Rəylər. Nəsr

Mənim fikrimcə, bu povest qeyri-normativ leksikaya malik olsa da, günümüzün tələbinə uyğundur. Əsərdə müəllif bizim müqəddəs saydığımız ziyarətgahlardan, Şeyx Şamil, Koroğlu qeyrətindən də söhbət açır. Tseseronla Yuli Sezar arasında olan söhbətin fəlsəfi mənasını da açıqlayır. Cəfər Cabbarlı, Müşfiq və digər Azərbaycan ziyalılarından nümunə gətirir. Ümumilikdə bir qadının fədakarlığından bəhs edir. Azərbaycanda olan bəzi problemləri də qələmə alır. Çeçen qadınının bətnindəki körpəni doğma torpaqda dünyaya gətirmək cidd-cəhdləri əsərin qayəsini təşkil edir. Torpağından, yurdundan didərgin düşən insanların mürəkkəb həyatını da unutmur. Mənə elə gəlir ki, bu, Yusif Həsənbəyin növbəti uğurudur. O, belə orijinal mövzulara tez-tez müraciət edir. 20 il bundan öncə dənizçilərin həyatını yaxından öyrənmək üçün onun Avropaya etdiyi səfərləri maraqlı əsərlərlə nəticələnmişdir. Bu, Yusif Həsənbəyin öz yaradıcılığına nə qədər ciddi yanaşmasını göstərir.

Çingiz Abdullayev

Ədəbiyyat qəzeti.-2010.-15 yanvar.-S.5.