Valideynləri sevmək azdı

Öz könül həmdəmi unudulmaz Xavər xanıma ömrün-günün gözəl çağlarında "Demə saçlarıma düşübdür ağ dən, ürək qocalmayıb, ürəyim sənsən" təskinliyi verən xalq şairi Səməd Vurğunun vaxtsız vəfatından sonra o gözəl qəlb sahibi, könül həmdəmi, "böyük şairdən nə qaldı?" sualı qarşısında durdu heykəl kimi məhəbbətilə. Od-ocağını sönməyə qoymadı, xatirəsini, ədəbi irsini yaşatdı, övladlarını böyüdüb boya-başa çatdırdı, onları görkəmli ziyalılar kimi yetişdirdi. Aprelin 27-də Səməd Vurğunun ev muzeyində Xavər xanımın anım günündə də məhz bu haq-saydan söz açıldı. Muzeyin direktoru, unudulmaz Aybəniz xanımın yadigarı Aygün Vəkilova onun yoxluğundan keçən 5 ilin yaşantılarını dilə gətirdi, bu böyük insanın Səməd Vurğun irsini, xatirəsinin qorunmasındakı fədakarlığından söz açdı. Dedi ki, valideynləri sevmək azdı-onları yaşatmaq lazımdı. Nənəsini qayğıkeş həyat yoldaşı, gözəl ana, sevimli nənə və qürurlu vətəndaş kimi xarakterizə edən Aygün xanım ötən xatirələrin işığındaca filologiya üzrə fəlsəfə doktoru Aslan Salmansoya, professor Ülviyyə Hacıbəyliyə, əməkdar mədəniyyət işçisi Səriyyə xanıma, şair Nurəngiz Günə, tanınmış jurnalistlər Zemfira Məhərrəmliyə, İsmayıl Umudluya, məşhur milyonçu Musa Nağıyevin nəvəsi Dilarə Fərəcqızına və başqalarına söz verdi, xatirələr dil açdı.

Mədəniyyət və Turizm Nazirliyinin məsul işçisi Əli İsmayılov çıxışında qeyd etdi ki, ulu öndər Heydər Əliyev Səməd Vurğunun ev muzeyinin açılışına sovetlər məkanının ən görkəmli mədəniyyət xadimlərini dəvət etmişdi. "Mən Rusiyada hərbi xidmətdə olarkən televiziya kanallarından izləyirdim. Sonra tale elə gətirdi ki, bu muzeydə işləyəsi oldum. Mədəniyyət və Turizm Nazirliyinin rəhbərliyi Səməd Vurğunun ev muzeyinin fəaliyyətinə xüsusi diqqətlə yanaşır. Muzeyin 35 illiyi nazirliyin qərarı ilə qeyd olundu. Muzeyin əsaslı təmiri nəzərdə tutulub. Bu muzey mənə çox əzizdi. Xavər xanım mənə həmişə "Əli, oğlum" - deyə müraciət edərdi".

Tədbirdə Xavər xanımın gözəl xüsusiyyətindən, gözəl ruhundan ən səmimi duyğularla söz açıldı, Vurğun Vəkilov nənəsinin xatirəsinə həsr etdiyi mahnını ifa etdi, sədəfli tar dilə gəldi, sənədli film nümayiş olundu. Film boyu Xavər xanım Səməd Vurğunlu günlərinin unudulmazlığıdan söz açır, qəribə bir utancaqlıq və qürurla "İndi də kölgəsi başımın üstündədi" - deyirdi.

Sərvaz

Ədəbiyyat qəzeti. - 2011.- 29 aprel.- S.2.