Əlvida

Balaş Azəroğlu, onun şair xanımı Mədinə Gülgün o taylı bu taylı Azərbaycan ədəbiyyatının Xudafərin körpüsü idi. Bu gün Balaş müəllimə əlvida deyirik. Onun keşməkeşli, lakin çox şərəfli ömür yolu, zəngin yaradıcılığı Azərbaycan ədəbiyyatı tarixinə köçür. Bu tarixin parlaq və şərəfli səhifəsi olacaq yüzillərdə özünü vüqarla gələcək nəsillərə təqdim edəcək. Balaş Azərolğu öz suyu ilə özünü daşlara çırpıb qışqıra-qışqıra gələn dağ çaylarına bənzəmirdi. O, dərin dəryalar kimi təmkinli, sakit axırdı. Ona yaxın olduqca onun nə qədər dərin olduğunu hiss edirdin. Əsərlərinə baş vurduqca onun yeni-yeni qatlarını kəşf edirdin. Onun sakitliyinin doluluqdan olduğunu anlayırdın. Heç anlamasan da, tanımasan da Balaş müəllimə fərq etməzdi. O, heç nə itirmirdi. Onu öyrənməyən, yaxşı tanımayan oxucu itirirdi. Həyatı döyüşçü həyatı, taleyi şair taleyi idi Balaş müəllimin. Bu gün bütöv Azərbaycanın bir azadlıq mücahidini tarixə yola salırıq. Həmişəyaşar bir şairimizlə vidalaşırıq. Lakin onun şəxsiyyətinə, yaradıcılığına olan tükənməz məhəbbətimiz bizimlədir:

Məhəbbət də bir dindi, -

Məkkən öz Mədinəndi,

Sənsiz neynəyək indi

Ay Azəroğlu Balaş,

Yerin cənnət olaydı, -

Əlvida, şair qardaş.

Fikrət QOCA

Ədəbiyyat qəzeti.- 2011.- 29 aprel.- S.2.