Məktəb və qəzet

Bu günlərdə 31 saylı orta məktəbdə "Ədəbiyyat qəzeti"nin yaradıcı kollektivilə görüş keçirildi. Qəzetin 75 illik yubileyi çərçivəsində düzənlənən mərasimi məktəbin dil-ədəbiyyat müəllimi Kəmalə Abiyeva açaraq vurğuladı ki, yaradıcı insanlarla görüş əslində bayramdı: "Belə insanlarla canlı ünsiyyət həmişə maraqlıdı. Ölkə başçısının sərəncamı ilə "Ədəbiyyat qəzeti"nin yetmiş beş illik yubileyinin geniş qeyd edilməsi milli mətbuatımıza, söz sənətimizə, ədəbiyyatımıza dövlət səviyyəsində göstərilən diqqət və qayğıdan irəli gəlir. Bu qəzet həqiqətən yarandığı gündən bəri Azərbaycan ədəbiyyatının inkişafına ləyaqətlə xidmət edib. Doğru qeyd edirlər ki, əsrin dörddə üçünü başa vurmuş "Ədəbiyyat qəzeti"nin səhifələrində çağdaş ədəbi proseslə yanaşı həm də zəngin tarixə malik klassik irsimiz vəhdət halında yaşayır. Bu görüşün bir özəlliyi də qəzetin baş redaktorunun məktəbimizin yetirmələrindən olmasıdı. Hər bir insanın vaxtilə təhsil aldığı məktəblə ünsiyyəti, ona qonaq gəlməsi əzizdi. Məktəbimizdə ədəbiyyata, sənətə böyük maraq və diqqət var. Yaxşı olar ki, şair və yazıçılarımız yeni nəşr olunan kitablarını məktəblərimizə hədiyyə etsinlər."

Sözügedən məktəbdə təhsil aldığı illəri heç zaman unutmadığını önə çəkən "Ədəbiyyat qəzeti"nin baş redaktoru Ayaz Vəfalı çıxışında dedi: "Bu görüş mənim üçün çox əziz, xüsusi bir görüşdür. Mən bu məktəbdə iki il təhsil almışam. O günləri heç vaxt unutmur, imkan daxilində məktəbdən və müəllimlərimdən xəbər tuturam. Burada mənə dərs deyən müəllimlərdən dünyasını dəyişənləri də var. Onların işıqlı xatirəsi qəlbimdə yaşayır. Azərbaycan Prezidenti cənab İlham Əliyevin 18 may 2009-cu il tarixli sərəncamına əsasən 75 illiyi qeyd olunan "Ədəbiyyat qəzeti"nin kollektivi ilə bir sıra maraqlı görüşlər keçirilib. Artıq yubiley tədbirləri yekunlaşmaq üzrədir. Bakı şəhər Təhsil İdarəsindən hansı məktəbdə görüş keçirilməsini istədiyimizi xəbər alanda mən 31 saylı məktəbin adını çəkdim. Bu, təbii bir istəkdi. Burada mənimlə bərabər unudulmaz ədəbiyyatşünas alimimiz Yaşar Qarayev də təhsil alıb. Məndən bir sinif yuxarı idi. Onu mənimlə xatirəsini həmişə əziz tutduğumuz Ağahüseyn Bağırzadə müəllim yaxınlaşdırmışdı. Yaşarın, mənim ilk qələm təcrübələrimizi Bağırzadə müəllim həvəslə dinləyir, məktəbin divar qəzetində dərc etdirir və bizi həvəsləndirirdi. Təhsil illərimizdən sonra da Bağırzadə müəllimin unudulmaz adı Yaşar Qarayevlə mənim söhbətimdən keçməmiş olmurdu. Hələ 1952-ci ildə o, bizə "Dədə Qorqud" dastanından danışırdı. Bu, o illər idi ki, görkəmli alimimiz Həmid Araslı məhz bu dəyərli dastanı tədqiq etdiyinə görə təqiblərə məruz qalırdı. Həmin illərdə mənə dərs demiş unudulmaz müəllimim Əmralı Xəlilovun, Rəfiqə Axundovanın da adını həmişə ehtiramla xatırlayıram. Çox istərdim ki, burada dərs deyən müəllimlərin tərcümeyi-halını, fəaliyyətini əks etdirən xüsusi guşə yaradılsın. Bu görüş mənim üçün çox əzizdi. "Ədəbiyyat qəzeti"ni həmişə xalqımızın ruhunun ifadəsi kimi xarakterizə ediblər. Məhəmməd Əmin Rəsulzadə də deyirdi ki, ədəbiyyat xalqın ruhudu. Çox istərdim ki, bugünə qədər dörd minə yaxın sayı işıq üzü görən "Ədəbiyyat qəzeti"lə məktəblərimizin əlaqəsi daha da geniş olsun".

Sonra məktəbin şagirdlərindən Aysel Xəlilova, Səbinə Camalova, Nuray Məmmədova vətənvərvərlik mövzusunda şeirlər söylədilər, "Ədəbiyyatsevərlər" dərnəyinin üzvlərindən Kazım Kazımov, Seymur Əhmədov ilk qələm təcrübələrini oxudular.

Qəzetin şöbə müdiri, filologiya elmləri namizədi Adil Cəmil çıxışında vurğuladı ki, burada xatırlananlar doğulduğum Kəlbəcər rayonunu, orta təhsil aldığım Mingəçevir şəhərini, ilk müəllimlərimi yadıma saldı: "Mənim məktəblilərə ən böyük arzum onların öz istəkləri, arzuları yolunda dönməz, ardıcıl olmalarıdı. Məqsədə doğru inamla gedəndə Allah onu yetirir".

Qəzetin məsul katibi Atababa İsmayıloğlu və şöbə müdiri Sərvaz Hüseynoğlu tədbirdə çıxış edərək milli-mənəvi dəyrələrin qorunmasında, gənc nəslin yetişdirilməsində müəllim əməyinin önəmli yeri olmasından, bu sahədə söz sənətinin üzərinə düşən vəzifələrdən danışdılar.

Məktəbin məzunu Nəcibə Bağırzadə çıxışında vurğuladı ki, ədəbiyyat ilğım kimidi - adamı dəfolunmaz bir qüvvəylə özünə çəkir; yaxınlaşdıqca nə qədər uzaqda olduğunu görürsən. "Mən "Ədəbiyyat qəzeti"nin daimi oxucusuyam və bu qəzetin milli-mənəvi dəyərlərimizin qorunması, ədəbiyyatımızın təbliği sahəsindəki yerini yaxşı bilirəm. Son sayda haqqında xoş sözlər söylədiyiniz babam Ağahüseyn müəllim barədə məqaləmin dərc olunması bütün ailəmizə böyük sevinc bəxş elədi. Vəfadarlıq qəzetin başlıca dəst-xətti olaraq həmişə öndə olub - söz yox ki, ədəbi haqlara, sənətkar şəxsiyyətinə, istedada olan vəfadarlıq".

Azərbaycan dili və ədəbiyyatı müəllimi Fəxriyyə Qurbanova düzənlənən tədbirlə bağlı təəssüratlarını belə ifadə etdi ki, bugünkü tədbir hər bir ədəbiyyatsevər insanın bayramıdır: "Biz burada məktəbimizin məzunlarından söz açdıq, öz müəllimlərimizi xatırladıq. Bu, həm də bir tərbiyə dərsidi. Yəni, çəkilən zəhmət öz bəhrəsini verir, heç kəs, heç nə yaddan çıxmır, ancaq öz sənətini sevən və sevdirən insanlar xatırlanır".

Tədbiri məktəbin direktoru Şükufə Məmmədsalahova yekunlaşdıraraq dedi: "Bugünkü görüş həm də Novruz bayramının astanasında olduğumuz bir gündə keçirilir. Bu da təsadüfi deyil, Novruz təbiəti, ədəbiyyat cəmiyyəti, mənəviyyatı hərəkətə gətirir, təzələyir. Yaxın günlərdə məktəbimizin səksən illiyini qeyd edəcəyik. Hesab edirəm ki, yaradıcı insanlar da yubiley günlərində bizimlə bir yerdə olacaq".

S.Hüseynoğlu

Ədəbiyyat qəzeti.-2010.-19 mart.-S.7.