əzizim Anar!

Açığını deyim ki,son zamanlaradək kimlərinsə 50,60…100 illiyi qeyd olunanda bu rəqəmlərin arxasında qalan illərdən daha çox onların gördükləri işlər barədə fikirləşirdim. Bəlkə də yubileylərin bayram əhvalı buna mane olurdu.Deyə bilmərəm.Lakin indi,bizim nəslin də əlli yaşı haqladığını eşidəndə, həm də yamanca kövrəlirəm.Deməli,sənin də ömrünün əlli ili çatdı. Gözün aydın, qardaş! Gözlərimiz aydın olsun ki,sən bu yarıməsrlik ömrünü çox dolğun keçiribsən:öz zəhmətin, ədəbiyyata və ümümən mədəniyyətmizə, el-obaya məhəbbətin, əlbəttə, ilk növbədə istedadın sayəsində görkəmli söz ustasına çevrilibsən.

İnsan təbiətinin qəribəlikləri çoxdur. O qəribəliklərdən biri də budur ki,insan öz yaşıdlarından nəyisə öyrəndiyini çətin etiraf edir.Yazıçı Anarın xoşbəxtliyi bir də ondadır ki,qələm yoldaşları,dostları,yaşıdları insan Anardan təmkinli,dostlara münasibətdə saf,mərd olmağı,öz ləyaqətini həmişə üca tutmağı da öyrəniblər.

Bunları düşünəndə,ümumiyyətlə, yan-yörəndə mərd adamları görəndə,üstəlik də bu adamların sənin nəslinə mənsub olduğunu biləndə həyat deyilən çətin yol adama asan gəlir,çünki bu yolda təklik duymursan, əksinə, arxanda güclü dayaq hiss edirsən!

Öz yaşıdlarında belə inam yaratmaq hər oğulun hünəri deyil!

Sənə arzuların qədər uzun ömür,möhkəm cansağlığı,bol-bol yaradıcılıq sevinci arzu edən,səni bağrına basıb öpən dostun

Sabir Azəri

14 mart 1988

Hörmətli Anar!

"Dədə Qorqud" motivləri əsasında çəkilmiş filmə baxandan sonra Cəlil Məmmədquluzadəyə dair məqalənizi oxudum.İkisindən də böyük zövq aldım. Uzaq və yaxın keçmişimizi bu qədər müasir gözlə oxumağınıza heyran oldum.Ssenarilə məqalənizdə - təxəyyüllə elmi idrakın vəhdətinə qibtə etdim. Məqaləni oxuyandan sonra ssenaridə məxəzə sərbəst münasibətinizin səbəbləri,süjet və epizod yerdəyişmələri,Qazanın taleyi, "Dədə Qorqud"a bənzəməyən final mənə aydın oldu.Bəzi lövhələri müasirləşdirmək cəhdiniz də güman ki,mənə düzgün çatdı.Yeddi gün-yeddi gecə ağlayan Qazanın adam üzünə çıxmamasını da başa düşdüm. Mənə elə gəlir ki,Qazan ona sadiq olan bir igidə,başı bəlalar çəkmiş bir qeyrətli adama ağlamır,həm də qohum və tayfa qanını tökən əllərin törədəcəyi fəlakətə,qan intiqamı üçün qılıncların qından çıxarılmaq bəlasına ağlayır - rüsvayçılıq,pərakəndəlik,yadlaşmaq gətirən bir bəlaya ağlayır.

Görmüşük ki,bir köksə bir nizə sancılardı. Qazan,polad köksünə sağdan və soldan sancılmış nizələri cəhd etsə də, necə çıxara bilər? (Bu Qıpçaq Məliyin toru deyil ki, Qazan onu parçalasın və sonra köhlən belinə sıçrasın!)

Qazanın ssenaridəki şəkildə köhləndən aşması, arxası üstə yerə gəlməsi,onu torpağa mıxlamaq istəyənlərin gözlərinə baxması dəhşətlidir!

Ağıllı,düşünülmüş,incə yerdəyişmələrin hamısı gözəldir! Sizi tərifləməyə ehtiyac duymuram,tərif gözləməyə siz də gərək meylli olmayasınız. Sizə üç kəlmə sözüm var: Çox sağ olun!

Pənah (P.Xəlilov)

28 yanvar 1977

Əziz Anar!

"Ağ liman" povesti bizim nəsrimizin ən görkəmli əsərlərindəndir. Sizin üslubunuz, poetik ifadə tərziniz vicdanlı və savadlı oxucular tərəfindən şübhəsiz, yüksək qiymətləndiriləcəkdir.Dilinizin obrazlılığı məni sevindirir.Mən həqiqi nəsrdə görmək istədiklərimin çoxusunu burda gördüm. Cümlələr qafiyəsiz şeir misralarıdır. "Ağ liman" mənm üçün poemadır.

Sizə yeni cəsarətli addımlar arzulayıram.

Səmimi salamlarla

Şəkər Aslanov

20.03.1967

Qardaşım Anar!

Biz müxtəlif siniflərə mənsub adamlar olsaq da, mən sizi həmişə namuslu bir ziyalı, xalqını təmsil edə biləcək türk övladı və sinfinin ağıllı bir nümayəndəsi kimi yüksək qiymətləndirmişəm. Siz insanları hansı baxımdan qiymətləndirirsiniz,bilmirəm,mən özünü olduğu kimi göstərmək baxımından qiymətləndirirəm və belə düşünürəm ki, siz nə yaradıcılığınızda, nə də real həyatda özünə xəyanət etmiş adam olmamalısınız. Sizin esselərinizdən məlum olur ki, son dərəcə dərdli, başının anlamaq bəlası olan bədbəxt bir bəndəsiniz. Bunu da bilirsiz ki,uzun müddətdi yatırılmış Azərbaycan xalqı,bizim biçarə millətimiz artıq aylımış,öz haqqını başa düşməyə başlamışdır. Belə olan halda mənəvi birlik və milli özünüdərk prosesini sürətləndirmək, xalqın mənəvi dayaqlarını hər vasitə ilə möhkəmləndirmək bizim qarşımızda duran ən ümdə məsələ olmalıdır. Mənə belə gəlir ki,həmin baxımdan siz öz imkanlarınız və dövlətin sizə verdiyi müvəqqəti imtiyazlar daxilində elə ciddi bir iş görmür, bununla da yaranmış tarixi şəraitdən tam istifadə etmirsiniz. Ola bilsin k,bir də belə fürsət ələ düşmədi. Tələsmək lazımdır. İndi biz öz İttifaqımızı "bəli-bəli"lərdən, "bəzi-bəzi"lərdən təmizləməsək,sonra bu, xalqa çox baha oturacaq.Yazıçılar İttifaqında müstəqil fikirli,yetkin adamlar azdır.Siz buna inanın.Bizim karyerə əsirləri, yuxarıların itaətkar qulları oyanmış xalqın arxasınca sürünməkdədir. Yazıçılar İttifaqı belə adamlarla doludur. Ümumi işin xatirinə siz bu adamlarla "pis" olmağı bacarmalısınız. Əks- təqdirdə xalq bizi lənətləyəcək. Siz öz ətrafınızdakı Kəbirlinskilərlə özünüzü həmişə qüvvəsiz və tənha hiss edəcəksiniz. Ətrafınızda sinfi cəhətdən deyil,mənəvi cəhətdən uyğun adamları toplayın. Gənclik haqqında. Burda sağlam qüvvələr də var. Lakin tədricən qruppabazlığa və karyera azarına tutulanlar da az deyil, hətta çoxdur. Səfər Alışarlı,Tehran Vəliyev, Saday Budaqlı, Akif Əhmədov, Azər Əbilov inanılmalı və yetişmiş ziyalılardı, qalanlardan ağlım bir şey kəsmir. Boşboğazlıqla məşğuldurlar, hayıf…

Nəhayət,mənə iş axtarırsız.İnanın ki,minnətdaram.Tələsməyin,mənim onsuz da işim çoxdur. "Qayğı"ya qul lazımdır. Məndən də indiyə qədər qul olmayıb,görünür mən ora yaramayacağam. Ümumiyyətlə,mənim fərdi "dərdim" məni o qədər də narahat etmir. Öpürəm.

Hörmətlə,

Ağamalı Sadiq

11 yanvar 1989

Əziz Anar müəllim, Yazıçılar Təşkilatının rəhbəri seçilməyiniz münasibətilə sizi ürəkdən təbrik edirəm. Ümid yarandı ki, Azərbaycan ədəbiyyatı nəhayət, depressiyadan qurtulacaq, Azərbaycan oxucusu ağrısız və vicdansız yaşayıb orden və medallarıyla zınqırovlu toy qoyunlarına bənzəyən yalançı klassiklərdən xilas olacaq. Hamımız sevinirik, uğurlar diləyirik. Hörmətlə,

Rafiq Tağı

Moskva

Hörmətli Anar müəllim!

Sizin istər millət vəkili kimi, istər yazıçı kimi, istərsə də Azərbaycan Yazıçılari Birliyinin sədri kimi müsbət fəaliyyətiniz göz qabağındadır. Müasir Azərbaycan yazıçılarının ən nüfüzlü nümayəndəsi olaraq sizi həmişə öndə görürük. Bu gün millətini, xalqını sevən hər bir kəs sizi müasir Azərbaycan ziyalılığının etalonu hesab edir. Mən də belə hesab edirəm. Böyük cəsarətinizə, yüksək etika və mədəniyyətinizə, xalqa, millətə və böyük ədəbiyyatımıza dərindən bağlılığınıza görə, sevginizə görə! Son illərdə ədəbiyyatımızda əsl sənətdən və sənətkarlıqdan uzaq olan qondarma cızmaqaraçılar peyda olub. Onlar sizin dediyiniz qara milçəklərdir ki, sizin ətrafınızda vızıldayırlar. Onlar öz vızıltılarına layiq olduqları çirkabda boğulub qalacaqlar. Onlar sizin adi salamınız qədər səmimi ola bilməzlər! Kaş Allah imkan verəydi bu səmimiyyətin cavabında biz də bir iş görə biləydik.

Dərin hörmət və ehtiramla,

Müzəffər Şükür Məchul

29 iyul 2002

Salam, əziz Anar müəllim!

"Qobustan" jurnalının 4-cü nömrəsində şeirlərimin çap olunması xəbərini dünən eşitdim.Sizə sonsuz təşəkkürümü bildirirəm. Şeirlərimi "Qobustan"a çoxdan təqdim etmişdim. Amma bu haqda sizə də yazmamışdım ki, nəsə, yaxşı düşməz. Anar müəllim, sizin qayğınızın qarşısında özümü bir şair kimi borclu sayıram… Və bu qayğının nahaq yerə olunmadığını ömrüm boyu sübut etməyə çalışacam.

Hörmətlə,

Əlisəmid (Kür)

14 aprel 1985,

Xarkov şəhəri

Əzizim Anar!

Ürəyimdən gələn ən səmimi sözlərimi sənə çatdırmaq istəyirəm!

Bahar ilin ən gözəl fəslidir. Deyirlər baharda dünyaya dələn insan xoşbəxt olur. Çünki baharda təbiət bütün var-dövlətini, gözəlliyini insanlara bəxş etməyə çalışır. Hər tərəf al-əlvan çiçəklərə, yamyaşıl otlara qərq olur. Elə bil çöllərdəki bu yaşıllıq azmış kimi, insanlar evlərdə də yaşıl səməni göyərtməyə başlayırlar.

Baharın ilk müjdəçisi,tez açılıb,tez solan boynu bükük bənövşə kimi vaxtsız gedən Cəfərimi, Müşfiqimi, yoxsa bir ceyrana güllə atmağa qıymayan təbiət vurğunu Səməd Vurğunumu deyim? Qəlbləri həmişə yazıb-yaratmaq eşqi ilə döyünən, baharın təzə-tər çiçəkləri kimi saf qəlbli insanlar məgər bahar oğulları deyilmi?

Doğrudan da baharda dünyaya gələn insanların qəlbi, ürəyi həmişə yazmaq, yaratmaq, qurmaq, öz xalqına xeyir vermək eşqi ilə döyünür.

Əziz Anar! Bu baharda sənin 50 yaşın tamam olur. Sən iki qəlbin döyünən ürəyisən! Sən Rəsul yadigarı, Nigar nişanəsisən. Kaş elə imkan olaydı ki, sənə demək istədiyim sözləri mənim ürəyimdən oxuya biləydin. Axı sən mənim üçün təkcə xalqın, elin yazıçısı kimi yox, həm də əzizlərimin yadigarı kimi əzizsən.

Nə arzulayıram sənə, əziz balam Anar! Uzun ömür, cansağlığı, ailə xoşbəxtliyi… və bir də arzu edirəm ki, keçən 50 yaşının üstünə bir 50 bahar da gəlsin.

Mən eşidəndə ki,sənə Azərbaycan SSR fəxri fərmanı verilib, çox sevindim. Gün o gün olsun ki, daha yüksək fərmanlara layiq görüləsən.

Sən qiymətli yadigarsan,

Sanki ətirli baharsan.

Arzuların qanad çalsın,

Qızıl gül tək ətir saçsın.

Hörmətlə,

Dilbər

(Dilbər Axundzadə- M.Müşfiqin

həyat yoldaşı- red.)

Əziz Anar!

Şanlı yubileyin münasibətilə səni ürəkdən təbrik edirəm. Mədəniyyətimiz naminə Sənə möhkəm cansağlığı,uzun ömür,böyük yaradıcılıq uğurları arzulayıram. Ümid edirəm ki,sənin artan nüfuzun dostun Vaqif Mustafazadənin mənzil muzeyinin tezliklə yaranmasına yardım edəcək. Öpürəm.

Vaqifin anası

Zivər xanım

Çox hörmətli Anar müəllim! Salam!

Ülvi (Ülvi Bünyadzadə nəzərdə tutulur - red) yaradıcılığına, şəhid taleyinə göstərdiyiniz qayğı, diqqət ailəmiz, şəxsən mənim üçün unudulmaz təəssüratlardır. Çox sağ olun!

Səmimiyyətlə,

Almaz Ülvi (Bünyadova)

yanvar, 2000

Ədəbiyyat qəzeti.-2010.-12 mart.-S.3.