Gəldi məktəb günləri...
Sentyabrın 15-də ölkəmizin hər yerində olduğu kimi, paytaxtımızdakı Osman Mirzəyev adına 190 saylı orta məktəbin şagirdləri də yeni tədris ilinin əhval-ruhiyyəsini yaşadılar. Məktəbin direktoru Afət Bakıxanova məktəbliləri salamladı və onlara müvəffəqiyyətlər arzuladı. İbtidai sinif müəlliməsi Sevda İbrahimli də öz birincilərini sevinclə qarşıladı.
Yəqin ki, ilk zəng onların yaddaşında əbədi olaraq qalacaq... Heç vaxt unutmayacaqları bu zənglə onlar biliklərə yiyələnməyə tələsəcəklər. Əzəmətli məktəb binasının vestibülündə bu gün onlara örnək ola biləcək məzunların fotoları ilə də qarşılaşırlar. Addımlarını atacaqları hər pilləkən özləri də bilmədən ömür, eyni zamanda uğur pillələrinə dönəcək...
Və ən ümdəsi burada onlar həyat məktəbi keçəcək, söz eşidəcəklər... Söz haqqında isə ucadan uca söz deyən klassiklərimizi tanıyacaq, onların iç dünyasına daxil olacaqlar. "Ver sözə ehya ki..."
Deyirlər, uşaq doğulan andan tərbiyəsinə başlamaq
lazımdır. Gəlin, bu fikri sözə
də aid edək. Axı uşaq
doğulan gündən
söz eşidir.
Elə isə gəlin böyük söz ustadlarımızın xatirəsini
əziz tutaraq, bugünkü bilik bayramını balalarımızın
təkcə maariflənmə
günü kimi yox, həm də
söz, sənət bayramı kimi qəbul edək. Yolunuz açıq olsun...
Səadət
Ədəbiyyat qəzeti.- 2010.- 17 sentyabr.-S.6.