"Mən öləndə ağlamayın…"

"Sağlığımda həm ağlamışam, həm də gülmüşəm" - deyirdi ustad xalq şairimiz Rəsul Rza. Kimsəyə yük olmağı qıymadığından "Mən xoşbəxt olardım tabutumu özüm apara bilsəydim" yazırdı.

Özü cismən aramızdan getdi, ürəklərdə isə yeri, dillərdə sözü qaldı.

Aprelin 1-də dünyanın yalan, gülüş günündə əbədiyyətə qovuşan ustadın Fəxri xiyabandakı məzarı başına gəlib, xatirəsini böyük duyğularla yad edən tanınmış qələm adamları, ailə üzvləri R.Rzanın bənzərsiz şəxsiyyəti və poeziyasından söz açdılar.

Tədbirin aparıcısı xalq şairi, AYB-nin birinci katibi Fikrət Qoca anım mərasimində dedi: "Düz otuz ildir ki, böyük şairimiz Rəsul Rza aramızda yoxdu. Ancaq onun poeziyası düz otuz ildir ki, yaşayır, döyüşür, gündəlik həyatımızda, düşüncəmizdə yaşayır. O, bütöv bir şeir, poeziya ölkəsi, gülşəni idi. Yenə də sevərək bu gülşənə üz tuturuq".

Şair-publisist Azər Abdulla vurğuladı ki, poeziyanı bir Aya bənzətsək, Rəsul Rza o Ayın haləsi kimi idi: "Onun poeziyası zehinlərdə yaşanan qorxunu götürdü, ədəbiyyatımıza yeni dəst-xətt, yeni hava gətirdi."

Tanınmış şair Ramiq Muxtar ustadla bağlı xatirələrini danışdı, "Peşəkar yaltaq" şeirini oxudu, filologiya üzrə fəlsəfə doktoru Əminə Tuncay R.Rzadan parlaq şəxsiyyət kimi söz açdı, onun xalqına namusla xidmət etdiyini, Ensiklopediyadakı fədakar fəaliyyətindən danışdı.

Tanınmış şair Yusif Həsənbəy dedi: "Mən şair cəsarətini çox sevirəm. Bu cəsarət Rəsul Rza şəxsiyyətinin əsas cəhəti idi. Rəsul müəllim insanları dost-sirdaş görmək istəyirdi və poeziyanın dili ilə bu istiqamətdə ürəyindən keçənləri dönə-dönə yazıb əmanət qoydu…"

Şair Fərqanə ustada həsr etdiyi şeirini oxudu, R.Rzadan bütün dövrlərin ustad sənətkarı kimi söz açdı.

Sonda böyük sənətkarın oğlu, xalq yazıçısı, AYB-nin sədri ailələri adından Rəsulsevərlərə təşəkkürünü bildirdi: "O ağır, məsum gündən otuz il keçir. Rəsul Rzanın vəfatı bizə ağır zərbə oldu. Təsəllimiz sizlərsiniz. Çıxışlarınızda, kitablarınızda, radio, televiziya verilişlərində haqqında sevərək söz açıbsınız, bizə təsəlli olubsunuz. Çox sağ olun…"

Sərvaz

Ədəbiyyat qəzeti.- 2011.- 8 aprel.- S.3.