Tanınmış şair-tərcüməçinin 75 illiyi qeyd edildi

Azərbaycan Yazıçılar Birliyinin Natəvan klubunda tanınmış şair-tərcüməçi, əməkdar incəsənət xadimi Səyavuş Məmmədzadənin 75 illiyinə həsr olunmuş tədbir keçirilmişdir.

Tədbirdə Milli Məclisin deputatı Elmira Axundova, AYB-nin sədri, xalq yazıçısı Anar, bu qurumun katibi, xalq yazıçısı Çingiz Abdullayev və başqaları çıxış edərək Səyavuş Məmmədzadənin həyat və yaradıcılığından danışmışlar.

Bildirilmişdir ki, ədəbi yaradıcılığa 1958-ildə "Sınaq" şeri ilə başlayan S.Məmmədzadə tərcüməçi kimi də qələmini sınamış və uğur qazanmışdır. Onun poeziya, nəsr, publisistika sahəsində bədii tərcümələri qısa müddətdə müəllifinə şöhrət gətirmişdir. O, Azərbaycan ədəbiyyatı nümunələrini rus dilinə, rus, bolqar, Ukrayna, polyak və s. dillərdən isə ədəbi əsərləri Azərbaycan dilinə müvəffəqiyyətlə tərcümə etmişdir.

Prezident təqaüdçüsü, şair İlyas Tapdıq, AYB-nin məsul işçisi Nazim İbrahimov, xalq artisti, bəstəkar Tofiq Bakıxanov tədbirdə çıxış edərək S.Məmmədzadənin rus dilində nəşr olunmuş "Nebo", "Tverskoy bulvar", "Samoutverjdeniye", "Noçnıye yabloki", "Komedantskiy ças", "Vremya sobirat kamni", Azərbaycan dilində "Bir yuxusuz gecə", "Günəbaxan insanlar", "Həqiqət sorağında. Mirzə Kazım bəyin ömür yarpaqları" və s. kitablarının oxucular tərəfindən rəğbətlə qarşılandığını bildirmişlər.

Tədbirdə qeyd edilmişdir ki, Səyavuş Məmmədzadə Azərbaycan ədəbiyyatı və tərcümə sənəti sahəsindəki xidmətlərinə görə Rusiyanın ölkəmizdəki səfirliyinin, Azərbaycan-Ukrayna Dostluğu Xeyriyyə Cəmiyyətinin xüsusi mükafatlarına və Azərbaycan Respublikası Prezidentinin təqaüdünə layiq görülmüşdür.

Sonda S.Məmmədzadə tədbirin təşkilatçılarına və iştirakçılarına minnətdarlığını bildirmiş, yeni şeirlərini oxumuşdur.

Ədəbiyyat qəzeti.- 2010.- 8 oktyabr.- S.6.