Hər kəsin öz Şəhriyarı

Aprelin 22-də AYB-nin Natəvan klubunda ədəbiyyatşünas alim Esmira Fuadın "Söz sərrafı Şəhriyar" kitabının təqdimatı oldu.

Mərasimi Yazıçılar Birliyinin katibi Arif Əmrahoğlu açaraq dedi: "Bu kitab elə bir görkəmli sənətkarın adı ilə bağlıdır ki, onun işığına cəm olmamaq mümkün deyil. Unudulmaz Məmməd Arazın bir misrasını əlavə etməyin yeridi: "Azərbaycan deyiləndə ayağa dur ki, Şəhriyarın ürəyinə toxuna bilər!" Şəhriyar yaradıcılığından söz açmaq bir növ bütöv Azərbaycanın haqqını ortaya qoymaq deməkdi. Onun haqqında çox yazılıb. Dünyada ana adı ən uca olanıdı. Şəhriyar adı da o gözəl ünvanlardan biridi. Hər kəsin öz Şəhriyarı var, bu gün də Esmira xanımın Şəhriyarı ilə tanış oluruq".

Tədbirin aparıcısı, yazıçı-publisist Flora Xəlilzadə də Şəhriyar adının əzizliyindən, xüsusilə yurd itkisi yaşamış insanlara olan simsarlığından söz açdı. Qeyd etdi ki, Esmira Fuad Şəhriyar haqqında söz deməyə haqqı çatan bir elm adamıdır. Yurdsevərliyi, milli-mənəvi dəyərlərimizə bağlılığı ilə: "O, təqdim olunan kitabda Şəhriyar poeziyasını ən incə detallarına qədər təhlilə cəlb edə bilib. Özü də sevərək, xüsusi ehtiramla".

Professor Gülrux Əlibəyli kitabın elmi, emosional ifadə, təhlil məziyyətlərindən söz açdı, tənqidçi Cavanşir Yusifli Şəhriyarın böyük vətəndaş hünərindən danışdı: "Məndə zərrə qədər siyasət mərəzi yoxdur" - deyən Şəhriyar əslində bütün gerçəklikləri bilirdi, türk aləmində gedən prosesi incəliklə izləyirdi və öz münasibətini bildirirdi. Məncə, təqdim edilən kitabın dəyəri ondadır ki, Esmira xanım böyük şairin həsrət qəhrinin nədənliyini dolğunluğu ilə əhatə edə bilib".

Şəhriyardan yaddaş ruhumuzun tarixi kimi söz açan professor Buludxan Xəlilov qeyd etdi ki, bu böyük sənətkardan söz açmaq əslində vətəndən yazmaqdı. Kitabda Şəhriyar ağrısı çağdaş Azərbaycanımızın Qarabağ itkilərindən doğan problemlərlə bir kontekstdə verilib.

Şair və yazıçılardan Ədalət Əsgəroğlu, Oqtay Rza, Aysel Əlizadə, Nüşabə Məmmədli, Fəxrəddin Ziya, Fərqanə, Kəmalə və b. çıxış edərək "Söz sərrafı Şəhriyar"ın yüksək vətəndaşlıq duyğusu ilə qələmə alındığını qeyd etdilər.

Tanınmış tənqidçi Vaqif Yusifli E.Fuadın yüksək ümumiləşdirmə qabiliyyətini, mövzuya yaxınlığını, ən əsası şairi sevərəkdən yazmaq bacarığını önə çəkdi. "Ədəbiyyat qəzeti"nin şöbə müdiri Sərvaz Hüseynoğlu E.Fuadın qaynaqlara xüsusi sayğı göstərdiyindən danışmaqla bərabər onu da qeyd etdi ki, müəllif bəzi məqamlarda artıq təfərrüatlara yer verib, uzun-uzadı sitatlar çəkmək, məqalə başlıqları sadalamaqla kitabın həcmini genişləndirib. Nəticədə mətləb arxa planda qalıb".

Sonda Esmira Fuad söz alaraq kitabın araya-ərsəyə gəlməsində ona yetərincə diqqət və qayğı göstərmiş Mədəniyyət və Turizm Nazirliyinin, AMEA Nizami adına Ədəbiyyat İnstitutunun, təqdimat mərasiminin keçirilməsinə şərait yaratdığına görə AYB-nin rəhbərliyinə təşəkkürünü bildirdi.

S.Hüseynoğlu

Ədəbiyyat qəzeti.- 2011.- 29 aprel.- S.2.