Sonu qələbədir belə qeyrətin

Azərbaycanın Milli Qəhrəmanı

Mübariz İbrahimovun əziz xatirəsinə

Düşmənə nifrətin dəryalar qədər,

Özün fidan idin, fidan Mübariz.

Sənsiz könlümüzü bürüdü kədər,

Yoxsan aramızda nədən, Mübariz?

Adının mübariz sehrinə uydun,

Hamını bir anda heyrətdə qoydun;

Zülmətin bağrını sən elə oydun,

Gəldi şəfəqlərdən sədan, Mübariz.

Elim fəxr eləyir sənin adınla,

Yaşa bu ölümsüz, mərd həyatınla.

O uca göylərdə uç qanadınla,

Yayılsın ədalət nidan, Mübariz!

Vətənə can qurban edən igidim,

Mən də sənin üçün can qurban edim.

Şəninə yaralı bir şeir dedim,

Ey məni pərişan edən, Mübariz.

Qəhrəman oğlusan elin, millətin,

Tarixə yazıldı bu şücaətin.

Sonu qələbədir belə qeyrətin,

Qalib gələcəkdir Vətən, Mübariz!

Kəmalə

Ədəbiyyat qəzeti.- 2010.- 26 noyabr.- S.4.