Şairlik yaşının ölçüsü olmur

"Şairlə bir görüş, ya da adi söhbət - Allaha xidmətdir, bəndəyə hörmət" düşüncəsilə baş-başa keçirildi aprelin 20-də Azərbaycan Dövlət Filarmoniyasında xalq şairi Nəriman Həsənzadənin anadan olmasının 80 illik yubileyi münasibətilə düzənlənən tədbir.

Mədəniyyət və Turizm Nazirliyinin Yazıçılar Birliyi ilə birgə düzənlədiyi tədbirdə mədəniyyət və turizm naziri Əbülfəs Qarayev şairin Azərbaycan mədəniyyətinin inkişafındakı xidmətlərinə görə "Şərəf" ordeninə layiq görülməsi ilə bağlı Azərbaycan Respublikasının Prezidenti İlham Əliyevin sərəncamının mətnini oxudu və bu ali mükafatı yubilyara təqdim etdi.

Tədbirin aparıcısı, millət vəkili, AMEA-nın müxbir üzvü Nizami Cəfərov dedi: "Nəriman Həsənzadə həm böyük alim, yazıçı-publisist, tanınmış ictimai xadimdi. Ancaq onun fəaliyyətinin bütün növlərindən şairlik ana xətt kimi keçir. Nəriman müəllim kimi böyük sənətkarları nə qədər izah edirsənsə sona vara bilmirsən. Onun yaradıcılığında tarix mütləq yer tutur və bu prosesdə o özü də tarixləşir. Nəriman müəllim çox böyük ustadlardan dərs ala-ala ustadlaşıb, ədəbiyyat tariximizə əbədi daxil olub. Nəriman Həsənzadə 20-30-40 yaşlarında hansı daxili ehtiras və gənclik coşqunluğu ilə yazıb-yaradırdısa, yenə də o şövqlə yazır, ömrünün hər yeni on ilində qarşısında yeni zirvələr açılır. Hökumətimizə və dövlətimizə təşəkkür edirəm ki, həmişə Nəriman müəllimin əməyini layiqincə qiymətləndirib".

Xalq yazıçısı, AYB-nin sədri Anar çıxışında vurğuladı ki, bu möhtəşəm zalda vaxtilə bizim çox böyük şairlərimiz şeir oxuyub, böyük bəstəkarlarımızın mahnıları səsləndirilib: "Bu gün görkəmli şairimiz Nəriman Həsənzadənin 80 illik yubileyi həmin silsilənin davamı kimidi. O, bir insan ömrünü girov qoyaraq bir şair ömrünü ləyaqətlə yaşadıb. Bundan əvvəl onun yubileyi Yazıçılar Birliyində, Axundov adına Milli Kitabxanada, Dillər Universitetində və Gəncədə də keçirilib. Şairin ömrü əsərlərinin yaşarılığı ilə ölçülür və Nəriman müəllimin şeirləri həmişə sevilib, oxunub, oxunacaq da. O, bu gün də gənclik həvəsilə yazıb-yaradır".

Sonra Anar müəllim İsraildə yazıb-yaradan Simax Şeydanın təbrik məktubunu yubilyara təqdim etdi.

Türkiyənin Azərbaycandakı böyük elçisi Hulusi Kılıç N.Həsənzadə kimi görkəmli bir türk şairinin 80 illik yubileyində iştirak etməsindən qürur duyduğunu və yubileyin Türkiyədə də keçiriləcəyini vurğuladı.

Nizami adına Ədəbiyyat İnstitutunun direktoru, akademik Bəkir Nəbiyev çıxışında N.Həsənzadə ilə uzun illərin dostu, şairin ilk xeyirxahlarından biri olmasından qürur duymasından söz açdı. Dedi ki, Nəriman müəllim poeziyasında necə səmimi və həssasdırsa, ətrafındakılara qarşı münasibətdə də elədi - bu mənada onu ünsiyyət elmləri doktoru adlandırmaq olar.

Milli Aviasiya Akademiyasının rektoru, akademik Arif Paşayevin adından yubilyarı təbrik edən Musa Musayev və akademiyanın tələbələri N.Həsənzadənin insani məziyyətlərindən söz açdılar.

Bakı Dövlət Universitetinin rektoru, professor Abel Məhərrəmov yubilyarı rəhbərlik etdiyi kollektivin adından salamladı, dedi ki, milli-mənəvi dəyərlərimiz daha çox ədəbi-bədii düşüncəmizdən keçir.

Professor Nizaməddin Şəmsizadə tədbirdə çıxış edərək dedi: "Nəriman müəllim türkün zəngin təfəkkürünü və düşüncəsini poeziyanın dililə xalqın yaddaşına bərpa edir. Mənə elə gəlir Müşfiq, Blok səksən yaşa qədər yaşaya bilsəydilər, hökmən Nəriman müəllimə bənzəyərdilər. O, böyük lirikdi. Nəriman müəllim bizim poeziya teatrımızı yaradan sənətkarlardandır".

Tədbirdə Ağstafa rayon İcra Hakimiyyətinin məsul işçisi Lalə xanım, "Qazax" Xeyriyyə Cəmiyyətinin sədri Vidadi Bayramov, millət vəkilləri Məlahət İbrahimqızı, Əhməd Vəliyev, eləcə də professor Buludxan Xəlilov, rəssam Qafar Sarıvəlli, Qazax rayon İcra Hakimiyyətinin başçısı Rauf Hüseynov, tanınmış tənqidçilər Vaqif Yusifli, Rüstəm Kamal, AYB Qazax bölməsinin sədri Barat Vüsal çıxış edərək N.Həsənzadənin bənzərsiz poeziyasından, insanpərvərliyindən söz açdılar, yubiley hədiyyələri təqdim etdilər, şairin əsərləri respublikamızın tanınmış mədəniyyət və incəsənət xadimlərinin ifasında səsləndirildi.

Sonda xalq şairi əməyinə verilən yüksək qiymətə görə Azərbaycan Prezidenti İlham Əliyevə dərin minnətdarlığını bildirdi: "Ulu öndər Heydər Əliyev də həmişə yaradıcılığıma qayğı və diqqətlə yanaşıb. Mən o dahi insanın çox yaxşılıqlarını görmüşəm. Heydər Əliyev mənim xalqımızın böyük oğlu Nəriman Nərimanovdan bəhs edən poemamı sovet qlavlitinin basqısından qorudu. Şuşada Vaqifin ev muzeyinin açılışında mənə də söz verdi. Arzu edirəm Azərbaycan Prezidenti İlham Əliyevin apardığı siyasət nəticəsində Şuşa azad olunsun və Vaqifin ev muzeyi qarşısında o, öz böyük atasının ənənəsini davam etdirərək mənə də söz versin. O gün mütləq olacaq. Taleyimə minnətdaram ki, ömür yoluma böyük, yaxşı insanlar çıxıb. Vaxtilə xeyirxahım, ədəbi ustadım Mir Cəlaldan gördüyüm yaxşılıqları, diqqəti indi Mir Cəlal ocağının layiqli yetirməsi Arif müəllimdən görürəm…"

Sonra o, yeni şeirlərini oxudu.

S.Aranlı

Ədəbiyyat qəzeti.- 2011.- 22 aprel.- S.3.