Mədəniyyətlərin qovşağında

Rüstəm Müstafayev adına Azərbaycan Dövlət İncəsənət Muzeyində tanınmış yazıçı və sənətşünas Sara Oğuzun (Nəzirovanın) ingilis dilində nəşr olunmuş "Seçilmiş əsərləri"n ("Selected Works") təqdimat mərasimi keçirilmişdir. Yığıncağı kitaba sponsorluq etmiş "Qarabağ sement" ASC-in nümayəndəsi Mehdi Mehdiyev açaraq bildirmişdir ki, çalışdığı müəssisə ölkəmizdəki fəaliyyətinin on illiyini orijinal şəkildə qeyd etməyi qərara almışdır. Belə düşündük ki, Azərbaycan adət və ənənələrinə incəsənətinə, mədəniyyətinə ehtiram nişanəsi olaraq bu mövzudan yazan bir yazıçının kitabını nəşr edək. Buna görə tender elan etdik. Tenderin nəticəsi olaraq Sara Oğuzun "Seçilmiş əsərləri"nin ingilis dilində nəşri qərara alındı. Çünki onun yaradıcılığında Azərbaycan mədəniyyətinin və adət-ənənələrinin yaxşı cəhətləri özünü lakonik şəkildə büruzə verir. Onu da deyək ki, kitabı tenderə Yaradıcı Qadınlar Assosiasiyası təqdim etmişdir.

Yığıncaqda yazıçı-dramaturq Əli Əmirli, tərcüməçi-publisist Emil Ağayev, professor Rəhman Bədəlov, YUNESKO-nun sabiq əməkdaşı Ramiz Abutalıbov, rəssam Elçin Axundov, tanınmış ziyalılar Toğrul Cuvarlı, Tamilla Zeynalova və b. çıxış edərək Sara Nəzirovanın ədəbi yaradıcılığından bədii əsərlərində qaldırdığı aktual problemlərdən, müasirliyindən, güzəranımızın əsərlərindəki əksindən söhbət açmışlar. Çıxışçılar yazıçının sənətşünas kimi fəaliyyətini də diqqətə çatdırmış, təsviri sənətimizin araşdırılmasında və təbliğində Sara xanımın zəhmətini qeyd etmişlər.

Tədbirin sonunda Sara Oğuz çıxış edərək kitabın tərcüməçiləri - ABŞ universitetlərinin əməkdaşları Odri Alştada, Şölə Vətənabadiyə, hollandiyalı Corles Vanderliqə, Azərbaycan Dövlət Dillər Universitetinin müəllimləri Vahid Ərəbova (Türksoya), Vaqif Qənbərova, kitabın redaktoru Ənn Tompsona, rəssamları Elçin Axundova və Kəbirə Haşımovaya, nasiri Ayna mətbuat evinə və toplunun ərsəyə gəlməsində zəhməti olanların hamısına təşəkkürünü bildirdi. Qeyd edək ki, 1000 nüsxə ilə nəşr olunmuş, 816 səhifəlik bu əsərə yazıçının povestləri, hekayələri, ssenariləri və sənət haqqında esselərindən nümunələr daxil edilmişdir. Əsərə ön sözü yazıçı xanım Mənzər Eynullayeva yazmışdır.

A.Xiləli

Ədəbiyyat qəzeti.-2010.-8 yanvar.-S.4.