"Mədəniyyətin və mədəni dəyərlərin təbliğində kütləvi informasiya vasitələrinin rolu"

Ümummilli lider Heydər Əliyevin "Yüksək mədəniyyətə malik olan xalq həmişə irəli gedəcək, həmişə yüksələcək, həmişə inkişaf edəcəkdir" bəyanı oktyabrın 26-27-də keçirilən "Mədəniyyətin və mədəni dəyərlərin təbliğində kütləvi informasiya vasitələrinin rolu" adlı beynəlxalq təlimdə səsləndirilən fikirlərdən dönə-dönə keçdi. Mədəniyyət və Turizm Nazirliyinin təşəbbüsü ilə Muzey Mərkəzində gerçəkləşən sözügedən təlimin açılış mərasimində ilk olaraq qonaqları salamlayan nazir müavini Sevda Məmmədəliyeva çıxışında Azərbaycan mətbuatının tarixi, keçdiyi yol və zəngin ənənələri haqqında ətraflı söz açdı, əsası 135 il bundan əvvəl qoyulan - 1875-ci ildə nəşrə başlayan "Əkinçi"nin mənəvi varisi sayılan çağdaş mətbuatımızın bu gün cəmiyyətin maariflənməsində, məlumatlandırılmasında mühüm rol oynadığını önə çəkdi. Vurğuladı ki, ulu öndər Heydər Əliyev Azərbaycana rəhbərlik etdiyi bütün dövrlərdə mətbuatın inkişafına xüsusi diqqət yetirib. Bu gün ümummilli liderin layiqli varisi, ölkəmizin başçısı cənab İlham Əliyev bu ənənəni ləyaqətlə davma etdirir.

Təbrik nitqində Mədəniyyət və Turizm Nazirliyi tərəfindən son illər həyata keçirilən tədbirlərin mətbuatda yetərincə işıqlandırıldığını qeyd edən nazir müavini "Mədəniyyət və mədəni dəyərlərin təbliğində kütləvi informasiya vasitələrinin rolu" adlı təlimin keçirilməsinə diqqəti yönəldən zərurət üzərində də dayandı. Ümidvar olduğunu bildirdi ki, ilk olsa da, sonuncu olmayacaq bu təlim yerli jurnalistlərin hazırlıq səviyyəsinin artırılmasına, respublikamızda mədəniyyət siyasəti çərçivəsində həyata keiçrilən tədbirlərin düzgün işıqlandırılmasına öz töhfəsini verəcəkdir.

Tədbirin aparıcısı, sözügedən layihənin ideya müəllifi, Mədəniyyət və Turizm Nazirliyinin elm və təhsil şöbəsinin Elmi metodiki sektorunun müdiri Asif Usubəliyev çıxışında jurnalist fəaliyyətinin hər bir ölkədə dördüncü hakimiyyət kimi dəyrələndirildiyini önə çəkdi. Bildirdir ki, hazırda bu sahədə çoxlu sayda peşəkarlar çalışır: "Ancaq jurnalistika sahəsində qeyri-peşəkarların mövcudluğu da sirr deyil. Məhz bu səbəbdən də peşəkar jurnalistlər son vaxtlar Mədəniyyət və Turizm Nazirliyinin tərkibində Şura yaradılması zərurətini gündəmə gətirirlər. Hesab edirəm ki, təlimin gedişində bu məsələ ilə bağlı da fikir mübadiləsi ediləcək..."

Azərbaycan Jurnalistlər Birliyinin baş katibi, Bakı Dövlət Universitetinin professoru, əməkdar jurnalist Ramiz Əsgərov "Azərbaycan mədəniyyətinin özünəməxsus xüsusiyyətləri" mövzusunda çıxış edərək Azərbaycan mədəniyyətinin etnik və dini mənsubiyyəti haqqında ətraflı danışdı. Vurğuladı ki, Azərbaycan mədəniyyəti etnik baxımdan türk, dini baxımdan islam mədəniyyətidir. Azərbaycan türklüyün qızıl görpüsü, islami dəyərlərin çarpazlaşdığı məkandır. Şərqdə ilk opera, ilk caz musiqisi, ilk simfonik musiqi Azərbaycanda yaranıb. Ölkəmiz həmişə öz tolerantlığı ilə seçilib. Azərbaycan həmişə müxtəlif dini qurumları, milli azlıqları öz içərisinə alıb. Azərbaycan dili öz estetikliyi, poetikliyi, saflığı ilə seçilib. forma və məzmunun vəhdəti Azərbaycanda çox önəmlidi. Mədəniyyətimizin zənginliyi, bəşəri dəyərləri özündə ehtiva etməsi imkan verir ki, hər cür mütərəqqi mədəniyyət faktoruna qucaq aça bilsin. Bizim saz sənətimiz də, muğam dünyamız da var, ölməz Üzeyir bəyin musiqi sənətilə bərabər Qara Qarayev, Fikrət Əmirov, eyni zamanda Vaqif Mustafazadə möcüzəsi də. Bu görkəmli sənətkarların yaradıcılığında Şərqlə Qərbin sintezi bir araya gəlib.

Azərbaycan bəşəriyyətin ilk yaşayış məskənlərindən biridir. Azıx mağarası, Qobustan qayaları tarixə yoldaşlıq edir. Səfəvi, Ağqoyunlu, Qaraqoyunlu, Şirvanşahlar sarayları milli mədəniyyətimizin inkişafına böyük təkan verib. Bu yurdun havası, iqlimi, torpağı çox zəngindi. Hazırda dünyada güclü qloballaşma gedir. Qərb mədəniyyəti iqtisadi-siyasi gücü ilə üzərimizə gəlməkdədi. Bu gəlişmənin qarşısını almaq mümkün deyil. Ancaq biz sintez etməyi, yaxşını qəbul etməyi bacarmalıyıq. Yeni, modern Azərbaycan mədəniyyətinə sahib çıxmalıyıq. Ötən il Almaniyada "Arşın mal alan"ın səhnəyə qoyulması bizim milli mədəniyyətimizin böyük nailiyyətlərindən biri kimi dəyərləndirilməlidi. Həmişə inkişaf etmək Azərbaycan mədəniyyətinin haqqıdı. Ancaq biz bu böyük mədəniyyəti təbliğ etməyi də bacarmalıyıq. Bu sahədə diaspor təşkilatlarımızın üzərinə böyük yük düşür. Dövlətimiz güclənir, hesab edirəm ki, bu iqtisadi güclənmə mədəniyyət sahəsinə də öz töhfəsini verəcək. Çox istərdim ki, bizdə xüsusi mədəniyyət kanalı fəaliyyətə başlasın. Homer, Höte kimi klassiklərlə yanaşı yapon, Çin ədəbiyyatı nümunələri də geniş şəkildə dilimizə çevrilsin. Bilirik ki, Azərbaycan mədəniyyəti zaman-zaman erməni basqınına, mənimsəməsinə məruz qalıb. Bu gün bu mənfur siyasət daha amansızlıqla davam etdirilir. Torpaqlarımızla yanaşı mədəniyyətimizi də mənimsəyir, talayırlar. Biz bu nankorluğu dünyaya bəyan etməyin sistemli yolunu tapmalıyıq..."

Rusiyanın "Kultura" ("Mədəniyyət") qəzetinin əməkdaşı İrina Kulik, Ümumrusiya Dövlət Teleradio kompaniyasının (RTR) mədəniyyət şöbəsinin müdiri Qulşat Baltayeva, Rumıniyanın "Mədəniyyət" - milli radiosunun nümayəndələri Doruş Bitfoin və Nataliya Polikarlova, "Exo" qəzetinin məsul katibi Səadət Bağırova və başqaları çıxış edərək vurğuladılar ki, jurnalistika sahəsində peşəkarlıq öndə olmalıdır. Mədəniyyətin inkiaşfında KİV-in böyük rolu var. Ancaq bu sahədə çalışan insanlar öz profillərini müəyyənləşdirməlidirlər. Televiziya sahə\si daha incə sahədi. Burada musiqinin, filmin, informasiyanın və s. yerli-yerində verilməsi xüsusi önəm daşıyır. Bu sahədə insanların psixoloji durumu xüsusilə nəzərə alınmalıdı. Elə problemlər var ki, o, bütün dünya telekanalları üçün yaşanır. Ancaq bu problemləri süni olaraq yaratmaq olmaz. İmkan vermək olmaz ki, telekanallar bayağı verilişlərlə millətin zövqünü korlasın. Televerilişlər bəşəri dəyərləri təbliğ etməklə yanaşı, millətin milliliyini qoruyub-saxlamasına da yardımçı olmalıdı.

Təlimi yekunlaşdıran mədəniyyət və turizm nazirinin müavini Sevda Məmmədəliyeva ümidvar olduğunu bildirdi ki, burada müzakirə olunan, təklif edilən məsələlər söz olaraq qalmayacaq, aparılan fikir mübadilələri mədəniyyətimizin təbliği işinin yeni formalarının üzə çıxmasına yönəli olacaq: "Mən təlim prosesinə gənc jurnalistlərin bu cür fəallıqla qatılmasını xüsusi olaraq alqışlayıram".

Sonda S.Məmmədəliyeva təlimin iştirakçılarına sertifikatlar təqdim etdi.

Sərvaz Hüseynoğlu

Ədəbiyyat qəzeti.- 2010.- 29 oktyabr.- S.4.