Gedək Mübarizin arxasınca biz

Bir ağ göyərçindi Mübariz indi,

Vətən göyləri də Mübarizindi.

Müəllif

İrəli can ataq, önə şığıyaq,

Bizə arxalanır bu gün el-oba/.

Ehtiyat igidin yaraşığı yox,

Ehtiyat igidin eybidir, baba.

Qəzəbi barıtsa, nifrəti oxsa,

Yana torpağına, daşına gərək.

Başı üzərində bayrağı yoxsa,

Bədəni üstündə başı nə gərək?!

İstidə açılar, soyuqda solar,

Canında cəsarət heç zaman olmaz/.

Ehtiyatlı kəsdən nə desən, olar,

Amma igid olmaz, qəhrəman olmaz.

Ehtiyat eyləyən qula çevrilər,

Ondan fərasətli olar qara daş.

İgidin anası ağlaya bilər,

İgidin Vətəni ağlamasın kaş!

Heç darı əkərmi sərçədən qorxan,

Karvan yeriməli, it hürməlidir.

İgidin köksünün altından hər an

Bir qəzəb vulkanı püskürməlidir.

Əzdikcə yağını sərt oğulları,

Vətən gözlərinin yaşını silər.

Mübariz sayağı mərd oğulları

Azərbaycan kimi yurd doğa bilər!

Göstərdi dünyaya öz hünərini,

Yurda qurban gedən oğullar kimi.

Qəfil yaxaladı düşmənlərini

Yayın ortasında yağan qar kimi.

Vətən sevgisindən dərs keçdi bizə,

Səfərbər eylədi qeyrətimizi.

Bir vaxt vücuduyla səsləyirdisə,

İndi cəsədiylə çağırır bizi.

Hüzn dalğası var səhər yelində,

Başlar enir matəm bayrağı kimi.

O cəsəd girovdu yağı əlində,

Girovdu Qarabağ torpağı kimi.

Nə yerə sığışır, bu dərd nə göyə,

Yurdunu sevməyən daş olmalıdır.

Mübariz ruhumuz ölməsin deyə,

Mübariz əməllər yaşamalıdır.

Yağış yağmalıdır, şimşək çaxıbsa,

Millət sabahını düşünməlidir.

Harda şəhidlərin qanı axıbsa,

Ora qərənfillər döşənməlidir.

Mübariz sözünü savaşla deyib,

Həyəcan təbili çalınmalıdır.

Onun intiqamı qeybətlə deyil,

Qeyrətlə yağıdan alınmalıdır.

Təki Azərbaycan yaşasın deyə,

Sarılaq qəzəb tək bir qılınca biz.

Gedək Qarabağı xilas etməyə,

Gedək Mübarizin arxasınca biz!

Mirdamət Əziz

Ədəbiyyat qəzeti.- 2010.- 22 oktyabr.- S.4.