Öz-özümlə yubiley müsahibəm

- Demək, yetmiş beş də arxada qaldı…

Saqqalın ağardı, bağın saraldı…

Yuvarlaq sayınla gəldi yubiley.

Dostun Fikrət Sadıq demiş: "yu-biley"

- Yumağa nə var ki… suallar hanı?

Olmaya, bu imiş sözünün canı?

- Yaxşı, de, nə yazıb-pozursan, danış.

Romanmı, şeirmi? Bilsin dost-tanış.

Bəlkə memuarlar könlündən keçir?

Ağlına gələni kağıza köçür…

- Əzizim, qurtardı mənim romanım,

Baxıram, boşalıb o yan-bu yanım.

Göylərə yollanıb ilham pərisi,

Çətin ki, təzədən yerə enəsi…

- Axı yubileydi… Qəm daşını at,

Material gözləyir qəzet, mətbuat…

- Yazsınlar, filankəs sağdır hələ ki.

Təxirə salınıb fələyin rəngi…

- Bəs sözün-söhbətin? Bəs planların?

Olmaya, tükənib daxılda varın?

Qocalıb qaldınmı beli bükülü,

Təsbeh fırladırsan gözü mürgülü?

Sənə yer verirlər avtobuslarda?

- Şükür, böyük-kiçik tanıyan var da…

- Yubileylə bağlı bir qədər danış.

- Şeypurlar çalınır. Gül-çiçək, alqış…

Toqquşan badələr, atəşin tostlar,

Mübarək kəlamlar, kövrələn dostlar…

- Yenə də zarafat atına mindin…

Nədir umacağın, nədir niyyətin?

- Havalar bürküdür… Göylərə bir bax…

Deyəsən, inşallah, yağış yağacaq…

Səyavuş Məmmədzadə

Ədəbiyyat qəzeti.- 2010.- 8 oktyabr.- S.6.